រដ្ឋាភិបាលកម្ពុជាគ្រោងចំណាយថវិការជាង ១០ពាន់លានដុល្លារ សម្រាប់ឆ្នាំ២០២៦

• 29 ខែ​តុលា 2025
• Uncategorized @km
• 2 មើល

ក្នុងឆ្នាំ២០២៦ រដ្ឋាភិបាលកម្ពុជាគ្រោងចំណាយថវិការដ្ឋប្រមាណជាង ១០ពាន់លានដុល្លារ ដែលចំនួននេះបានកើនឡើង ៧,៦% បើធៀបនឹងឆ្នាំ២០២៥។ នេះបើតាមសេចក្តីព្រាងច្បាប់ស្តីពីហរិញ្ញវត្ថុសម្រាប់ការគ្រប់គ្រងឆ្នាំ២០២៦ ដែលត្រូវបានពិភាក្សាក្នុងកិច្ចប្រជុំគណៈរដ្ឋមន្រ្តី នៅថ្ងៃទី២៤ ខែតុលា ឆ្នាំ២០២៥ ក្រោមវត្តមានសម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

តាមសេចក្តីប្រកាសព័ត៌មានរបស់រដ្ឋាភិបាល បានឱ្យដឹងថា  រាជរដ្ឋាភិបាលគ្រោងចំណាយថវិការដ្ឋសរុបចំនួន ៤០.៩១៣ពាន់លានរៀល ស្មើនឹង ១៨,៨៥% នៃ ផ.ស.ស. ឬកើនចំនួន ៧,៨% ធៀបនឹងច្បាប់ហិរញ្ញវត្ថុឆ្នាំ២០២៥។

ទន្ទឹមគ្នានេះ រដ្ឋាភិបាល បានព្យាករណ៍ថា សេដ្ឋកិច្ចកម្ពុជា នឹងកើនក្នុងរង្វង់ ៥,២% សម្រាប់ឆ្នាំ២០២៥ និងប្រមាណ ៥% សម្រាប់ឆ្នាំ២០២៦។ ក្នុងនោះផលិតផលក្នុងស្រុកសរុប ត្រូវបានរំពឹងថានឹងអាចកើនដល់ ៣.០២០ដុល្លារក្នុងមួយនាក់ សម្រាប់ឆ្នាំ២០២៦ ធៀបនឹងប្រមាណ ២.៨៥៨ដុល្លារ ក្នុងឆ្នាំ២០២៥។

កំណើនសេដ្ឋកិច្ចកម្ពុជាក្នុងឆ្នាំ២០២៦ ត្រូវបានគំាទ្រក្នុងវិស័យ និងអនុវិស័យមួយចំនួនរួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម ដែលបន្តគាំទ្រដោយអនុវិស័យនេសាទ និងការចិញ្ចឹមសត្វ។ រីឯអត្រាអតិផរណាជាមធ្យមប្រចាំឆ្នាំ ត្រូវបានរដ្ឋាភិបាលព្យាករថានឹងស្ថិតក្នុងរង្វង់ ២,៨%។ នេះបើយោងតាមការបញ្ជាក់ពីរាជដ្ឋាភិបាល។

ការអភិវឌ្ឍទាំងនេះគូសបញ្ជាក់ពីការប្តេជ្ញាចិត្តរបស់រដ្ឋាភិបាលកម្ពុជាក្នុងការជំរុញកំណើនសេដ្ឋកិច្ចប្រកបដោយចីរភាព និងលើកកម្ពស់ស្តង់ដារជីវភាពរបស់ប្រជាពលរដ្ឋរបស់ខ្លួន ខណៈដែលប្រទេសនេះកំពុងជិតឈានចូលឆ្នាំ២០២៦៕