បារាំងបង្ហើបគម្រោងវារីអគ្គិសនី ៨០០មេហ្កាវ៉ាត់ និងគម្រោងដុតសំរាមនៅភ្នំពេញទៅជាអគ្គិសនី

Proeksa Meas
21 ខែកក្កដា 2026
ព័ត៌មានសំណង់
473 មើល

ក្រុមហ៊ុនបារាំង បានបង្ហើបពីការសិក្សាគម្រោងវិនិយោគបង្កើតវារីអគ្គិសនីកម្លាំង ៨០០មេហ្កាវ៉ាត់ និងគម្រោងដុតនៅរាជធានីភ្នំពេញ ទៅជាថាមពលអគ្គិសនី។ គម្រោងទាំងនេះត្រូវបានលើកឡើងដោយលោក Nicolas Forissier រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេសបារាំង ទទួលបន្ទុកពាណិជ្ជកម្មបរទេស និងការទាក់ទាញវិនិយោគ ក្នុងជំនួបជាមួយឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល នាថ្ងៃទី៩ ខែកក្កដា ឆ្នាំ២០២៦។

នាឱកាសនោះ លោករដ្ឋមន្ត្រីប្រតិភូបារាំង Nicolas Forissier លើកឡើងថា “គ្មានថាមពល គ្មានសេដ្ឋកិច្ច” ខណៈលោកបានបង្ហើបពីគម្រោងវារីអគ្គិសនី ៨០០មេហ្កាវ៉ាត់ និងគម្រោងដុតសម្រាមនៅរាជធានីភ្នំពេញទៅជាអគ្គិសនីដែលក្រុមហ៊ុនបារាំងកំពុងសិក្សាដើម្បីវិនិយោគ។

តាមរយៈជំនួបខាងលើនេះដែរ ឯកឧត្តម កែវ រតនៈ និងលោក Nicolas Forissier ក៏បានពិភាក្សាអំពីសហប្រតិបត្តិការផ្នែកប្រេងនិងឧស្ម័ន ហើយគាំទ្រការដោះស្រាយបញ្ហាតំបន់ត្រួតស៊ីគ្នារវាងកម្ពុជានិងថៃ។

សូមរំឭកដែរថា កាលពីថ្ងៃទី២០ ខែកុម្ភៈ ឆ្នាំ២០២៦ លោកស្រី Marie Buscail ភារធារីស្តីទីនៃស្ថានទូតបារាំងប្រចាំកម្ពុជា បានជួបពិភាក្សាការងារជាមួយ ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ លើគម្រោងវារីអគ្គិសនី ៨០០មេហ្កាវ៉ាត់។ គ្រានោះ លោកស្រី Marie Buscail បានបញ្ជាក់ថា គម្រោងវារីអគ្គិសនីនេះ មានទុនវិនិយោគដល់ទៅ ១,២ ប៊ីលានដុល្លារអាម៉េរិក។

ពាក់ព័ន្ធនឹងវិស័យថាមពលនេះដែរ នៅក្នុងថ្ងៃដដែលនេះ ឯកអគ្គរដ្ឋទូតប្រេស៊ីល លោកស្រី Vivian Loss Sanmartin ក៏មកជួបជាមួយឯកឧត្តម កែវ រតនៈ ដើម្បីពិភាក្សាកិច្ចសហការវិនិយោគក្នុងវិស័យរ៉ែ ថាមពល និងពាណិជ្ជកម្មជាមួយកម្ពុជាផងដែរ៕ (អានបន្ថែម)