ក្រសួងដែនដីចេញនិតិវិធីថ្មី ៤ ចំណុចរឹតបន្ដឹងការវាស់វែងដី ការផ្ដល់កម្មសិទ្ធិ និងការជួលដីរដ្ឋ

• 19 ខែ​មករា 2021
• Uncategorized @km
• 5 មើល

ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី១៨ ខែមករា ឆ្នាំ២០២១ បានដាក់ចេញគោលការណ៍ថ្មី ៤ចំណុច រឹតបន្ដឹងនិតិវិធីក្នុងការវាស់វែងក្បាលដី ការផ្ដល់កម្មសិទ្ធិ និងការជួលដីរដ្ឋឱ្យទៅឯកជន។

ការដាក់ចេញគោលការណ៍ថ្មីនេះ គឺដើម្បីបញ្ជៀសបញ្ហាដែលបានកើតឡើងជាបន្តបន្ទាប់ដូចជា ការផ្ដល់កម្មសិទ្ធ ឬជួលដីរដ្ឋឱ្យឯកជនដោយគ្មានការផ្ទៀងផ្ទាត់ពីរដ្ឋបាលសុរិយោដី ការវាស់ក្បាលដីមិនត្រឹមត្រូវ បញ្ហាជាន់ក្បាល់ដីគ្នា និងវិវាទដីធ្លីផ្សេងៗទៀត។

គោលការណ៍ទាំង ៤ នោះរួមមាន៖

១. រាល់ការវាស់វែងក្បាលដី ត្រូវអនុវត្តនិងផ្ទៀងផ្ទាត់ដោយរដ្ឋបាលសុរិយោដី ដែលជាអង្គភាពមានសមត្ថកិច្ចតែមួយគត់ ក្នុងការវាស់វែងកំណត់ព្រំក្បាលដីស្របតាមមាត្រា២២៩ និងមាត្រា២៣៥ នៃច្បាប់ភូមិបាល។

២. រដ្ឋបាលរាជធានី ខេត្ត ត្រូវប្រគល់ភារកិច្ចជូនមន្ទីរៀបចំដែនដី នគរូបនីយកម្ម និងសំណង់ និងសុរិយោដីរាជធានី ខេត្ត ចុះវាស់វែង និងផ្ទៀងផ្ទាត់ជាមួយប្រព័ន្ធមូលដ្ឋានទិន្នន័យសុរិយោដី។

៣. រាល់ទិន្នន័យវាស់វែងក្បាលដីដើម្បីផ្តល់កម្មសិទ្ធិ ឬជួលដីរដ្ឋឱ្យឯកជន ត្រូវបញ្ជូនមកអគ្គនាយកដ្ឋានសុរិយោដី និងភូមិសាស្រ្ត ពិនិត្យនិងផ្ទៀងផ្ទាត់ជាមុនសិន ព្រោះអគ្គនាយកដ្ឋាននេះ ជាអ្នកគ្រប់គ្រងមូលដ្ឋានទិន្នន័យសុរិយោដីទូទាំងប្រទេស។

៤. រាល់ការជួលរដ្ឋឱ្យទៅឯកជន ត្រូវធ្វើការចុះបញ្ជីចេញបណ្ណកម្មសិទ្ធិជាដីឯកជនរបស់រដ្ឋជាមុនសិន។

• Laws and Regulation