គិតត្រឹមខែមេសា ឆ្នាំ២០២៥ ​រដ្ឋភិបាលកម្ពុជាបានចំណាយជាង ១០៨លានដុល្លារ ជួយពលរដ្ឋងាយរងគ្រោះ

• Sommana Yan
• 21 ខែ​ឧសភា 2025
• Uncategorized @km
• 125 មើល

គិតត្រឹម​ថ្ងៃទី២៦ ខែមេសា ឆ្នាំ២០២៥ រដ្ឋាភិបាលកម្ពុជាបានចំណាយថវិកាសរុបជាង ១០៨,២២លានដុល្លារ សម្រាប់កម្មវិធីជាតិជំនួយសង្គមក្នុងកញ្ចប់គ្រួសារ។ នេះបើតាមឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងក្នុងវេទិកាផ្សព្វផ្សាយស្តីពីប្រព័ន្ធគាំពារសង្គមនៅប្រទេសកម្ពុជា កាលពីព្រឹកថ្ងៃទី១៩ ខែឧសភា ឆ្នាំ២០២៥ នៅវិមាន​រដ្ឋសភា។

ឯកឧត្តមរដ្ឋមន្ត្រី​ បានថ្លែងថា គិតត្រឹម​ថ្ងៃទី២៦ ខែមេសា ឆ្នាំ២០២៥ កម្មវិធីជាតិជំនួយសង្គមក្នុងកញ្ចប់គ្រួសារ បាន និងកំពុងបើកផ្តល់ប្រាក់ឧបត្ថម្ភគោល​ជូនគ្រួសារមានបណ្ណសមធម៌សរុប ចំនួន ៧១៥.៣៤៧គ្រួសារ និងបានផ្តល់ប្រាក់ឧបត្ថម្ភបន្ថែមសម្រាប់​សមាជិក​គ្រួសារ​ដែលមានភាពងាយរងគ្រោះមានដូចជា ស្រ្តីមានផ្ទៃពោះ កុមារអាយុក្រោម២ឆ្នាំ ជនមានពិការភាព មនុស្សចាស់អាយុ ៦០ឆ្នាំ​ឡើង អាហារូបករណ៍សិស្សក្រីក្រ នៅបឋមសិក្សានិងមធ្យមសិក្សាចំណេះទូទៅសាធារណៈ និងអ្នកផ្ទុកមេរោគអេដស៍ និងអ្នកជំងឺអេដស៍ ដោយរដ្ឋបានចំណាយថវិកាសរុប ៤៣២.៩០៩.៤៤២.០០០ ស្មើនឹងប្រមាណជាង ១០៨,២២លានដុល្លារ។

ទន្ទឹមនឹងនេះដែរ ឯកឧត្តម ជា សុមេធី ក៏បានបន្ថែមដែរថា បច្ចុប្បន្ន ក្រសួងបាននិងកំពុងបើកផ្តល់ប្រាក់​របបសន្តិ​សុខ​សង្គម នៃមូលនិធិជំនួយសង្គម ជូនអតីតមន្រ្តីរាជការស៊ីវិលសរុបចំនួន ៥៦.៤៧៥នាក់ និងអតីតយុទ្ធជនសរុបចំនួន ១១៥.២៩៦នាក់ ដោយ​ការបើកផ្តល់នេះធ្វើឡើងចំនួន ០២លើក ក្នុងមួយខែតាមរយៈប្រព័ន្ធធនាគារ កាណាឌីយ៉ា និងធនាគារអេស៊ីលីដា។

គួរបញ្ជាក់ថា ជារៀងរាល់ឆ្នាំ រាជរដ្ឋាភិបាលកម្ពុជាតែងតែគិតគូរតម្លើងប្រាក់របប សោធន ជូនអតីតមន្រ្តីរាជការស៊ីវិល និង​អតីតយុទ្ធជន។ គិតត្រឹមខែ មេសា​ឆ្នាំ២០២៥នេះដែរ ប្រាក់សោធននិវត្តន៍ទាបបំផុតចំនួន ៨៤៥.០០០រៀល និងបន្ថែម ២០.០០០រៀល សម្រាប់និវត្តន៍ជនដែលបានចូលនិវត្តន៍​មុនឆ្នាំ​២០២៤។

នៅពេលដែលប្រទេសកម្ពុជាកំពុងបោះជំហានទៅមុខក្នុងការធ្វើឱ្យប្រសើរឡើងនូវប្រព័ន្ធគាំពារសង្គមរបស់ខ្លួន ការយកចិត្តទុកដាក់របស់រដ្ឋាភិបាលក្នុងការលើកស្ទួយប្រជាពលរដ្ឋដែលងាយរងគ្រោះបំផុតនៅតែជាអាទិភាពកំពូល ដោយបង្ហាញពីវិធីសាស្រ្តយ៉ាងសកម្មចំពោះសុខុមាលភាព និងជំនួយដ៏គួរឱ្យសរសើរ និងចាំបាច់សម្រាប់ការរីកចម្រើនរបស់ប្រទេសជាតិ។

• Social and Contribution