English 
ខ្មែរ សម្ដេចអំពាវនាវឲ្យមានការរៀបចំឥណទានឡើងវិញ ដើម្បីជួយសម្រួលដល់គ្រឹះស្ថានអប់រំឯកជន
- 24 ខែមិថុនា 2020
- ព័ត៌មានអចលនទ្រព្យ
- 63 មើល
សម្ដេចនាយករដ្ឋមន្ត្រី ហ៊ុន សែន បានអំពាវនាវឲ្យមានការរៀបចំឥណទានឡើងវិញសម្រាប់គ្រឹះស្ថានសិក្សាអប់រំឯកជន ដើម្បីជួយសម្រួលដល់ម្ចាស់គ្រឹះស្ថានក្នុងកំឡុងវិបត្តិកូវីដ ១៩នេះ។
ការអំពាវនាវនេះធ្វើឡើងក្នុងឱកាស ការអញ្ជើញរបស់សម្ដេចនាយករដ្ឋមន្ត្រី ដើម្បីប្រកាសអនុវត្តន៍កម្មវិធីឧបត្ថម្ភសាច់ប្រាក់ ជូនដល់ប្រជាពលរដ្ឋក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ ថ្ងៃទី២៤ មិថុនា ២០២០នេះ។
សម្ដេចបានថ្លែងថា៖ «ធនាគារជាតិនៃកម្ពុជា គួរតែពិភាក្សាជាមួយធនាគារឯកជន និងគ្រឹះស្ថានធនាគារផ្សេងៗ ក្នុងការរៀបចំឥណទានឡើងវិញ។ យើងបានរៀបចំឥណទានឡើងវិញ ប្រមាណច្រើនជាង ១០ ម៉ឺនគ្រួសារ ប៉ុន្តែសូមពិនិត្យលើការរៀបចំឥណទានឡើងវិញ សម្រាប់គ្រឹះស្ថានអប់រំឯកជនផង។»
សម្ដេចបានលើកឧទាហរណ៍ទាក់ទងទៅនឹងការដំឡើងទំហំឥណទានដល់គ្រឹះស្ថានឯកជន ដែលអាចជាអត្ថប្រយោជន៍សម្រាប់រៀបចំកម្មវិធីសិក្សាអនឡាញ ដល់គ្រឹះស្ថានមួយចំនួនដែលមិនទាន់មាននៅឡើយ។
សម្ដេចលើកឡើងថា៖ «ខ្ញុំឧទាហរណ៍អញ្ចេះ គ្រឹស្ថានអប់រំឯកជនបានយកប្លង់ដាក់ខ្ចីធនាគារបានលុយហើយ គាត់អត់មានស្អីយកទៅបញ្ជាំដើម្បីទៅខ្ចីប្រាក់ថែមទៀតទេ។ ឧទាហរណ៍ថា អគារនិងដីធ្លីរបស់គាត់តម្លៃ ៥ លានដុល្លារ គាត់ធ្លាប់យកទៅបញ្ជាំបាន ៥០ ម៉ឺនយកមក។ ឥឡូវយើងអាចពង្រីកទំហំដែលអាចខ្ចីបានរហូតដល់ ៨០ ម៉ឺន អញ្ចឹងគាត់នឹងបានប្រាក់កម្ចី ៣០ ម៉ឺន ដុល្លារបន្ថែមទៀត។ ហើយគាត់យកមកធ្វើអី? គ្រឹះស្ថានសិក្សាឯកជនមួយចំនួនមិនទាន់មានអនឡាញបង្រៀនទេ ចឹងគាត់អាចយកទឹកប្រាក់ហ្នឹងមករៀបចំកម្មវិធីរៀនអនឡាញវិញ។»
ជាមួយគ្នានេះដែរ សម្ដេចបានអំពាវនាវដល់ម្ចាស់អគារ ដែលជួលឲ្យគ្រឹះស្ថានអប់រំទាំងឡាយឲ្យយោគយល់ ទន់ភ្លន់ជាមួយនឹងគ្រឹះស្ថានអប់រំឯកជន ដែលបានជួលអគារ ដោយធ្វើការកាត់បន្ថយប្រាក់ជួលអគារ ដើម្បីធានាកុំឲ្យគ្រឹះស្ថានទាំងអស់នោះខាតបង់ខ្លាំងពេកក្នុងកំឡុងពេលកូវីដ នេះ។
កាលពីខែ មេសា កន្លងទៅ ក្រសួងអប់រំ ក៏បានធ្វើការអំពាវនាវដូចគ្នានេះដែរ ក្រោយពេលគ្រឹះស្ថានអប់រំឯកជន ចំនួន ១១៣ គ្រឹះស្ថាន ដែលបានអះអាងថា គ្រឹះស្ថានរបស់ខ្លួនបានរងផលប៉ះពាល់យ៉ាងខ្លាំងពីការរីករាលដាលនៃមេរោគកូវីដ១៩ និងកំពុងប្រឈមនឹងការក្ស័យធន៕ (អានបន្ថែម)