អន្តរក្រសួងកំពុងពិនិត្យពីផលប៉ះពាល់នៃគម្រោងអាជីវកម្មខ្សាច់លើផ្ទៃដីទំហំ ១៤៧ហិកតា នៅខេត្តកោះកុង

Sommana Yan
22 ខែសីហា 2025
ព័ត៌មានក្នុងស្រុក
258 មើល

អន្តរក្រសួងដែលមកពីតំណាងក្រសួង-ស្ថាប័នពាក់ព័ន្ធ តំណាងអគ្គនាយកដ្ឋានចំណុះក្នុងក្រសួង នាយកដ្ឋានវាយតម្លៃហេតុប៉ះពាល់បរិស្ថាន (EIA) និងលេខាធិការដ្ឋាន EIA ជាច្រើនរូប បានបើកកិច្ចប្រជុំវាយតម្លៃផលប៉ះពាល់បរិស្ថានពេញលេញសម្រាប់គម្រោងអាជីវកម្មខ្សាច់លើផ្ទៃដីទំហំ ១៤៧ហិកតានៅខេត្តកោះកុង។

ថ្លែងក្នុងកិច្ចប្រជុំកាលព្រឹកថ្ងៃទី២០ ខែសីហា ឆ្នាំ២០២៥ នៅទីស្តីការក្រសួងបរិស្ថាន ឯកឧត្តម ទា ជុប រដ្ឋលេខាធិការក្រសួងបរិស្ថាន បានឱ្យដឹងថា កិច្ចប្រជុំនេះបានធ្វើការពិនិត្យ និងផ្តល់លើរបាយការណ៍វាយតម្លៃហេតុប៉ះពាល់បរិស្ថានពេញលេញ សម្រាប់គម្រោងអាជីវកម្មខ្សាច់ លើផ្ទៃដីទំហំ ១៤ដែ៧ហិកតា មានទីតាំងស្ថិតនៅតាមដងព្រែកកោះប៉ោ ក្នុងភូមិសាស្រ្តឃុំប៉ាក់ខ្លង ស្រុកមណ្ឌលសីមា ខេត្តកោះកុង។

ជាងនេះទៀត កិច្ចប្រជុំនេះ អន្តរក្រសួង ក៏បានពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថានពេញលេញសម្រាប់គម្រោង និងប្រមូលធាតុចូលឱ្យបានគ្រប់ជ្រុងជ្រោយ ដោយកំណត់វិធានការកាត់បន្ថយហេតុប៉ះពាល់លើធនធានរូបសាស្រ្ត ធនធានជីវសាស្រ្ត និងសេដ្ឋកិច្ច-សង្គម និងការអភិវឌ្ឍប្រកបដោយចីរភាពផងដែរ។

គួរបញ្ជាក់ថា គម្រោងអាជីវកម្មខ្សាច់ លើផ្ទៃដីទំហំ ១៤៧ហិកតា ដែលស្ថិតក្នុងភូមិសាស្រ្តខេត្តកោះកុង គឺវិនិយោគដោយក្រុមហ៊ុន CATALYST MARINE and RESOURCES (CAMBODIA) CO., LTD. (ម្ចាស់គម្រោង) ហើយសិក្សាដោយក្រុមហ៊ុនទីប្រឹក្សា SAFEGUARD MANAGEMENT AND CONSTRUCTION CO., LTD ។

ក្រសួងរ៉ែ និងថាមពល ធ្លាប់បានឱ្យដឹងថា បច្ចុប្បន្ននេះ នៅកម្ពុជា មានក្រុមហ៊ុនចំនួន៣ទទួលបានអាជ្ញាបណ្ណពីក្រសួងរ៉ែនិងថាមពលពលដើម្បីធ្វើអាជីវកម្មខ្សាច់។ ក្នុងឆ្នាំ ២០២៣ កម្ពុជាទទួលបានពន្ធសួយសារលើកអាជីវកម្មខ្សាច់ និងពន្ធនាំចេញក្នុងទំហំទឹកប្រាក់ជាង ៤០លានដុល្លារ ពីខ្សាច់ដែលបានបូមរួចប្រមាណជាង១០លានតោន (១០,៩៦០,៧៨៩.៩៦ តោន)៕ (Read more)

- Video Advertisement -