សហភាពអ៊ឺរុបត្រៀមធ្វើទំនើបកម្មបណ្ដាញអគ្គិសនីមុនឆ្នាំ ២០២៣ ដោយប្រើឌីជីថលភ្លោះ

• 5 ខែ​កុម្ភៈ 2026
• ព័ត៌មានសំណង់
• 10 មើល

សហភាពអឺរ៉ុបកំពុងងាកទៅរកយុទ្ធសាស្ត្រឌីជីថល ដើម្បីធ្វើទំនើបកម្ម និងថែទាំប្រព័ន្ធអគ្គិសនីឱ្យមានប្រសិទ្ធភាពជាងមុន ដើម្បីសម្រេចតាមគោលដៅប្រទេសបៃតងនៅឆ្នាំ ២០៣០ តាមរយៈការប្រើបច្ចេកវិទ្យាឌីជីថល Digital Twin។

បច្ចុប្បន្ន ហេដ្ឋារចនាសម្ព័ន្ធអគ្គិសនីរបស់សហភាពអឺរ៉ុបមានប្រវែងជាងមួយលានគីឡូម៉ែត្រ និងបម្រើអតិថិជនចំនួន ៦០០ លាននាក់។ ដើម្បីសម្រេចបាននូវគោលដៅបៃតង បណ្តាញអគ្គិសនីនេះត្រូវតែមានសមត្ថភាពបញ្ជូនឱ្យដល់ ១៣៦ ហ្ស៊ីហ្គាវ៉ាត់ (gigawatts) នៅត្រឹមឆ្នាំ ២០៣០។

ទោះជាយ៉ាងណាក៏ដោយ បណ្ដាញទាំងនេះគឺសភាពចាស់ជរា ហើយកំពុងជិតផុតអាយុកាលប្រើប្រាស់ ខណៈបណ្ដាញទាំងនេះក៏ត្រូវការធ្វើទំនើបកម្មដើម្បីកាត់បន្ថយការបំភាយឧស្ម័នកាបូន។ នេះបើយោងតាមអង្គភាព Eurelectric។

ដូច្នេះហើយ សហភាពអឺរ៉ុបបាន និងកំពុងចេញគោលនយោបាយជាបន្តបន្ទាប់ ដោយមួយក្នុងចំណោមនោះគឺការប្រើប្រាស់បច្ចេកវិទ្យាដើម្បីមកគ្រប់គ្រង ថែទាំង និងសាងសង់បណ្ដាញទាំងចាស់ និងថ្មី។ ក្រុមការងារក៏បានងាកទៅប្រើប្រាស់បច្ចេកវិទ្យាឌីជីថលរបស់ក្រុមហ៊ុន Bentley Systems ពិសេសកម្មវិធី Digital Twin។

ខុសពីប្រព័ន្ធស្វ័យប្រវត្តិកម្មធម្មតាដែលគ្រាន់តែតាមដានលំហូរថាមពល កម្មវិធី Digital Twin ផ្តល់នូវគំរូនិម្មិតថ្មី ដែលមានសុក្រឹតភាពខ្ពស់ និងងាយគ្រប់គ្រង។ តាមរយៈការប្រើប្រាស់កម្មវិធី Digital Twin វិស្វករអាចធ្វើតេស្តសាកល្បងសម្ពាធ (stress tests) ព្យាករណ៍ពីតម្រូវការថែទាំ និងចែករំលែកទិន្នន័យឆ្លងកាត់ព្រំដែនក្នុងពេលជាក់ស្តែង (real-time)។

នៅក្នុងកិច្ចប្រជុំតុមូលនៃសភាអឺរ៉ុបកាលពីពេលថ្មីៗនេះ លោក Nicholas Cumins នាយកប្រតិបត្តិក្រុមហ៊ុន Bentley បានសង្កត់ធ្ងន់ថា ឧបករណ៍ឌីជីថលនឹងជួយធ្វើទំនើបកម្មលើលំហូរការងារត្រួតពិនិត្យ និងការថែទាំបានយ៉ាងមានប្រសិទ្ធភាព។ វាគឺជាមធ្យោបាយតែមួយគត់ដើម្បីបង្កើនផលិតភាពរបស់វិស្វករ ដើម្បីឆ្លើយតបនឹងគោលដៅឆ្នាំ ២០៣០។

យ៉ាងណាមិញ បញ្ហានេះមិនអាចដោះស្រាយបានដោយបច្ចេកវិទ្យាតែមួយមុខនោះទេ។ វាទាមទារឱ្យមាន “កិច្ចសហការអន្តរវិស័យ” រវាងស្ថាប័នរដ្ឋាភិបាល និងអ្នកច្នៃប្រឌិតឯកជន។

នេះក៏រួមមាន ការបញ្ចូលមជ្ឈមណ្ឌលទិន្នន័យ (data centers) ទៅក្នុងបណ្តាញអគ្គិសនី និងការប្រើប្រាស់បញ្ញាសិប្បនិម្មិត (AI) ផងដែរ ដើម្បីធានាថា នៅពេលអឺរ៉ុបបង្កើនការប្រើប្រាស់ថាមពលខ្យល់ និងពន្លឺព្រះអាទិត្យ នោះប្រជាជនទាំង ៦០០ លាននាក់នៅតែមានអគ្គិសនីប្រើប្រាស់ជាប្រចាំផងដែរ។