អាជ្ញាធរក្រុងហូជីមិញ ពិន័យអ្នកលេងតិកតុកដែលធ្វើឱ្យប៉ះពាល់កិត្តិយសអង្គរវត្តខ្មែរ ចំនួន ៧,៥លានដុង
អាជ្ញាធរក្រុងហូជីមិញ បានសម្រេចធ្វើការផាកពិន័យអ្នកលេងបណ្តាញសង្គមតិកតុក (TikTok) ម្នាក់ជនជាតិវៀតណាម ឈ្មោះ ហ៊ួ គុក អាញ (Hua QuocAnh) ជាទឹកប្រាក់ចំនួន ៧,៥ លានដុង (៣០៦ ដុល្លារ) ពីបទបង្ខូចកិត្តិយសប្រទេសកម្ពុជា និងប្រាសាទអង្គរវត្តរបស់ប្រទេសកម្ពុជាថា ជារបស់ប្រទេសថៃ។ នេះបើយោងតាមការរាយការណ៍របស់សារៈព័ត៌មាន Vietnam.vn ចុះថ្ងៃទី ០៥ ខែមករា ឆ្នាំ ២០២៤។
នៅក្នុងសេចក្តីសម្រេចពីការផាកពិន័យដែលអាជ្ញាធរវៀតណាមបានប្រកាសកាលពីថ្ងៃពុធ ក៏បានព្រមានផងដែរ កុំឱ្យតារាតិកតុករូបនេះបង្កើតបញ្ហាដដែលៗទៀត ហើយត្រូវគោរពតាមច្បាប់វៀតណាម ស្ដីពីការប្រើប្រាស់អ៊ីនធឺណិត និងបណ្ដាញសង្គមផ្សេងៗទៀតដែលពេញនិយម ប្រកបដោយការទទួលខុសត្រូវ និងក្រមសីលធម៌។
គួររំលឹកថា កាលពីខែវិច្ឆិកា ឆ្នាំ ២០២៣ ដែលទើបកន្លងផុតទៅ ជនជាតិវៀតណាម ឈ្មោះ ហ៊ួ គុក អាញនេះ បានបង្ហោះវីដេអូមួយប្រវែង ១,២៥នាទី ដែលមានខ្លឹមសារមាតិកាអំពីប្រាសាទអង្គរវត្ត ប៉ុន្តែមានបង្ហាញរូបវីដេអូស្ត្រីម្នាក់ស្លៀកពាក់បែបប្រពៃណីថៃនិងកាន់ដំបង ១ ដើរជុំវិញប្រាសាទអង្គរវត្ត ព្រមទាំងមានរំលេចរូបភាពទង់ជាតិថៃ និងព្រះឆាយាលក្ខណ៍ស្តេចថៃ និងមានរំលេចសារជាសំឡងថា “សួស្តីប្រទេសថៃ” នៅលើគណនីតិកតុករបស់ខ្លួន ដែលមានអ្នកតាមដានជាង ៧០ម៉ឺននាក់។
មាតិកាវីដេអូនេះ បានបណ្តាលឱ្យផ្ទុះប្រតិកម្មរិះគន់យ៉ាងខ្លាំងក្លា ទាំងនៅក្នុងប្រទេសកម្ពុជា និងប្រទេសវៀតណាម។
កាលពីថ្ងៃទី ១២ ខែវិច្ឆិកា ឆ្នាំ ២០២៣ អាជ្ញាធរអប្សរា បានលើកឡើងថា វីដេអូរបស់លោក Hua QuocAnh បង្កការប៉ះពាល់យ៉ាងធ្ងន់ធ្ងរដល់សម្បត្តិ វប្បធម៌ និងបេតិកភណ្ឌរបស់កម្ពុជា ហើយបានស្នើឱ្យក្រុមហ៊ុនតិកតុកបិទវីដេអូនោះចោល ហើយក្រោយមក វីដេអូនោះក៏ត្រូវបានលុបចេញវិញ។
