ក្រុមហ៊ុនធំៗចាប់ផ្តើមសម្រុកមកដំឡើងមជ្ឈមណ្ឌលបច្ចេកវិទ្យា AI និងស្ថានីយផ្ទុកទិន្នន័យខ្លៅដ៍ (Cloud) នៅម៉ាឡេស៊ី ឥណ្ឌូនេស៊ី សិង្ហបុរី និងថៃ
ក្រុមហ៊ុន Google នឹងវិនិយោគ ២ ពាន់លានដុល្លារ ដើម្បីអភិវឌ្ឍមជ្ឈមណ្ឌលទិន្នន័យដំបូងរបស់ខ្លួន និងដំឡើងប្រព័ន្ធគ្រប់គ្រងទិន្នន័យ Google Cloud នៅក្នុងប្រទេសម៉ាឡេស៊ី ដែលជាការពង្រីកវិសាលភាពទីផ្សាររបស់ខ្លួនដ៏សំខាន់មួយទៅកាន់តំបន់អាស៊ីអាគ្នេយ៍។ ការវិនិយោគដ៏ច្រើនសន្ធឹកសន្ធាប់នេះ មានគោលបំណងជំរុញមហិច្ឆតាឌីជីថលរបស់ប្រទេសម៉ាឡេស៊ី តាមរយៈការប្រើបច្ចេកវិទ្យាបញ្ញាសិប្បនិម្មិត (AI) និងបច្ចេកវិទ្យាទំនើបសម័យឌីជីថលផ្សេងទៀត ដើម្បីលើកកំពស់ឧស្សាហកម្មម៉ាឡេស៊ីក្នុងស្រុកនានា ឱ្យកាន់តែមានឥទ្ធិពលនៅក្នុងខ្សែច្រវាក់ផ្គត់ផ្គង់សកល។ ការប្រកាសរបស់ក្រុមហ៊ុននេះ ធ្វើឡើងនៅថ្ងៃទី២២ ខែឧសភា ឆ្នាំ២០២៤។
មជ្ឈមណ្ឌលទិន្នន័យ និងប្រព័ន្ធផ្ទុកទិន្នន័យខ្លៅដ៍ (Cloud)ថ្មី នឹងមានទីតាំងនៅក្នុងសួនពាណិជ្ជកម្មឈ្មោះ Elmina របស់ក្រុមហ៊ុន Sime Darby Property ក្នុងទីក្រុង Selangor ។ គ្រឿងបរិក្ខារទាំងនេះ នឹងផ្តល់ថាមពលដល់ការដាក់ឱ្យប្រតិបត្តិការនូវសេវាកម្ម Google ផ្សេងៗ ដូចជាការស្វែងរកព័ត៌មានទូទៅ ការប្រើប្រាស់ផែនទីឌីជីថល និងកន្លែងធ្វើការ ព្រមជាមួយនឹងការផ្តល់សេវាកម្ម AI និងដំណោះស្រាយលើប្រព័ន្ធផ្ទុកទិន្នន័យខ្លៅដ៍ (Cloud)ដល់អាជីវកម្មក្នុងស្រុក និងស្ថាប័នសាធារណៈ។
លោក Ruth Porat ប្រធានផ្នែកហិរញ្ញវត្ថុរបស់ក្រុមហ៊ុន Google បាននិយាយថា “ប្រទេសម៉ាឡេស៊ី និងក្រុមហ៊ុន Google កំពុងសហការគ្នាក្នុងការជំរុញការងាររួមគ្នារបស់យើង ដើម្បីបង្កើតប្រព័ន្ធអេកូឡូស៊ីគាំទ្រសម្រាប់ការច្នៃប្រតិដ្ឋ និងទាញយកមកប្រើប្រាស់នូវសក្តានុពលនៃបរិវត្តកម្មឌីជីថល”។
