ពិភពលោកត្រូវការថវិកាយ៉ាងតិច ២០០ពាន់លានដុល្លារក្នុងមួយឆ្នាំ ដើម្បីការពារជីវៈចម្រុះសកល

• 27 ខែ​ធ្នូ 2022
• ព័ត៌មានក្នុងស្រុក
• 6 មើល

រដ្ឋទាំង១៩៦ជាភាគីនៃអនុសញ្ញាសហប្រជាជាតិស្តីពីជីវៈចម្រុះ បានឯកភាពក្នុងការគៀងគរថវិកាយ៉ាងតិចចំនួន  ២០០ពាន់លានដុល្លារសហរដ្ឋអាមេរិកក្នុងមួយឆ្នាំពីគ្រប់ប្រភពទាំងវិស័យរដ្ឋ និងឯកជន ដើម្បីការពារជីវៈចម្រុះសកល។ នេះបើតាមសន្និសីទកំពូលសហប្រជាជាតិស្តីពីជីវៈចម្រុះ នៅថ្ងៃទី៧ ដល់ថ្ងៃទី១៩ ខែធ្នូ ឆ្នាំ២០២២ នៅទីក្រុងម៉ុងរ៉េអាល់ ប្រទេសកាណាដា។

រដ្ឋជាភាគី បានឯកភាពលើការបង្កើនលំហូរហិរញ្ញវត្ថុអន្តរជាតិពីប្រទេសអភិវឌ្ឍន៍ និងកំពុងអភិវឌ្ឍន៍ ជាពិសេស ប្រទេសអភិវឌ្ឍន៍តិចតួច ប្រទេសកោះតូចៗ យ៉ាងតិចឱ្យបាន ២០ពាន់លានដុល្លារ ត្រឹមឆ្នាំ២០២៥ និងយ៉ាងតិច ៣០ពាន់លានដុល្លារ ក្នុងមួយឆ្នាំ នៅត្រឹមឆ្នាំ២០៣០។

ថវិកាដែលគៀងគរទាំងនេះ នឹងយកទៅអនុវត្តលើក្របខ័ណ្ឌការងារជីវៈចម្រុះសកល គួនមីង-ម៉ុងរ៉េអាល់ (Kunming​-Montreal Global Biodiversity Framework) ដែលបានអនុម័តសន្និសីទកំពូលខាងលើ និងមានគោលដៅធំៗចំនួន៤ និងចំណុចដៅចំនួន ២៣ ដែលរដ្ឋជាភាគីចំនួន ១៩៦ប្រទេសនៃអនុសញ្ញានេះ ត្រូវអនុវត្ត និងសម្រេច​ឱ្យបានត្រឹមឆ្នាំ២០៣០។

បន្ថែមពីនេះ រដ្ឋភាគីទាំងអស់ ត្រូវខិតខំប្រឹងប្រែងកម្រិតសកល ដើម្បីការពារតំបន់ដីគោក ផ្ទៃទឹកសាប តំបន់ឆ្នេរសមុទ្រ និងមហាសមុទ្រចំនួន៣០% នៅលើពិភពលោក ត្រឹមឆ្នាំ២០៣០ ដែលបច្ចុប្បន្ននេះ តំបន់ដីគោកត្រឹមតែ ១៧% និងតំបន់សមុទ្រត្រឹមតែ ១០% ប៉ុណ្ណោះត្រូវបានការពារ។

ចំពោះភាគីកម្ពុជាវិញ ក៏នឹងរៀបចំធ្វើបច្ចុប្បន្នភាពយុទ្ធសាស្ត្រ និងផែនការសកម្មភាពជាតិស្តីពីជីវៈចម្រុះរបស់ខ្លួន (NBSAP) ដើម្បីកំណត់នូវអាទិភាពរបស់ខ្លួន និងបន្ស៊ីសកម្មភាពនានាដែលត្រូវអនុវត្តឱ្យស្របទៅនឹងក្របខ័ណ្ឌការងារជីវៈចម្រុះសកល គួនមីង-ម៉ុងរ៉េអាល់ សំដៅសម្រេចបាន តាមគោលដៅនិងចំណុចដៅជាសកលដែលបានឯកភាពគ្នាត្រឹមឆ្នាំ២០៣០ ខាងមុខនេះ។

ដោយឡែក ក្រៅពីការពារជីវៈចម្រុះ កម្ពុជាត្រូវការហិរញ្ញប្បទានប្រមាណ ៥០០លានដុល្លារ រហូតដល់ជិត ២ពាន់លានដុល្លារអាមេរិកក្នុងមួយឆ្នំា នៅឆ្នំា២០៥០ សម្រាប់អនុវត្តផែនការយុទ្ធសាស្រ្តមួយចំនួន ដើម្បីកាត់បន្ថយការបញ្ចេញឧស្ម័នផ្ទះកញ្ចក់ផងដែរ។ (អានបន្ថែម)

• Energy and Environment