អង់គ្លេសប្រកាសលក់ស្ថានទូតរបស់ខ្លួនក្នុងប្រទេសថៃ

• 15 ខែ​មករា 2018
• ព័ត៌មានអចលនទ្រព្យ
• 3 មើល

ការិយាល័យ Foreign and Commonwealth របស់ចក្រភពអង់គ្លេស (FCO) នឹងលក់ស្ថានទូតអង់គ្លេសនៅទីក្រុងបាងកកដែលមានទំហំ ៣.៧ហិកតា នៅក្នុងតំបន់ Wireless Road ក្នុងប្រទេសថៃ ក្នុងតម្លៃ៦០០លានដុល្លារ។

បើយោងតាម FCO ការលក់នេះតំណាងឲ្យប្រតិបត្តិការអចលនទ្រព្យធំបំផុតមិនធ្លាប់មានពីមុនមករបស់ FCO “កិច្ចព្រមព្រៀងលក់ដីដ៏ធំបំផុតក្នុងប្រវត្តិសាស្ត្រថៃ” ។

ស្ថានទូតអង់គ្លេសនៅបាងកកកំពុងត្រូវបានលក់ទៅឲ្យសម្ព័ន្ធក្រុមហ៊ុនបណ្តាក់ទុនរួមគ្នាមួយ គឺក្រុមហ៊ុន Hongkong Land ដែលជាសមាជិករបស់ Jardine Matheson Group និងក្រុមហ៊ុន Central Group ។ នៅឆ្នាំ២០០៦ ផ្នែកមួយនៃបរិវេណអចលនទ្រព្យដើមត្រូវបានលក់ទៅឲ្យក្រុមហ៊ុន Central Group ហើយបច្ចុប្បន្ននេះជាផ្សារទំនើប Central Embassy ។

ស្ថានទូតអង់គ្លេសនៅបាងកកថ្មីនឹងមានមូលដ្ឋាននៅអាគារ AIA Sathorn Tower ក្នុងសង្កាត់ពាណិជ្ជកម្មកណ្តាលក្រុង។

លោក Simon McDonald អនុរដ្ឋលេខាធិការអចិន្រៃ្តយ៍នៅការិយាល័យការបរទេសបានលើកឡើងនៅក្នុងសេចក្តីប្រកាសព័ត៌មានរបស់ FCO ថា “នៅក្នុងបរិយាកាសសារពើពន្ធតឹងតែង វាជាការត្រឹមត្រូវដែលយើងធ្វើការសំរេចចិត្តដ៏លំបាកដើម្បីធានាថា ចក្រភពអង់គ្លេសអាចរក្សាវត្តមានជាសកលរបស់ខ្លួន និងទទួលបានតម្លៃល្អបំផុត។”