កាលពីខែវិច្ឆិកាឆ្នាំមុន រដ្ឋាភិបាលម៉ាឡេស៊ី និងក្រុមហ៊ុន Google បានផ្តួចផ្តើមកិច្ចសហការដើម្បីពន្លឿនការបង្កើតថ្មីក្នុងស្រុក។ រដ្ឋាភិបាលម៉ាឡេស៊ីបានសម្តែងចំណាប់អារម្មណ៍ថា ការអភិវឌ្ឍន៍នេះស្របតាមចក្ខុវិស័យរបស់ខ្លួនដែលចង់ប្រែក្លាយជាប្រទេសជឿនលឿនដែលមានចរន្តសេដ្ឋកិច្ចគាំទ្រដោយប្រព័ន្ធឌីជីថល។
ថ្មីៗនេះ ប្រទេសអាស៊ីអាគ្នេយ៍ដែលមានប្រជាជនយល់ដឹងផ្នែកបច្ចេកវិទ្យាចំនួន ៦៧០ លាននាក់ នៅតែបន្តទាក់ទាញការវិនិយោគសំខាន់ៗពីក្រុមហ៊ុនបច្ចេកវិទ្យាយក្សលំដាប់ពិភពលោក។ ជាឧទាហរណ៍ នាយកប្រតិបត្តិក្រុមហ៊ុន Microsoft លោក Satya Nadella ថ្មីៗនេះ ក៏បានប្រកាសថានឹងវិនិយោគថវិកាប្រមាណ $២,២ ពាន់លាន ក្នុងការដំឡើងស្ថានីយផ្ទុកទិន្នន័យខ្លៅដ៍ នៅក្នុងប្រទេសម៉ាឡេស៊ីមួយកន្លែង និងមួយកន្លែងទៀត នៅក្នុងប្រទេសឥណ្ឌូនេស៊ី ដែលត្រូវចាយទុនវិនិយោគប្រមាណ $១,៧ ពាន់លានផងដែរ។
លើសពីនេះទៀតអង្គភាពផលិតឧបករណ៍បច្ចេកវិទ្យាឌីជីថលរបស់ក្រុមហ៊ុន YTL ដែលជាក្រុមហ៊ុនសាជីវកម្មម៉ាឡេស៊ី ក៏ទើបនឹងបានចាប់ដៃគូជាមួយក្រុមហ៊ុន Nvidia ដើម្បីបង្កើតហេដ្ឋារចនាសម្ព័ន្ធ AI ថ្មី ជាមួយនឹងគម្រោងវិនិយោគតម្លៃ $៤,៣ ពាន់លាន។ ចំណែកឯ ក្រុមហ៊ុន Amazon ក៏បានបង្ហាញពីផែនការវិនិយោគជាច្រើននៅក្នុងតំបន់អាស៊ីអាគ្នេយ៍នេះផងដែរ រួមមានគម្រោងវិនិយោគខ្ទង់ $៩ពាន់លាន នៅសិង្ហបុរី និង $៥ ពាន់លាន នៅប្រទេសថៃ និង $៦ពាន់លាន ផ្សេងទៀត នៅក្នុងប្រទេសម៉ាឡេស៊ីផងដែរ។
លំហូរនៃនិន្នាការវិនិយោគថ្មីពីក្រុមហ៊ុនបច្ចេកវិទ្យាឈានមុខគេលើបច្ចេកវិទ្យាបញ្ហាសិប្បនិម្មិត និងប្រព័ន្ធគ្រប់គ្រងទិន្នន័យឌីជីថលនេះ បានគូសបញ្ជាក់ពីសារៈសំខាន់ដែលកំពុងកើនឡើងរបស់អាស៊ីអាគ្នេយ៍ ដែលនឹងប្រែក្លាយជាមជ្ឈមណ្ឌលសម្រាប់ការច្នៃប្រតិដ្ឋបច្ចេកវិទ្យា AI និងការផ្លាស់ប្តូរទីផ្សារផ្គង់ផ្គង់ឌីជីថលសម្រាប់ពិភពលោកក្នុងពេលដ៏ខ្លីខាងមុខ៕
- Video Advertisement -
English 
ខ្មែរ 
