ក្រុមហ៊ុនចិនវិនិយោគជាង ២០០លានដុល្លារ សង់រោងចក្រសំបកកង់ឡានធំមួយនៅក្រចេះ

3 ខែមីនា 2023
ព័ត៌មានក្នុងស្រុក
14 មើល

ក្រុមហ៊ុនចិន Qingdao Double Star Co. Ltd សហការជាមួយក្រុមហ៊ុនក្នុងស្រុក Ube Development Co. Ltd. គ្រោងបោះទុនវិនិយោគចំនួន ២០០លានដុល្លារ ដើម្បីបង្កើតរោងចក្រផលិតសំបកកង់យានយន្តគ្រប់ប្រភេទ ក្នុងតំបន់សេដ្ឋកិច្ចពិសេសមួយនៃខេត្តក្រចេះ។

ក្រុមហ៊ុន Qingdao Double Star Group បានប្រកាសកាលពីថ្ងៃទី ២០ខែកុម្ភៈ ថា ក្រុមហ៊ុនបុត្រសម្ព័ន្ធរបស់ក្រុមហ៊ុន គឺក្រុមហ៊ុន Double Star Tire បានសហការគ្នាជាមួយក្រុមហ៊ុនUBE DEVELOPMENT ដោយបណ្តាក់ទុនរួមគ្នាចំនួន ១,៤ពាន់លានយ័ន ឬជិត ២១០លានដុល្លារអាមេរិក ក្នុងការបង្កើតក្រុមហ៊ុនឈ្មោះថា Double Star (Cambodia) Tire Co., Ltd. ដើម្បីដំណើរការគម្រោងរោងចក្រផលិតសំបកកង់ឡាន នៅក្នុងតំបន់សេដ្ឋកិច្ចពិសេសនៅខេត្តក្រចេះ។

ក្រុមហ៊ុន Double Star Tire បានបញ្ចាក់ថា ការសាងសង់ត្រូវបានរំពឹងថានឹងបញ្ចប់ក្នុងរយៈពេល ១៥ខែ ហើយនៅពេលដែលដំណើរការពេញលេញ រោងចក្រនេះនឹងអាចផ្តល់ចំណូលប្រចាំឆ្នាំជាមធ្យមចំនួន ២,៨ពាន់លានយ័ន និងប្រាក់ចំណេញសុទ្ធប្រហែល ៥៥០លានយ័ន។

គម្រោងវិនិយោគនេះមានគោលបំណង ដើម្បីពន្លឿនការអនុវត្តយុទ្ធសាស្ត្រ “មូលដ្ឋាននីយកម្ម” និងពន្លឿនអភិវឌ្ឍន៍ទីផ្សារអន្តរជាតិ ឆ្លើយតបយ៉ាងសកម្ម ចំពោះរបាំងពាណិជ្ជកម្មអន្តរជាតិ ដែលបានយកពន្ធខ្ពស់លើផលិតផលរបស់ចិន។

កន្លងមក មានក្រុមហ៊ុនយក្សចិនចំនួនពីរបានវិនិយោគលើរោងចក្រផលិតសំបកកង់ឡាននៅកម្ពុជា។ ក្នុងនោះ ក្រុមហ៊ុនចិនឈ្មោះថា Sailun នៅតំបន់សេដ្ឋកិច្ចពិសេស ក្នុងខេត្តស្វាយរៀង មានទុន ៣៥០លានដុល្លារអាមេរិក ក្រោមផ្ទៃដីចំនួន ៥០ ហិកតាបានដាក់ឱ្យដំណើរការតាំងពីខែវិច្ឆិកា ឆ្នាំ២០២១មកម្លេះ។ ក្រុមហ៊ុនទី ២ គឺ General Intelligence បានវិនិយោគទុន ៣០០លានដុល្លារអាមេរិក បាន និងកំពុងសាងសងរោងចក្រ នៅតំបន់សេដ្ឋកិច្ចពិសេសក្រុងព្រះសីហនុ។ (អានបន្ថែម)

- Video Advertisement -