កម្ពុជាបើកភ្លើងខៀវឲ្យចិនសាងសង់ទីក្រុងរណបលើដីជាង ៣០០ហិកតា ក្នុងខេត្តព្រៃវែង

• 31 ខែ​ឧសភា 2018
• Uncategorized @km
• 2 មើល

ក្រុមហ៊ុនចិនមួយឈ្មោះថា Jiangxi Haihui Utility Co., Ltd. កាលពីថ្មីៗនេះបានប្រកាសគម្រោងសាងសង់ទីក្រុងរណបថ្មីមួយលើផ្ទៃដីទំហំប្រមាណ ៣០០ហិកតានៅមុខសាលាខេត្តព្រៃវែង ដែលគម្រោងនេះបានទទួលការស្វាគមន៍និងគាំទ្រពីខាងរាជរដ្ឋាភិបាលកម្ពុជារួមមកហើយ។

ការប្រកាសពីគម្រោងនេះបានធ្វើកាលពីល្ងាចថ្ងៃទី២៩ ខែឧសភា ឆ្នាំ២០១៨ កន្លងមកនេះ នៅឯទីស្តីការក្រសួងមហាផ្ទៃ ក្នុងកិច្ចប្រជុំរវាងសម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និង លោក YU HUI HUA ដែលជាប្រធានក្រុមហ៊ុន Jiangxi Haihui Utility Co., Ltd.។

លោក YU HUI HUA ប្រធានក្រុមហ៊ុន Jiangxi Haihui Utility Co., Ltd. បានថ្លែងក្នុងកិច្ចប្រជុំថា គោលបំណងចម្បងរបស់ក្រុមហ៊ុនគឺដើម្បីអភិវឌ្ឍន៍តំបន់ក្នុងខេត្តព្រៃវែងមួយនេះឲ្យក្លាយជាទីក្រុងរណបមួយដែលមានសក្តានុពលលើគ្រប់វិស័យ រួមមាន តំបន់កំសាន្ត ខុនដូ តំបន់ពាណិជ្ជកម្ម និងជាតំបន់ឧស្សាហកម្មផងដែរ។ លោកសង្ឃឹមថា តាមរយៈគម្រោងនេះនឹងជួយឲ្យព្រៃវែងក្លាយទៅជាតំបន់ដែលមានភាពទាក់ទាញអ្នកវិយោគ និងភ្ញៀវទេសចរបានច្រើនជាងមុន ដែលនេះក៏ជាការជួយជំរុញសេដ្ឋកិច្ចក្នុងតំបន់ ក៏ដូចជាជួយធ្វើឲ្យជីវភាពប្រជាជនរស់នៅក្នុងតំបន់មានភាពប្រសើរឡើងផងដែរ។

ជាការឆ្លើយតប សម្តេចក្រឡាហោម ស ខេង បានសម្តែងការស្វាគមន៍ និងគាំទ្រចំពោះគម្រោងរបស់ក្រុមហ៊ុន Jiangxi Haihui Utility Co., Ltd. ដែលមានបំណងអភិវឌ្ឍខេត្តព្រៃវែងឲ្យក្លាយជាទីក្រុងដែលមានភាពទាក់ទាញមួយលើឆាកអន្តរជាតិ។ សម្តេចក្រឡាហោម ស ខេង បានបន្តទៀតថា ប្រសិនបើគម្រោងនេះអាចលេចចេញជារូបរាងឡើងនោះ ពិតជាផ្តល់ប្រយោជន៍ជាច្រើនដល់កម្ពុជារួមមានការបង្កើតការងារដល់ប្រជាពលរដ្ឋក្នុងមូលដ្ឋានផ្ទាល់ និងធ្វើឲ្យកម្ពុជាកាន់តែមានភាពរីកចម្រើនថែមទៀតជាពិសេសលើវិស័យសំណង់។

ទន្ទឹមនឹងការគាំទ្រនេះ សម្តេចក្រឡាហោម ស ខេង ក៏បានឆ្លៀតឱកាសស្នើឱ្យក្រុមហ៊ុន Jiangxi Haihui Utility Co., Ltd ក៏ដូចជាក្រុមហ៊ុនដទៃទៀតដែលកំពុងប្រកបអាជីរកម្មក្នុងប្រទេសកម្ពុជាឲ្យគោរពតាមគោលការណ៍ច្បាប់របស់ព្រះរាជាណាចក្រកម្ពុជាយ៉ាងម៉ឺងម៉ាត់។ ការគោរពច្បាប់គឺជាការដែលធ្វើឲ្យការវិនិយោគរបស់ក្រុមហ៊ុននីមួយៗមានតម្លាភាព និងជាការផ្តល់ភាពជឿជាក់ដល់អតិថិជនរបស់ខ្លួនផងដែរ។

គួរបញ្ជាក់ផងដែរថា មិនមែនតែខេត្តព្រៃវែងនេះទេដែលកំពុងតែមានសន្ទុះនិងទាក់ទាញអ្នកវិនិយោគ កាលពីពេលថ្មីៗនេះ ក្រុមហ៊ុនចិនមួយទៀតឈ្មោះថា Prince Real Estate Group ក៏ទើបនឹងបើកការដ្ឋានសាងសង់គម្រោងមជ្ឈមណ្ឌលឧស្សាហកម្មដ៏ធំមួយឈ្មោះថា ខេម អិម ជេ ឬ Cam MJ Development Park Co., Ltd. លើផ្ទៃដីជាង ២៤ ហិកតា ស្រុកគងពិសីខេត្តកំពង់ស្ពឺផងដែរ (អានបន្ថែម) ។

• គម្រោងអភិវឌ្ឍន៍