ជប៉ុនផ្តល់ជំនួយឥតសំណងដល់កម្ពុជា១១លានដុល្លារ ជួយបោសសម្អាតផ្ទៃដីចម្ការមីន

Sommana Yan
24 ខែឧសភា 2026
ព័ត៌មានអចលនទ្រព្យ
693 មើល

រដ្ឋាភិបាលជប៉ុន បានប្រកាសផ្តល់ហិរញ្ញប្បទានឥតសំណងប្រមាណ ១១លានដុល្លារបន្ថែមទៀតដល់កម្ពុជា ដើម្បីបោសសម្អាតមីន និងជួយសង្រ្គោះជនពិការដោយសារមីន នៅកម្ពុជា ដោយផ្តោតលើខេត្តពោធិ៍សាត់ បាត់ដំបង និងកោះកុង។

ជប៉ុនបានសម្រេចផ្តល់ជំនួយហិរញប្បទានឥតសំណងចំនួន ១៧០០លានយ៉េន (ប្រមាណ១១លានដុល្លារអាមេរិក) ទៀតជូនកម្ពុជា ក្នុងគោលបំណងគាំទ្រដល់មជ្ឈមណ្ឌលសកម្មភាពកំចាត់មីនកម្ពុជា (CMAC) លើគម្រោងសមាហរណកម្មការបោសសម្អាតមីន និងជួយសង្គ្រោះជនពិការដោយសារមីន ដំណាក់កាលទី៣ បន្ទាប់ពីគម្រោងដំណាក់កាលទី២ បានបញ្ចប់ កាលពីចុងឆ្នាំ ២០២៥ ដោយចំណាយទឹកប្រាក់សរុបអស់ជិត១៧លានដុល្លារអាមេរិក។

ជំនួយឥតសំណង ប្រមាណ១១លានដុល្លារនេះ គឺគាំទ្រដល់ការបោសសម្អាតផ្ទៃដីចម្ការមីន/គ្រាប់ចំនួន ៤.៩៣៩ហិកតា ក្នុងភូមិសាស្រ្ដខេត្តពោធិ៍សាត់ ខេត្តបាត់ដំបង និងខេត្តកោះកុង ព្រមទាំងឆ្លើយតបសំណើសុំអន្ដរាគមន៍បន្ទាន់ក្នុងខេត្តប៉ៃលិន។ ការជួយសង្គ្រោះជនរងគ្រោះដោយសារមីន និងការអភិវឌ្ឍសហគមន៍ក្រោយបោសសម្អាតមីនរួច។ ទិញម៉ាស៊ីនរាវមីន ALIS និងកសាងប្រព័ន្ធទិន្នន័យបញ្ញាសិប្បនិមិ្មត(AI)។

តាមរយៈជំនួយនេះ លោក ហេង រតនា អគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា កាលពីថ្ងៃទី១៨ ខែឧសភា ឆ្នាំ២០២៦ បានថ្លែងអំណរគុណរដ្ឋាភិបាល និងប្រជាជនជប៉ុនដែលបានផ្តល់ជំនួយទាំងសម្ភារៈ និងថវិកា ដើម្បីគាំទ្រអង្គភាព CMAC ក្នុងការបោសសម្អាតមីននៅកម្ពុជា សំដៅឆ្ពោះទៅរកកម្ពុជាអស់ការគំរាមកំហែងដោយសារគ្រាប់មីនប្រឆាំងមនុស្សនៅត្រឹមចុងឆ្នាំ២០៣០ និងកាត់បន្ថយការគំរាមកំហែងដោយសារបញ្ហាសំណល់គ្រាប់យុទ្ធភណ្ឌសង្គ្រាមត្រឹមឆ្នាំ២០៣៥៕ (អានបន្ថែម)