ក្រុមហ៊ុនអូស្រ្តាលី ចង់មកបង្កើតរោងចក្រ និងនាំពូជស្រូវ Japonica មកកម្ពុជា

• 27 ខែ​សីហា 2025
• ព័ត៌មានក្នុងស្រុក
• 4 មើល

SunRice Group គឺជាក្រុមហ៊ុននាំចេញអង្ករឈានមុខគេនៅប្រទេសអូស្រ្តាលី បង្ហាញបំណងចង់វិនិយោគបង្កើតរោងចក្រនៅកម្ពុជា ព្រមទាំងបានណែនាំពូជស្រូវពិសេសគឺ Japonica ទៅកាន់ទីផ្សារកម្ពុជាផងដែរ។

នេះបើយោងតាមជំនួបពិភាក្សារវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា ជាមួយលោក Paul Serra នាយកប្រតិបត្តិក្រុមហ៊ុន SunRice Group នាទីក្រុងស៊ីដនី​ ប្រទេសអូស្ត្រាលី នៅថ្ងៃទី២៥ ខែសីហា ឆ្នាំ២០២៥។

នាឱកាសនោះ លោកនាយកប្រតិបត្តិក្រុមហ៊ុន SunRice Group បានបង្ហាញចំណាប់អារម្មណ៍ក្នុងការធ្វើទស្សនកិច្ចមកកាន់ប្រទេសកម្ពុជា ដើម្បីពិនិត្យលទ្ធភាពបណ្តាក់ទុនវិនិយោគបង្កើតរោងចក្រ និងនាំយកពូជ ព្រមទាំងបច្ចេកវិទ្យាបង្កបង្កើនផលស្រូវ Japonica មកប្រទេសកម្ពុជា។

ជាមួយគ្នានេះ លោកឧបនាយករដ្ឋមន្ត្រី បានលើកឡើងពីបច្ចុប្បន្នភាពនៃបរិយាកាសវិនិយោគនៅកម្ពុជា ក៏ដូចជាសក្តានុពលនានាដែលកម្ពុជាមានស័ក្តិសមសម្រាប់ការជ្រើសរើសជាគោលដៅវិនិយោគក្នុងបរិការណ៍ពិភពលោកនាពេលបច្ចុប្បន្ន និងវឌ្ឍនភាពថ្មីៗនៃការអភិវឌ្ឍហេដ្ឋារចនាសម្ព័ន្ធដឹកជញ្ជូន និងថាមពលនៅក្នុងប្រទេសកម្ពុជាដែលកាន់តែផ្ដល់ភាពងាយស្រួលដល់ការធ្វើប្រតិបត្តិការពាណិជ្ជកម្ម។

គួរបញ្ជាក់ថា ក្រុមហ៊ុន SunRice Group គឺជាក្រុមហ៊ុនកែច្នៃផលិតផលចំណីអាហារ និងអង្ករមួយក្នុងចំណោមក្រុមហ៊ុនធំៗនៅលើពិភពលោក ដែលមានដើមកំណើតនៅប្រទេសអូស្ត្រាលីតាំងពីឆ្នាំ១៩៥០ ហើយបច្ចុប្បន្នក្រុមហ៊ុនបានពង្រីកប្រតិបត្តិការរបស់ខ្លួនទៅកាន់ប្រទេសជាច្រើននៅជុំវិញពិភពលោក។ក្រុមហ៊ុន SunRice Group ត្រូវបានគេស្គាល់ថា គឺជាក្រុមហ៊ុនអូស្ត្រាលីដំបូងគេ ដែលបាននាំចេញអង្ករពីកម្ពុជាទៅកាន់ទីផ្សារអូស្ត្រាលី និងនូវែលហ្សេឡង់ផងដែរ។

ការ​វិនិយោគ​ដែល​បាន​ស្នើ​ឡើង​នេះ​អាច​ពង្រឹង​ចំណង​មិត្តភាព​រវាង​ប្រទេស​ទាំង​ពីរ​បន្ថែម​ទៀត និង​ជំរុញ​ជំហរ​របស់​កម្ពុជា​ក្នុង​ទីផ្សារ​អង្ករ​ពិភពលោក។

នៅពេលដែលការពិភាក្សាបន្ត សហគមន៍កសិកម្មមានសុទិដ្ឋិនិយមអំពីទស្សនវិស័យនៃការកើនឡើងនៃការវិនិយោគ ការច្នៃប្រឌិត និងការរីកចម្រើននៅក្នុងវិស័យស្រូវអង្កររបស់កម្ពុជា៕