ជប៉ុនវិនិយោគដាំម្ទេសកម្រិតស្តង់ដារលើផ្ទៃដី ៧២ហិកតា នៅស្រុកអង្គរធំ ខេត្តសៀមរាប

12 ខែមិថុនា 2023
Uncategorized @km
6 មើល

អ្នកវិនិយោគមកពីប្រទេសជប៉ុន នឹងបង្កើតកសិដ្ឋានដាំម្ទេសស្តង់ដារជប៉ុន លើផ្ទៃដីចំនួន ៧២ហិកតា ជំហានទី១ ស្ថិតក្នុងភូមិត្រពាំងទូក ឃុំជប់តាត្រាវ ស្រុកអង្គរធំ ខេត្តសៀមរាប ខណៈគ្រោងត្រូវការដាំបន្ថែមផ្សេងៗទោះតរហូតដល់ ២០០ហិកតា។

ក្នុងពេលចុះពិនិត្យទីតាំងដែលមានការចូលរួមពីលោក សោម សមស័ក្ក នាយកទីចាត់ការហិរញ្ញវត្ថុខេត្តសៀមរាប កាលពីថ្ងៃទី១០ ខែមិថុនា ឆ្នាំ២០២៣ លោក NABESHIMA KATSUHITO ប្រធានកសិដ្ឋានដាំបន្លែស្តង់ដារជប៉ុន បានឱ្យដឹងថា កសិដ្ឋានដាំម្ទេសស្តង់ដារជប៉ុន ដែលគម្រោងសាងសង់នេះ គឺជាបច្ចេកទេសថ្មី ហើយនឹងបានផលច្រើន និងជាគំរូមួយសម្រាប់កសិកម្មនៅក្នុងស្រុកផងដែរ ខណ:បច្ចុប្បន្ននេះមានអ្នកបញ្ជាទិញ ក្នុងមួយខែៗរហូតដល់ ៥០០តោនជារៀងរាល់ខែ ហើយផែនការនេះមិនមែនលក់នៅក្នុងស្រុកនោះទេ គឺនាំចេញទៅក្រៅប្រទេផងដែរ។

លោកបានបន្ថែមថា កសិដ្ឋាននេះដែរ នឹងក្លាយជាគំរូមួយ ដើម្បីឲ្យប្រជាកសិករដែលចង់ដាំម្ទេសអាចទៅសិក្សាស្រាវជ្រាវនិងរៀនសូត្រពីកសិដ្ឋានបាន។

លោក NABESHIMA KATSUHITO បានបញ្ជាក់បន្ថែមថា ក្រុមហ៊ុនរបស់លោកនឹងធ្វើមួយជំហានម្ដងមួយជំហានម្ដង ដែលកសិដ្ឋាននេះនឹងធ្វើលើផ្ទៃដី ៧២ហិកតា ដែលជាជំហានដំបូង និងធ្វើជំហានបន្តបន្ទាប់ទៀត ដើម្បីឲ្យតម្រូវទីផ្សារនៅក្រៅប្រទេស។

លោកជឿជាក់ថា ពេលដែលកសិដ្ឋាននេះបានដំណើរការ នោះនឹងមានអ្នកកម្មង់ទិញផ្សេងៗទៀតកាន់តែច្រើនថែមទៀត ខណ:តម្រូវការ ៥០០តោន ក្នុងមួយខែ គឺត្រូវការផ្ទៃដី ២០០ហិកតា ទើបគ្រប់គ្រាន់សម្រាប់ផលិតអោយបាន ៥០០តោនក្នុងមួយខែ ដើម្បីឲ្យផលដំណាំវិលជុំបាន យើងត្រូវការចូលរួមពីប្រជាជននៅជុំវិញនោះផងដែរ។

ក្រៅពីបង្កើតកសិដ្ឋាននេះ លោក ក៏នឹងបង្កើតទីតាំងកែច្នៃខ្នាតតូចមួយទៀត គឺផលិតទឹកម្ទេសស្តង់ដារ ឱ្យក្លាយជាទឹកម្ទេសកម្ពុជាដែលឆ្ងាញ់មានរស់ជាតិ ដែលផលិតពីម្ទេសដាំក្នុងទឹកដីខេត្តសៀមរាប សម្រាប់ការប្រើប្រាស់នៅកម្ពុជា ក៏ដូចជាប្រទេសអាស៊ាន។

- Video Advertisement -