“វីដេអូដែល (ជនជាតិវៀតណាម) ឈ្មោះ អាញ់ បានផលិតឡើងនៅឯប្រាសាទអង្គរវត្ត មានផលប៉ះពាល់ជាអវិជ្ជមានខ្លាំង ដល់រូបភាពផ្នែកទេសចរណ៍របស់កម្ពុជា” នេះជាប្រសាសន៍របស់លោក ប្រាក់ ចាន់ដា អនុរដ្ឋលេខាធិការក្រសួងទេសចរណ៍របស់កម្ពុជា។
ពាក់ព័ន្ធនឹងបញ្ហានេះដែរ មេធាវីជនជាតិវៀតណាមម្នាក់ដែលមានមូលដ្ឋាននៅទីក្រុងហាណូយធ្លាប់បានលើកឡើងកាលពីខែវិច្ឆិកាថា សកម្មភាពរបស់អ្នកលេងតិកតុកនេះ បានប្រព្រឹត្តឡើងនៅលើទឹកដីកម្ពុជា ដូច្នេះការដោះស្រាយបញ្ហាផ្លូវច្បាប់ត្រូវស្ថិតក្រោមដែនសមត្ថកិច្ចរបស់ច្បាប់កម្ពុជា។ ទោះជាយ៉ាងណាក្តី រហូតមកទល់ថ្ងៃព្រហស្បត្តិ៍ទី ០៤ ខែមករា ឆ្នាំ ២០២៤នេះ ក្រសួងព័ត៌មានវៀតណាមទើបនឹងបានចុះផ្សាយថា ចុងក្រោយអាជ្ញាធរក្រុងហូជីមិញ បានសម្រេចផាកពិន័យចារីខាងលើ នូវទឹកប្រាក់ ៣០០ដុល្លារ ព្រមជាមួយនឹងការព្រមានបន្ថែមទៀត។
ជាវិធានការឆ្លើយតបពីខាងភាគិកម្ពុជា ក្រសួងទេសចរណ៍កម្ពុជាធ្លាប់បានឆ្លើយតបទៅសារៈព័ត៌មានវៀតណាម VnExpress ថា ក្រសួងបានពិចារណាហាមឃាត់មិនអនុញ្ញាតឱ្យឈ្មោះ អាញ់ ជាន់ទឹកដីកម្ពុជាចាប់ពី ៥ ទៅ ១០ ឆ្នាំ។
ជុំវិញភាពចម្រូងចម្រាស់នេះ នាយកប្រតិបត្តិរបស់អង្គការឃ្លាំមើលសិទ្ធិមនុស្សប្រចាំទ្វីបអាស៊ី លោក Phil Robertson បានប្រាប់សារៈព័ត៌មាន Nikkei Asia កាលពីថ្ងៃទី ០៤ ខែមករានេះថា “នេះ គឺជារឿងគួរឱ្យអស់សំណើចបំផុត” ដោយលោកបានបន្ថែមថា រដ្ឋការក្រុងហាណូយ គួរពិចារណាគ្រប់គ្រងសេរីភាពការបញ្ចេញមតិរបស់ពលរដ្ឋខ្លួនឱ្យបានល្អ ជាជាងព្រួយបារម្ភអំពីការធ្វើឱ្យខូចកិត្តិយសទីក្រុងភ្នំពេញ។
ជុំវិញបញ្ហាប្រាសាទអង្គរវត្ត កន្លងមកធ្លាប់មានប្រជាជនថៃមួយចំនួន បានអះអាងយ៉ាងចម្រូងចម្រាសថា ប្រាសាទអង្គរវត្តជាកម្មសិទ្ធិរបស់ប្រទេសថៃ មិនមែនរបស់ប្រទេសកម្ពុជាទេ។ បញ្ហានេះជាជម្លោះដ៏រ៉ាំរ៉ៃរវាងប្រជាជាតិទាំងពីរ បើទោះជាសហគមន៍អន្តរជាតិជាទូទៅ តែងតែទទួលស្គាល់អច្ឆិយវត្តុមានតែមួយគត់លើលោកនេះ ថាជាស្នាដៃតែមួយគត់របស់ប្រជាជនកម្ពុជាយ៉ាងណាក៏ដោយ៕
- Video Advertisement -
English 
ខ្មែរ 
