រដ្ឋបំពាក់កាមេរ៉ាជាង ៤៣០ទីតាំង ដើម្បីពង្រឹងសន្តិសុខជូនពលរដ្ឋ និងភ្ញៀវទេសចរ នៅខេត្តព្រះសីហនុ

• 23 ខែ​ធ្នូ 2024
• Uncategorized
• 9 មើល

ដើម្បី​ពង្រឹង​សន្តិសុខ​ជូន​ប្រជាពលរដ្ឋ និង​ភ្ញៀវទេសចរ​ អាជ្ញាធរ​ខេត្ត​ព្រះសីហនុ បាន​អនុវត្តផែនការបំពាក់កាមេរ៉ា​សុវត្ថិភាព​នៅតាម​ទីតាំង​យុទ្ធសាស្ត្រសំខាន់ៗបាន​ចំនួន ៤៣៣ទីតាំង ក្នុង​ខេត្ត​ព្រះសីហនុ។ ក្នុងសន្និសីទសារព័ត៌មាននាពេលថ្មីៗនេះ ដែលមានអ្នកសារព័ត៌មានចូលរួមជាង ៦០នាក់ ឯកឧត្តម ម៉ាង ស៊ីណេត អភិបាលខេត្តព្រះសីហនុ បានលើកឡើងពីគំនិតផ្តួចផ្តើមប្រកបដោយមហិច្ឆិតានេះក្នុងគោលបំណងធានាឱ្យមានបរិយាកាសសុវត្ថិភាពសម្រាប់ភ្ញៀវជាតិ និងអន្តរជាតិ។

ការដំឡើងកាមេរ៉ាសុវត្ថិភាពទាំងនេះ គឺជាផ្នែកមួយនៃយុទ្ធសាស្ត្រដ៏ទូលំទូលាយ ដើម្បីបង្កើនសុវត្ថិភាពសាធារណៈក្នុងតំបន់ ជាពិសេសខេត្តព្រះសីហនុ បន្តទាក់ទាញភ្ញៀវទេសចរ និងអ្នកវិនិយោគកាន់តែច្រើនឡើងបន្ថែមទៀត។ ឯកឧត្តមអភិបាលមានប្រសាសន៍ថា “គោលដៅរបស់យើងគឺតាមដានសកម្មភាពយ៉ាងជិតស្និទ្ធ និងឆ្លើយតបភ្លាមៗចំពោះឧប្បត្តិហេតុណាមួយ។ ឯកឧត្តមអភិបាលខេត្តបានសង្កត់ធ្ងន់ទៀតថា គំនិតផ្តួចផ្តើមនេះរួមមាន ការបង្កើតបណ្តាញទូរស័ព្ទបន្ទាន់ Hot Line ដែលអាចឱ្យសាធារណជនរាយការណ៍បញ្ហាដោយផ្ទាល់ទៅកាន់អាជ្ញាធរ។

ប្រព័ន្ធកាមេរ៉ាសុវត្ថិភាពទាំងនេះមានបំពាក់កាមេរ៉ាចំនួន ៥៣៣គ្រាប់ អាចមើលឃើញទូទាំងទីក្រុង ហើយគ្រោងនឹងដាក់បន្ថែមនៅតាមទីតាំងសំខាន់ៗមួយចំនួនទៀតផងដែរ។

ផែនការនេះត្រូវបានរចនាឡើងមិនត្រឹមតែសម្រាប់ការទប់ស្កាត់ឧក្រិដ្ឋកម្មប៉ុណ្ណោះទេ ប៉ុន្តែថែមទាំងដើម្បីជំរុញអារម្មណ៍នៃការជឿទុកចិត្តរបស់សហគមន៍ផងដែរ។ តាមរយៈការផ្តល់សិទ្ធិអំណាចដល់សាធារណជនតាមរយៈខ្សែទូរស័ព្ទបន្ទាន់ Hot Line សម្រាប់រាយការណ៍ពីកង្វល់ផ្សេងៗ ខណៈអាជ្ញាធរខេត្តមានគោលបំណងចូលរួមជាមួយប្រជាពលរដ្ឋ និងភ្ញៀវទេសចរក្នុងការធានាសុវត្ថិភាពផ្ទាល់ខ្លួន។ ឯកឧត្តម ម៉ាង ស៊ីណេត បានមានប្រសាសន៍ទៀតថា “នៅពេលមានបញ្ហាកើតឡើង ក្រុមការងាររបស់យើងបានត្រៀមខ្លួនជាស្រេចក្នុងការឆ្លើយតបយ៉ាងឆាប់រហ័ស ដើម្បីដោះស្រាយបញ្ហាណាមួយ”។

ជាមួយនឹងគំនិតផ្តួចផ្តើមនេះ អ្នកភូមិ ឃុំ សង្កាត់ នៃក្រុងព្រះសីហនុ ត្រូវបានរៀបចំឡើងក្រោមគោលនយោបាយសុវត្ថិភាព ដែលផ្តល់អាទិភាពដល់សុខុមាលភាពរបស់អ្នកដែលរស់នៅក្នុង ឬមកលេងខេត្ត។ ដោយសារខេត្តព្រះសីហនុដាក់ខ្លួនជាគោលដៅសំខាន់សម្រាប់ការវិនិយោគ និងទេសចរណ៍ ការដាក់បញ្ចូលបច្ចេកវិទ្យាទំនើបនៅក្នុងវិធានការសុវត្ថិភាពសាធារណៈ ជាការបង្ហាញពីការប្តេជ្ញាចិត្តក្នុងការលើកកម្ពស់បរិស្ថានសុវត្ថិភាពសម្រាប់មនុស្សគ្រប់គ្នា។

ប្រជាពលរដ្ឋ និងភ្ញៀវទេសចរណ៍ក្នុងខេត្តព្រះសីហនុ ពេលនេះអាចរីករាយនឹងពេលវេលារបស់ពួកគេដោយភាពស្ងប់ស្ងាត់ជាងមុន ដោយសារវិធានការណ៍យ៉ាងសកម្មរបស់អាជ្ញាធរមូលដ្ឋាន ដើម្បីធានាបាននូវសុវត្ថិភាពសហគមន៍សម្រាប់ទាំងអស់គ្នា។

• Policy and Strategy