រដ្ឋគ្រោងបើកការដ្ឋានសាងសង់ផ្លូវសំខាន់ៗ ៣ខ្សែទៀត នៅក្រចេះមុនចូលឆ្នាំខ្មែរ

• 31 ខែ​មករា 2023
• ព័ត៌មានក្នុងស្រុក
• 8 មើល

ក្នុងឆ្នាំ២០២៣នេះ ខេត្តក្រចេះជាខេត្តមួយ ដែលទទួលបានការអភិវឌ្ឍប្រព័ន្ធហេដ្ឋារចនាសម្ព័ន្ឋជាច្រើនជាងគេ។ នៅមុនពេលចូលឆ្នាំថ្មីប្រពៃណីខ្មែរ ឆ្នាំ២០២៣នេះ ខេត្តក្រចេះនឹងទទួលបានគម្រោងផ្លូវថ្នល់សំខាន់ៗ ចំនួន៣បន្ថែមទៀត។

នេះបើយោងតាមការបញ្ជាក់ពី ឯកឧត្ដម វ៉ា ថន ក្នុងសន្និសីទសារព័ត៌មាន ស្ដីពី «ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តក្រចេះ» នៅថ្ងៃទី៣១ ខែមករា ឆ្នាំ២០២៣។

គម្រោងហេដ្ឋារចនាសម្ព័ន្ធផ្លូវថ្នល់ទាំងបីនោះរួមមាន៖ ទី១ គម្រោងផ្លូវជាតិលេខ ៧ ប្រវែង ៣១,២៥ គីឡូម៉ែត្រ ពីរង្វង់មូលខ្លាស្ទុះ ទីរួមខេត្តក្រចេះ ទៅឃុំស្វាយជ្រេះ ស្រុកស្នួល ខេត្តក្រចេះ។ ទី២ គម្រោងផ្លូវខេត្តលេខ ៣៧៧ ប្រវែង ៣៥,៥ គីឡូម៉ែត្រ ចាប់ពី រង្វង់មូលព្រាបស ទីរួមខេត្តក្រចេះ ទៅទីរួមស្រុកសំបូរ ខេត្តក្រចេះ និងមានស្ពានចំនួន៩ មានប្រវែងសរុប ៤១៣ ម៉ែត្រ។ ទី៣ គម្រោងផ្លូវលេខ ៣៧៧ A ដែលមានប្រវែង ១៣,៥ គីឡូម៉ែត្រ ចាប់ពីរង្វង់មូលសណ្តាន់ ទៅផ្លូវជាតិលេខ៧។

គម្រោងផ្លូវថ្នល់ទាំងបីនេះជាកម្ចីថវិកា ក្នុងអត្រាការប្រាក់សម្បទាន ពីសំណាក់ធនាគារពិភពលោក (World Bank) មកកាន់ប្រទេសកម្ពុជា ប៉ុន្តែឯកឧត្ដមមិនបានបញ្ជាក់ពីទំហំទឹកប្រាក់សាងសង់នៅឡើយទេ។

ឯកឧត្តមបញ្ជាក់បន្ថែមថា គម្រោងទាំងបីនេះនឹងត្រូវបានបើកការដ្ឋានសាងសង់ ដោយសម្តេចតេជោ ហ៊ុនសែន នាយករដ្ឋមន្ត្រីនៃកម្ពុជា នៅមុនពេលចូលឆ្នាំថ្មីប្រពៃណីជាតិ ឆ្នាំ២០២៣។

• Road and Infrastructure