រដ្ឋកំពុងជំរុញការអនុវត្តគម្រោងសង់ផ្លូវរថភ្លើងធុនស្រាលភ្ជាប់ក្រុងសៀមរាបទៅអាកាសយានដ្ឋានថ្មី

• 28 ខែ​ធ្នូ 2023
• Uncategorized
• 6 មើល

គណៈកម្មការអន្តរក្រសួង ជាមួយនិងក្រុមហ៊ុន China Metro Group បាននិងកំពុងជំរុញកិច្ចពិភាក្សាលើគម្រោងអភិវឌ្ឍនផ្លូវរថភ្លើងធុនស្រាល (LRT) តភ្ជាប់ពីអាកាសយានដ្ឋានអន្តរជាតិសៀមរាប-អង្គរ ឆ្ពោះទៅក្រុងសៀមរាប។ នេះបើតាមកិច្ចប្រជុំក្រោមកិច្ចដឹកនាំរបស់ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា និងជាប្រធានគណៈកម្មការអន្តរក្រសួង កាលពីថ្ងៃទី២៦ ខែធ្នូ ឆ្នាំ២០២៣។

កិច្ចប្រជុំនេះ ត្រូវបានរៀបចំឡើងក្នុងគោលបំណងជំរុញការអនុវត្តគម្រោងអភិវឌ្ឍន៍ផ្លូវរថភ្លើងធុនស្រាល តភ្ជាប់ពីអាកាសយានដ្ឋានអន្តរជាតិសៀមរាប-អង្គរ ឆ្ពោះទៅក្រុងសៀមរាប តាមអនុសាសន៍ណែនាំដ៏ខ្ពង់ខ្ពស់របស់ សម្តេចធិបតី ដើម្បីជាការឆ្លើយតបទៅនឹងកំណើននៃភ្ញៀវទេសចរ និងសេវាកម្មដឹកជញ្ជូននានា ខណៈដែលអាកាសយានដ្ឋានអន្តរជាតិសៀមរាប-អង្គរ បានចាប់ផ្តើមប្រតិបត្តិការរបស់ខ្លួនជាផ្លូវការ តាំងពីថ្ងៃទី១៦ ខែវិច្ឆិកា ឆ្នាំ២០២៣។ (អានបន្ថែម)

មួយវិញទៀត ការជជែកពិភាក្សាបានយកចិត្តទុកដាក់លើការសិក្សាតម្រាយផ្លូវ សំដៅដល់ការបញ្ចៀសកុំឱ្យមានការរំខានដោយប្រការណាមួយនៅតំបន់អង្គរ តំបន់ដែលជាបុរាណដ្ឋាន ឬ តំបន់ដែលស្ថិតក្នុងដែនអភិរក្សរបស់អាជ្ញាធរអប្សរាផងដែរ។

កន្លងមក បើតាមកិច្ចប្រជុំចុងក្រោយពាក់ព័ន្ធនឹងការងារនេះ ក្រុមការងារបច្ចេកទេស បានឈានដល់ដំណាក់កាលចុះសិក្សាប្រមូលព័ត៌មាន និងទិន្នន័យពីផលប៉ះពាល់ហើយ ដោយក្នុងនោះក្រុមការងារបានពិនិត្យលើជម្រើសចំនួន ០២ គឺមួយស្ថិតនៅលើផ្លូវចា​ស់ និងមួយទៀតត្រូវបង្កើតនៅលើផ្លូវថ្មី។ (អានបន្ថែម)

• Road and Infrastructure