ក្រុមហ៊ុនធំចំនួន២ គ្រោងកែច្នៃសំរាមតាមផ្ទះទៅជាថាមពលអគ្គិសនី សម្រាប់ផ្គត់ផ្គង់នៅក្រុងភ្នំពេញ

• Sommana Yan
• 23 ខែ​កញ្ញា 2025
• ព័ត៌មានក្នុងស្រុក
• 217 មើល

ក្រុមហ៊ុនធំចំនួន២ គឺក្រុមហ៊ុន SAGE ENGINEERING និងក្រុមហ៊ុន VINCI CONSTRUCTION បង្ហាញពីផែនការចង់កែច្នៃសំរាមតាមផ្ទះ ទៅជាថាមពលអគ្គិសនី នៅរាជធានីភ្នំពេញ ដើម្បីជំរុញការប្រើប្រាស់វិស័យថាមពលកាន់តែប្រសើរ។

នេះបើយោងតាមជំនួបពិភាក្សាការងារ រវាងឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា ជាមួយលោកស្រី Claire HINCHLIFFE តំណាងគណៈប្រតិភូក្រុមហ៊ុន VINCI CONSTRUCTION តំណាងដោយលោក Othmane DFAILI តំណាងក្រុមហ៊ុន SAGE ENGINEERING នៅថ្ងៃទី១៨ ខែកញ្ញា ឆ្នាំ២០២៥។

នាឱកាសនោះ តំណាងប្រតិភូក្រុមហ៊ុនទាំងពីរ បានធ្វើបទបង្ហាញអំពីការសិក្សាសមិទ្ធិលទ្ធភាពនៃគម្រោងវិនិយោគកែច្នៃសំរាមតាមផ្ទះ (household waste) ទៅជាថាមពលអគ្គិសនី នៅរាជធានីភ្នំពេញ ក្រោមកិច្ចសហការរវាងក្រុមហ៊ុន SAGE ENGINEERING និងក្រុមហ៊ុន VINCI CONSTRUCTION ដែលការសិក្សានេះបានចំណាយពេលវេលាអស់រយៈពេលប្រមាណ ១ឆ្នាំ។ ដោយតំណាងក្រុមហ៊ុន បញ្ជាក់ពី គោលបំណងនៃការជួបពិភាក្សានេះគឺដើម្បីស្នើសុំមតិយោបល់បន្ថែមពីក្រុមប្រឹក្សាអភិវឌ្ឍន៍កម្ពុជា គាំទ្រដល់គម្រោងវិនិយោគនេះ។

ជាការឆ្លើយតប ឯកឧត្តម ជា វុទ្ធី បានស្វាគមន៍គម្រោងវិនិយោគកែច្នៃសំរាមទៅជាថាមពលអគ្គិសនីរបស់ក្រុមហ៊ុន។ ឯកឧត្តម បានណែនាំឱ្យក្រុមហ៊ុនសហការជាមួយក្រសួង ស្ថាប័នមានសមត្ថកិច្ច ពិសេស ក្រសួងរ៉ែ និងថាមពល ក្រសួងបរិស្ថាន និងរដ្ឋបាលរាជធានីភ្នំពេញ ជាមុនសិន ដើម្បីទទួលបានការគាំទ្រ និងការអនុញ្ញាតនានាតាមនីតិវិធីជាធរមាន។

គួររំលឹកថា ក្រសួងបរិស្ថានបានជំរុញអ្នកវិនិយោគបង្កើតរោងចក្រកែច្នៃសំរាមបន្ថែមទៀតនៅទូទាំងប្រទេសកម្ពុជា ដោយទទួលស្គាល់ថាបច្ចុប្បន្នប្រទេសមួយនេះបង្កើតកាកសំណល់ជាង ៤លានតោនក្នុងមួយឆ្នាំៗ។ ក្រសួងជឿថាការបង្កើនកិច្ចខិតខំប្រឹងប្រែងកែច្នៃឡើងវិញនឹងដើរតួយ៉ាងសំខាន់ក្នុងការកាត់បន្ថយផលប៉ះពាល់បរិស្ថាន និងការពារធនធានរបស់ភពផែនដីសម្រាប់មនុស្សជំនាន់ក្រោយ៕ (អានបន្ថែម)

• Energy and Environment