កម្ពុជា-ចិន ចុះកិច្ចព្រមព្រៀងសិក្សាលម្អិតផ្លូវល្បឿនលឿនភ្នំពេញ-សៀមរាប-ប៉ោយប៉ែត ជាផ្លូវការ

7 ខែមិថុនា 2023
ព័ត៌មានក្នុងស្រុក
10 មើល

ក្រសួងសាធារណការ និងដឹកជញ្ជូន បានចុះកិច្ចព្រមព្រៀងក្របខ័ណ្ឌជាមួយក្រុមហ៊ុនសាជីវកម្មស្ពាន និងថ្នល់ចិន ដើម្បីឱ្យសិក្សាលម្អិតលើគម្រោងសាងសង់ផ្លូវល្បឿនលឿនភ្នំពេញ-សៀមរាប-ប៉ោយប៉ែត ជាផ្លូវការហើយ។

ថ្លែងក្នុងកិច្ចសម្ភាសន៍ ឯកឧត្តម ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នៅថ្ងៃទី០៧ ខែមិថុនា ឆ្នាំ២០២៣ បានឱ្យដឹងថា កិច្ចព្រមព្រៀងនេះ នឹងអាចឱ្យក្រុមហ៊ុនសិក្សាលម្អិតបន្ថែមទៀតលើគម្រោងសាងសង់ផ្លូវល្បឿនលឿនខ្សែទី៣ រួមមានដំណាក់កាលទី១ ពីភ្នំពេញ ទៅសៀមរាបប្រវែងប្រហែល២៥០ គីឡូម៉ែត្រ និងដំណាក់កាលទី២ ពីសៀមរាបទៅប៉ោយប៉ែតប្រវែង ១៥០គីឡូម៉ែត្រ ដោយប្រើពេល ១២ខែ ដើម្បីសិក្សាលម្អិតពីគម្រោងនេះ។

ឯកឧត្តមទេសរដ្ឋមន្ត្រី បានបន្តថា ក្រុមហ៊ុន អាចបញ្ចប់ការសិក្សាយ៉ាងយូរត្រឹមរយៈពេល ៦ខែប៉ុណ្ណោះ ដោយសារកន្លងមកក្រុមហ៊ុនបានសិក្សាអស់រយៈពេល ៥ខែរួចមកហើយ រួចបន្ទាប់មកនឹងផ្តល់ការសិក្សាលម្អិតជូនមករាជរដ្ឋាភិបាលពិនិត្យ និងសម្រេច។

ឯកឧត្តមទេសរដ្ឋមន្ត្រី បានបញ្ជាក់បន្ថែមថា គម្រោងសាងសង់នេះ (ពីភ្នំពេញ ទៅសៀមរាប) អាចត្រូវចំណាយ ប្រមាណ ២៥០០លានដុល្លារ ដោយក្នុង ១គីឡូម៉ែត្រ ត្រូវចំណាយ ១០លានដុល្លារ។

លើសពីនេះ ឯកឧត្តមទេសរដ្ឋមន្ត្រី បានបង្ហាញនូវចក្ខុវិស័យក៏ដូចជាផែនការដែលបានគ្រោងទុកថា បើមានផ្លូវល្បឿនលឿនខែ្សទី៣ នេះ ក៏អាចមានផ្លូវល្បឿនលឿនទី៤ ដែលចេញពីភ្នំពេញ ទៅក្រចេះ ក្រចេះទៅស្នួល តទៅមណ្ឌលគីរី តទៅសែនមនោរម្យ ចេញតទៅកោះញែក តទៅបានលុង ចេញពីបានលុងត្រលប់មកស្ទឹងត្រែង តទៅអូរពងមាន់ ចេញទៅព្រះវិហារ តចេញមកសៀមរាប ហើយចេញមកភ្នំពេញវិញ។

គួរបញ្ជាក់ដែរថា គម្រោងផ្លូវល្បឿនលឿនខ្សែទី២ ភ្នំពេញ-បាវិត និងស្ពានសំខាន់១ខ្សែឆ្លងទន្លេមេគង្គ ត្រូវបានបើកការដ្ឋានសាងសង់ជាផ្លូវការហើយ នៅថ្ងៃទី០៧ ខែមិថុនា ឆ្នាំ២០២៣នេះ។ (អានបន្ថែម)

- Video Advertisement -