ក្រុមហ៊ុន MOMO FARM ត្រូវការដី ១ម៉ឺនហិកតា នៅមណ្ឌលគិរី ដើម្បីចិញ្ចឹមគោយកទឹកដោះ

• Sommana Yan
• 19 ខែ​មករា 2023
• Uncategorized @km
• 399 មើល

ក្រុមហ៊ុនផលិតទឹកដោះគោ MOMO FARM ត្រូវការដីចំនួន ១ម៉ឺនហិកតានៅខេត្តមណ្ឌលគិរី ដើម្បីចិញ្ចឹមគោយកទឹកដោះ និងដំណើរការផលិតកម្មរបស់ខ្លួន។ នេះបើតាមជំនួបរវាងឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងក្រុមហ៊ុន MOMO FARM កាលពីថ្ងៃទី១៨ ខែមករា ឆ្នាំ២០២៣។

ក្រុមហ៊ុនខាងលើ មានបំណងធ្វើការពង្រីកអាជីវកម្មរបស់ខ្លួនបន្ថែមទៀត ដើម្បីឆ្លើយតបនឹងតម្រូវការទីផ្សារទឹកដោះគោស្រស់ក្នុងស្រុក ខណៈក្រុមហ៊ុននេះ មានសមត្ថភាពផលិតទឹកដោះគោស្រស់ប្រមាណ ២ពាន់លីត្រ ក្នុងមួយថ្ងៃ​។

ជាការឆ្លើយតប ឯកឧត្តមរដ្ឋមន្ត្រី បានសន្យានឹងជួយសម្របសម្រួលជំរុញការពង្រីកផលិតកម្មគោយកទឹកដោះ។

ចំពោះបញ្ហាដីសម្រាប់ដំណើរការផលិតកម្ម ឯកឧត្តមរដ្ឋមន្ត្រី បញ្ជាក់ថា បច្ចុប្បន្ននេះ ក្រសួងមិនមានការផ្តល់ដីសម្បទានជូនក្រុមហ៊ុនឯកជនទៀតទេ ស្របតាមសេចក្តីសម្រេចរបស់រាជរដ្ឋាភិបាលកាលពីឆ្នាំ២០១២។

បន្ថែមពីនេះ ឯកឧត្តមរដ្ឋមន្ត្រី បានផ្តល់អនុសាសន៍ឱ្យក្រុមហ៊ុនធ្វើកិច្ចសន្យាជាមួយពលរដ្ឋដែលមានដីសម្រាប់ធ្វើការដាំស្មៅសម្រាប់ជាចំណីសត្វ។

គួរបញ្ជាក់ថា បរិមាណគោយកទឹកដោះទូទាំងប្រទេសកម្ពុជា មានប្រមាណត្រឹម ១០០០ក្បាលប៉ុណ្ណោះ។