ព្រលានសៀមរាបថ្មីបើក ព្រលានចាស់នឹងបិទទាំងស្រុង ខណៈព្រលានចាស់នៅភ្នំពេញនឹងក្លាយជាព្រលានយោធា

• 10 ខែ​មីនា 2023
• ព័ត៌មានក្នុងស្រុក
• 10 មើល

អាកាសយានដ្ឋានសៀមរាបចាស់ នឹងត្រូវបិទទាំងស្រុង នៅពេលអាកាសយានដ្ឋានអន្តរជាតិសៀមរាបអង្គរថ្មីនឹងបើកដំណើរការឆាប់ៗខាងមុខនេះ។ នេះបើយោងតាមការបញ្ជាក់របស់ឯកឧត្តម ស៊ិន ចាន់សិរីវុត្ថា អនុរដ្ឋលេខាធិការ និងជាអ្នកពាក្យអាកាសចរស៊ីវិល នៅថ្ងៃទី១០ មីនា ២០២៣។

ឯកឧត្តមស៊ិន ចាន់សិរីវុត្ថាបានប្រាប់សារព័ត៌មានសំណង់ និងអចលនទ្រព្យនៅថ្ងៃទី៩ ខែមីនានេះថា គម្រោងអាកាសយានដ្ឋានអន្តរជាតិសៀមរាបអង្គរ ដែលបច្ចុប្បន្ន កំពុងស្ថិតក្រោមការសាងសង់ សម្រេចបានប្រមាណជិត៩០ ភាគរយ នឹងបើកដំណើរការជាផ្លូវការនៅខែតុលា​ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីកម្ពុជា។​ (អានបន្ថែម)

ឯកឧត្តម ស៊ិន ចាន់សិរីវុត្ថា ថ្លែងថា៖ “​នៅពេលបើកដំណើរការអាកាសយានដ្ឋានសៀមរាបអង្គរថ្មីនេះ អាកាសយានដ្ឋានចាស់ត្រូវបិទទាំងស្រុងតែម្តង ចំណែកទីតាំងយកទៅធ្វើអ្វី គឺជាការសម្រេចចិត្តរបស់រដ្ឋាភិបាល​”។​

ឯកឧត្តម បញ្ជាក់បន្ថែមថា ដោយសារអាកាសយានដ្ឋានសៀមរាប​ស្ថិតក្នុងតំបន់គ្រប់គ្រងដោយអាជ្ញាធរអប្សរា ដូច្នេះ​ការសម្រេចចិត្ត យកទីតាំងខាងលើនេះ ទៅធ្វើអ្វីទៀត គឺអាស្រ័យលើអាជ្ញាធរអប្សរា។​

សូមជម្រាបជូនថា អាកាសយានដ្ឋានអន្តរជាតិសៀមរាបអង្គរ មានតម្លៃវិនិយោគសរុប ៨៨០លានដុល្លារ គ្រោងធ្វើសាកល្បងហោះហើរ និងឧបករណ៍បច្ចេកទេស នៅខែឧសភាខាងមុខ។​

ដោយឡែក អាកាសយានដ្ឋានអន្តរជាតិភ្នំពេញ ក៏នឹងត្រូវប្រើសម្រាប់ជាមូលដ្ឋានទ័ពអាកាស ការហោះហើរក្នុងស្រុក ដឹកទំនិញតាមផ្លូវអាកាស នៅពេលអាកាសយានដ្ឋានអន្តរជាតិ តេជោ ក្រុងតាខ្មៅ ដែលស្ថិតក្រោមការសាងសង់ ដាក់ឱ្យដំណើរការ នៅឆ្នាំ២០២៤ខាងមុខ។​

អាកាសយានដ្ឋានអន្តរជាតិភ្នំពេញ អាកាសយានដ្ឋានអន្តរជាតិសៀមរាប និងអាកាសយានដ្ឋានអន្តរជាតិព្រះសីហនុ  ជាការវិនិយោគដោយ ក្រុមហ៊ុនសម្បទានព្រលានយន្តហោះ (SCA) ។

• Road and Infrastructure
• Projects Development