គម្រោងសង់ប្រឡាយដោះទឹក នៃប្រព័ន្ធធារាសាស្រ្តវ៉ៃគោ ក្នុងខេត្តស្វាយរៀង សម្រេចបាន ៨០%

16 ខែកុម្ភៈ 2024
Uncategorized
9 មើល

គម្រោងសាងសង់ប្រឡាយរំដោះទឹក ទំនប់សណ្ដ និងសំណង់សិល្បការ នៃប្រព័ន្ធធារាសាស្រ្តវ៉ៃគោ ជំហាន២ (អាងទឹកកំពង់ជ្រៃ) ស្ថិតនៅក្នុងភូមិសាស្រ្តខេត្តស្វាយរៀង សម្រេចបាន ៨០% ហើយ។ នេះបើតាមឯកឧត្តម តន់ វ៉ាន់ថារ៉ា រដ្ឋលេខាធិការក្រសួងធនធានទឹក និងឧតុនិយម បានដឹកនាំក្រុមការងារចុះពិនិត្យជាក់ស្តែងការងាររអន្តរាគមន៍កាយប្រឡាយបូមទឹកសង្គ្រោះស្រូវប្រាំង និងពិនិត្យវឌ្ឍនភាពគម្រោងសាងសង់នេះ កាលពីថ្ងៃទី០៥ ខែកុម្ភៈ ឆ្នាំ២០២៤។

បើតាមសេចក្តីរាយការណ៍របស់លោកប្រធានមន្ទីរធនធានទឹក និងឧតុនិយមខេត្តស្វាយរៀងបានឱ្យដឹងថា ការអនុវត្តស្រូវប្រាំងក្នុងឆ្នាំ២០២៣-២០២៤ គិតត្រឹមថ្ងៃទី០៥ ខែកុម្ភៈ ឆ្នាំ២០២៤ របស់ប្រជាកសិករមានចំនួន ២៨.៧៤០ហិកតា ស្មើនឹង ១៤០,២០% លើសផែនការដែលបានគ្រោងទុក។

ជាមួយគ្នានេះ ក្រុមការងារ បានចុះពិនិត្យការងារអនុវត្តស្រូវប្រាំងរួមមានចំនួន ៣ទីតាំង ដូចខាងក្រោម៖

ការបូមទឹកពីអាងទឹកកីចក បញ្ចូលតាមប្រឡាយមេកីចក និងចែកចាយទឹកតាមប្រឡាយរង ដើម្បីជួយសង្គ្រោះស្រូវប្រាំងចំនួន ១.៦៩០ហិកតា ស្ថិតនៅឃុំជ្រៃធំ ឃុំមុខដា និងឃុំត្រពាំងស្ដៅ ស្រុករមាសហែក
ការបូមនាំទឹកពីអាងទឹកវ៉ៃគោ បញ្ចូលតាមប្រឡាយមេកីចក និងចែកចាយទឹកតាមប្រឡាយរង ដើម្បីជួយសង្គ្រោះស្រូវប្រាំងចំនួន ៤៤០ហិកតា ស្ថិតនៅឃុំម៉ឺនជ័យ និងឃុំធ្មា ស្រុករំដួល
ការងារកាយប្រឡាយមេក្រាំងលាវ ប្រវែង ២.២៥០ម៉ែត្រ ដើម្បីនាំទឹកពីព្រែកព្រំដែនកម្ពុជាវៀតណាម ជួយសង្គ្រោះស្រូវប្រាំង ចំនួន ២៨០ហិកតា ស្ថិតនៅឃុំស្វាយធំ ស្រុកស្វាយជ្រំ។

បន្ទាប់មក ក្រុមការងារ បានចុះពិនិត្យមើលគម្រោងប្រឡាយដោះទឹក និងសំណង់សិល្បការនានា នៃប្រព័ន្ធធារាសាស្រ្តវ៉ៃគោ ជំហាន២ (អាងទឹកកំពង់ជ្រៃ) ដែលគម្រោងសម្រេចបាន ៨០% ហើយ គ្រោងនឹងបញ្ចប់នៅចុងខែកុម្ភៈ ឆ្នាំ២០២៤ ខាងមុខនេះ។

គួរបញ្ជាក់ថា គម្រោងអភិវឌ្ឍន៍ប្រព័ន្ធស្រោចស្រពវ៉ៃគោជំហានទី២ (អាងទឹកកំពង់ជ្រៃ) ចាប់ផ្តើមក្នុងឆ្នាំ២០១៧ និងបញ្ចប់ក្នុងឆ្នាំ២០២១ ស្ថិតនៅតំបន់ប្រសព្វរវាងខាងកើតខេត្តព្រៃវែង និងខាងលិចខេត្តស្វាយរៀង មានផ្ទៃរងទឹក ៧៩៥.០០០គីឡូម៉ែត្រការ៉េ មានលទ្ធភាពផ្គត់ផ្គង់ទឹកស្រោចស្រពបានទំហំ ៩៣.១០០ហិកតានៅរដូវវស្សា និង ២៣.៣០០ហិកតានៅរដូវប្រាំង។ (អានបន្ថែម)