លំនៅឋានតម្លៃមធ្យម និងក្រោមមធ្យម  បន្តមានតម្រូវការខ្ពស់នៅក្នុងឆ្នាំ ២០២៣

• 13 ខែ​មករា 2023
• Uncategorized @km
• 7 មើល

ប្រភេទលំនៅឋាន ដែលមានតម្លៃមធ្យម និងក្រោមមធ្យម ត្រូវបានព្យាករថា នឹងបន្តមានតម្រូវការខ្ពស់ជាងគេ នៅឆ្នាំ២០២៣ នេះ ដោយសារការផ្គត់ផ្គង់ផ្ទះប្រភេទនេះ នៅខ្វះខាតច្រើន បើប្រៀបធៀបនឹងតម្រូវការជាង ៣ ម៉ឺនខ្នង នៅក្នុងមួយឆ្នាំៗ។

លោក ច្រឹក សុខនីម អគ្គនាយកក្រុមហ៊ុន Century 21 Mekong បានឱ្យដឹងថា នៅក្នុងឆ្នាំ២០២៣នេះ ប្រភេទលំនៅឋានតម្លៃមធ្យម និងក្រោមមធ្យមនៅបន្តមានតម្រូវការខ្ពស់ ដោយសារការផ្គត់ផ្គង់នៃផ្ទះប្រភេទនេះនៅមានកម្រិត បើប្រៀបធៀបនឹងតម្រូវការជាក់ស្តែងជាង ៣ ម៉ឺនខ្នង ។

លោកបានបញ្ជាក់ថា៖ «រាល់ថ្ងៃនេះ តម្រូវការភាគច្រើន គឺផ្ទះតម្លៃមធ្យម ដែលមានតម្លៃក្រោម១០ម៉ឺនដុល្លារ ហើយចរន្តនៃការដោះដូរនៅមានសកម្មភាពធម្មតា ដោយសារប្រជាជានចំណូលកម្រិតទាប និងមធ្យមបានបន្ដកើនឡើង» លោកបន្ត។

លោកស្រី អាន សុធីតា អគ្គនាយិកាក្រុមហ៊ុន PropNex Cambodia បានមានប្រសាសន៍ នៅថ្ងៃទី០៩ ខែមករា ឆ្នាំ២០២៣ ថា ប្រភេទលំនៅឋាន ដែលស្ថិតនៅចន្លោះតម្លៃ៨ ទៅ ២០ម៉ឺនដុល្លារ ជាប្រភេទពេញនិយមបំផុត ដោយសារទំហំនៃគ្រួសារខ្មែរ នាពេលបច្ចុប្បន្ននេះ មានចន្លោះពី ៣ទៅ ៤នាក់ តែប៉ុណ្ណោះ ដែលទំហំផ្ទះតូចល្មមគឺមានភាពសមរម្យហើយ ប៉ុន្តែគួរតែបន្ថែមមកវិញនូវទីធ្លាបៃតង ដើម្បីបំពេញតម្រូវការរបស់អតិថិជន។

យោងតាមរបាយការណ៍ប្រចាំឆ្នាំរបស់ក្រុមហ៊ុន CBRE Cambodia ចេញផ្សាយនៅថ្ងៃទី ១១ ខែមករា បានបង្ហាញថា នៅក្នុងឆ្នាំ២០២២ លំនៅឋានតម្លៃមធ្យម និងក្រោមមធ្យមមានចំណែកចំនួន ៩២% នៃការផ្គត់ផ្គង់នៅក្នុងទីផ្សារសរុប ដែលកើនឡើងពី ៩១% នៅក្នុងឆ្នាំ២០១៩៕

• Business and Market