ជប៉ុនផ្ដល់ជំនួយឥតសំណងប្រមាណ៨លានដុល្លារ ជួយបង្កើតវិទ្យាស្ថានគរុកោសល្យនៅខេត្តកំពង់ចាម

• Sommana Yan
• 25 ខែ​ឧសភា 2026
• ព័ត៌មានសំណង់
• 223 មើល

បន្ទាប់ពីប្រកាសផ្តល់ហិរញ្ញប្បទានឥតសំណងប្រមាណ ១១លានដុល្លារដល់កម្ពុជា រដ្ឋាភិបាលជប៉ុនក៏បានប្រកាសផ្ដល់ហិរញ្ញប្បទានឥតសំណងប្រមាណ ៨លានដុល្លារអាមេរិក ជួយបង្កើតវិទ្យាស្ថានគរុកោសល្យនៅខេត្តកំពង់ចាម សំដៅជួយពង្រឹងប្រព័ន្ធអប់រំ និងគ្រូបង្រៀននៅកម្ពុជា។ (អានបន្ថែម)

សេចក្តីប្រកាសរបស់ក្រសួងការបរទេសកម្ពុជា ផ្សាយនៅថ្ងៃទី២០ ខែឧសភា ឆ្នាំ២០២៦ បានឱ្យដឹងថា ពិធីចុះហត្ថលេខាលើការផ្ដល់ហិរញ្ញប្បទានឥតសំណងរបស់ជប៉ុន បានធ្វើឡើងកាលពីថ្ងៃទី១៩ឧសភា ឆ្នាំ២០២៦ ក្រោមអធិតីភាព ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិកម្ពុជា និងឯកឧត្តម អ៊ូអ៊ីណូ អាត់ស៊ូស៊ី (UENO Atsushi) ឯកអគ្គរាជទូតប្រទេសជប៉ុនប្រចាំកម្ពុជា។ ហិរញ្ញប្បទានឥតសំណងដែលមានទឹកប្រាក់ចំនួន១ ១៨៩ ០០០ ០០០យ៉េន (ឬប្រមាណ៨លានដុល្លារអាម៉េរិក) គឺសម្រាប់អនុវត្តគម្រោងបង្កើតវិទ្យាស្ថានគរុកោសល្យនៅខេត្តកំពង់ចាម។

ក្រោមជំនួយឥតសំណងនេះ វិទ្យាស្ថានគរុកោសល្យខេត្តកំពង់ចាម នឹងត្រូវបំពាក់ដោយសម្ភារបរិក្ខារ និងធនធានអប់រំចាំបាច់ ដែលនឹងចូលរួមចំណែកក្នុងការពង្រឹងប្រព័ន្ធអប់រំ គ្រូបង្រៀន និងលើកកម្ពស់គុណភាពអប់រំកម្រិតមូលដ្ឋាន។ ជាមួយគ្នា ហិរញ្ញប្បទានឥតសំណងនេះ ឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់ជប៉ុនក្នុងការលើកកម្ពស់ ការអភិវឌ្ឍសង្គម-សេដ្ឋកិច្ច និងធនធានមនុស្សកម្ពុជា ក៏ដូចជាធ្វើឱ្យស៊ីជម្រៅនូវភាពជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ជប៉ុន៕

• Japan's grant
• Social and Contribution