កម្ពុជា-ម៉ាឡេស៊ី ប្តេជ្ញាពង្រឹងកិច្ចសហការលើវិស័យកសិកម្ម ដើម្បីពង្រីកទំហំពាណិជ្ជកម្មទ្វេភាគី

• 11 ខែ​តុលា 2025
• ព័ត៌មានក្នុងស្រុក
• 3 មើល

កម្ពុជា-ម៉ាឡេស៊ី ប្តេជ្ញារួមគ្នាបន្តពង្រឹងកិច្ចសហប្រតិបតិ្តការលើវិស័យកសិកម្ម ដើម្បីពង្រីកទំហំកសិ-ពាណិជ្ជកម្មទ្វេភាគីកាន់តែខ្លាំងថែមទៀត។

នេះបើយោងតាមជំនួបពិភាក្សារវាងឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជាមួយ ឯកឧត្តម Datuk Dr. Abdul Rahman Junaidiអនុរដ្ឋមន្រ្តីក្នុងខុទ្ទកាល័យនាយករដ្ឋមន្ត្រីនៃរដ្ឋសារ៉ាវ៉ាក់ ប្រទេសម៉ាឡេស៊ី នៅថ្ងៃទី៦ ខែតុលា ឆ្នាំ២០២៥។

ក្នុងកិច្ចពិភាក្សានោះ រដ្ឋមន្ត្រីកម្ពុជា និងអនុរដ្ឋមន្ត្រីម៉ាឡេស៊ី បានប្តេជ្ញាបន្តពង្រឹងកិច្ចសហប្រតិបតិ្តការលើវិស័យកសិកម្ម ធានានូវសន្តិសុខស្បៀង ជំរុញទំហំកសិ-ពាណិជ្ជកម្ម ជាពិសេសលើវិស័យស្រូវអង្ករ និងភាពជាដៃគូដ៏រឹងមាំយូរអង្វែងក្នុងការតភ្ជាប់ខ្សែច្រវាក់តម្លៃ និងផលិតកម្ម។ ទន្ទឹមគ្នានេះ ភាគីកម្ពុជា ប្រកាសត្រៀមខ្លួនរួចជាស្រេចក្នុងការផ្គត់ផ្គង់កសិផលដល់ប្រទេសម៉ាឡេស៊ី និងគាំទ្រវិនិយោគិនម៉ាឡេស៊ីក្នុងវិស័យកសិកម្មកម្ពុជាផងដែរ។

បន្ថែមពីនេះ ឯកឧត្តម ឌិត ទីណា ក៏បានស្វាគមន៍ក្នុងការពង្រឹងកិច្ចសហប្រតិបត្តិការក្នុងវិស័យកសិកម្មកម្ពុជា ជាពិសេសការដោះដូរបច្ចេកទេសដាំដុះនិងលទ្ធភាពបើកទីផ្សារនាំចូលស្រូវអង្ករ ផលិតផលសាច់ និងកសិផលមានសក្ដានុពលដទៃទៀតពីកម្ពុជា ដើម្បីធានាសន្តិសុខស្បៀងរដ្ឋសារ៉ាវ៉ាក់។ ឯកឧត្តម ក៏បានរំលេចអំពីឱកាសវិនិយោគលើវិស័យកែច្នៃ វេចខ្ចប់ និងនាំចេញកសិផលរបស់កម្ពុជា ដែលផ្ដល់ផលប្រយោជន៍សម្រាប់ប្រជាជននៃភាគីទាំងពីរថែមទៀត។

កាលពីពេលថ្មីៗនេះ សភាពាណិជ្ជកម្មកម្ពុជា ធ្លាប់បានគូសបញ្ជាក់អំពី​ទំនាក់ទំនង​សេដ្ឋកិច្ចដ៏រឹងមាំរវាងប្រទេសកម្ពុជា-ម៉ាឡេស៊ី។ ជាក់ស្តែង​នៅឆ្នាំ ២០២៤ ទំហំពាណិជ្ជកម្មទ្វេភាគីរវាងកម្ពុជា និងម៉ាឡេស៊ី ​សម្រេច​បាន​ប្រមាណ ៨៥៩ លាន​ដុល្លារ​អាមេរិក៕