រដ្ឋកំពុងចាត់វិធានការបន្ទាន់ ក្រោយរកឃើញសំណល់កខ្វក់ជាង ១លានម៉ែត្រគូប លួចបញ្ចេញចោលដោយខុសច្បាប់នៅកម្ពុជា

1 ខែសីហា 2025
Uncategorized
7 មើល

គិតត្រឹមឆមាសទី១ ពោលគឺគិតចាប់ពីខែមករា-មិថុនា ឆ្នាំ២០២៥ ក្រសួងបរិស្ថាន បានរកឃើញសំណល់រាវយ៉ាងហោចណាស់ ១.៣៦៦.៥៦០ម៉ែត្រគូប ត្រូវបានរោងចក្រ ក្រុមហ៊ុន និងអគារពាណិជ្ជកម្មផ្សេងៗ ជិត៣០កន្លែង លួចបញ្ចេញចោលដោយខុសច្បាប់ ដែលអាចនឹងបង្កជាគ្រោះថ្នាក់ដល់បរិស្ថាននៅកម្ពុជា។

យោងតាមរបាយការណ៍ផ្សាយដោយសារព័ត៌មានភ្នំពេញប៉ុស្តិ៍ នៅថ្ងៃទី ៣០ កក្កដា ឆ្នាំ២០២៥។

ប្រភពដដែល បានឱ្យដឹងថា បន្ទាប់ពីមានការចុះធ្វើអធិការកិច្ច នៅតាមក្រុមហ៊ុន និងរោងចក្រទាំងនោះ ក្រុមការងារ នៃអគ្គនាយកដ្ឋានគាំពារបរិស្ថាន នៃក្រសួងបរិស្ថាន បានពិនិត្យឃើញក្រុមហ៊ុននិងរោងចក្រទាំងនោះ បានបញ្ចេញសំណល់រាវ ដែលប៉ះពាល់បរិស្ថាន នៅក្នុង១ខែ មានប្រមាណ ២២៧.៧៦០ ម៉ែត្រគូប។ ក្នុងនោះ ក្នុង ១ថ្ងៃ មានសំណល់រាវ ប្រមាណ ១១.៣៨៨ ម៉ែត្រគូប។ ក្រោយពីការរកឃើញនេះ ក្រសួងបានធ្វើការណែនាំ ចេញលិខិតបញ្ជាកែប្រែ និងពិន័យអន្តរការណ៍ជាបន្ទាន់ផងដែរ។

យ៉ាងណាមិញ ខណៈកំពុងតែធ្វើទំនើបកម្ម និងការតាមដានត្រួតពិនិត្យ និងទប់ស្កាត់ការបំពុលបរិស្ថាន ដោយសារការបញ្ចេញសំណល់ ដែលបង្កហានិភ័យខ្ពស់ដល់បរិស្ថាននេះ ក្រសួងបរិស្ថានក៏បាន អនុវត្តវិធានការច្បាប់ទប់ស្កាត់ការបំពុលបរិស្ថានចំពោះក្រុមហ៊ុនទាំងនោះផងដែរ។

គួរបញ្ជាក់ថា រោងចក្រ និងក្រុមហ៊ុន ដែលរកឃើញថា បានលួចបញ្ចេញសំណល់ចោល នោះ ភាគច្រើនមានទីតាំងស្ថិតនៅក្នុងខេត្តកំពង់ស្ពឺ ក្រៅពីនោះមាននៅខេត្តព្រះសីហនុ ត្បូងឃ្មុំ ភ្នំពេញ កណ្តាល បាត់ដំបង និងកំពតជាដើម។

នៅពេលដែលកិច្ចខិតខំប្រឹងប្រែងទាំងនេះកើតឡើង ភាគីពាក់ព័ន្ធត្រូវបានលើកទឹកចិត្តឱ្យសហការ និងផ្តល់អាទិភាពដល់ការគ្រប់គ្រងបរិស្ថាន ដើម្បីធានាបាននូវអនាគតប្រកបដោយសុខភាពល្អ និងនិរន្តរភាពសម្រាប់ទាំងអស់គ្នា៕

- Video Advertisement -