គម្រោងកសាងផ្លូវក្រវាត់ព្រំដែន ក្នុងខេត្តមណ្ឌលគិរី និងរតនគីរី សម្រេចបានជាង ៧២%

webmaster@construction-property.com
9 ខែកុម្ភៈ 2026
ព័ត៌មានសំណង់
1405 មើល

គម្រោងកសាងផ្លូវក្រវាត់ព្រំដែន ដែលអនុវត្តដោយប្រើប្រាស់មូលនិធិកសាងហេដ្ឋារចនាសម្ព័ន្ធតាមព្រំដែន បានសម្រេចវឌ្ឍនភាពសរុបប្រមាណ ៧២,២៩% ក្នុងរយៈពេលប្រមាណ ១៣ ខែ គិតចាប់ពីខែធ្នូ ឆ្នាំ២០២៤ មកដល់ថ្ងៃទី១១ ខែមករា ឆ្នាំ២០២៦។

តាមសេចក្តីប្រកាសព័ត៌មាន ចេញផ្សាយនៅថ្ងៃទី០២ ខែកុម្ភៈ ឆ្នាំ២០២៦ ក្រុមការងារចំពោះកិច្ចគ្រប់គ្រងមូលនិធិកសាងហេដ្ឋារចនាសម្ព័ន្ធតាមព្រំដែន បានឱ្យដឹងថា៖ «វឌ្ឍនភាពនៃដំណើរការកសាងផ្លូវព្រំដែននៅក្នុងរយៈពេលប្រមាណ ១៣ខែ កន្លងមកនេះ ក្រុមការងារចំពោះកិច្ច បានឈូសព្រៃទទឹង ៥ ម៉ែត្រ បានប្រវែង ២៤១,៦០ គីឡូម៉ែត្រ សម្រាប់រកផ្លូវខ្សែដំបូង ឈូសផ្លូវទទឹង ២០ ម៉ែត្រ បានប្រវែង ២១៧,៣០ គីឡូម៉ែត្រ សម្រាប់រកអ័ក្សផ្លូវ លុបជ្រលង-អូរ បន្ទាបចំណោតភ្នំ និងធ្វើប្រឡាយប្រវែង ១៨៩,៨ គីឡូម៉ែត្រ ចិតជញ្ជាំងភ្នំ ធ្វើប្រឡាយបង្ហូរទឹកភ្លៀង កសាងនូវទំនប់សុវត្ថិភាព និងកសាងតួផ្លូវសម្រេចបានប្រវែង ១៨៩,៣ គីឡូម៉ែត្រ និងចាក់ក្រាលល្បាយកម្ទេចថ្ម-កិនបង្ហាប់បាន ប្រវែង ១២០,២០ គីឡូម៉ែត្រ»។

ជាលទ្ធផលរួមនៃដំណើរការកសាងផ្លូវក្រវាត់ព្រំដែននេះ គឺសម្រេចបាន ប្រមាណ ៧២,២៩% នៃផែនការរួម ក្នុងនោះ ខេត្តមណ្ឌលគិរី សម្រេចបាន ៩១,២% និងខេត្តរតនគិរី សម្រេចបាន ៥១,៨១%។

សេចក្តីប្រកាសដដែល បានបញ្ជាក់ដែរថា ក្រុមការងារនឹងបន្តជំរុញការងារកសាងផ្លូវ និងសំណង់មុខទឹកក្នុងខេត្តមណ្ឌលគិរី ឱ្យសម្រេចបានជាស្ថាពរ ១០០% យ៉ាងយូរត្រឹមខែមីនា ឆ្នាំ២០២៦ ខាងមុខ ខណៈការងារនៅខេត្តរតនគិរី នឹងត្រូវពន្លឿនបន្ថែម ដោយផ្តោតលើតំបន់មានភូមិសាស្ត្រលំបាក។

សូមជម្រាបដែរថា គម្រោងកសាងផ្លូវក្រវាត់ព្រំដែន ត្រូវបានចាត់ទុកថា មានសារៈសំខាន់ក្នុងការកែលម្អការតភ្ជាប់ តំបន់ព្រំដែន បង្កើនសុវត្ថិភាព និងជំរុញការអភិវឌ្ឍសេដ្ឋកិច្ច-សង្គម នៅតំបន់ឆ្ងាយ ដោយរួមបញ្ចូលទាំងការដោះស្រាយរាវរកគ្រាប់មីន ដែលនៅតែជាបញ្ហាសំខាន់សម្រាប់ការអភិវឌ្ឍរយៈពេលវែង៕ (អានបន្ថែម)

- Video Advertisement -