ជនជាតិជប៉ុនផ្តល់ដីជាង៣ហិកតា និងជាអំណោយដល់រដ្ឋបាលរាជធានីភ្នំពេញ ដើម្បីធ្វើសួនសាធារណៈ

Proeksa Meas
26 ខែកក្កដា 2026
ព័ត៌មានអចលនទ្រព្យ
152 មើល

ក្រុមគ្រួសារជនជាតិជប៉ុនមួយគ្រួសារ បានសម្រេចប្រគល់ដីទំហំជាង ៣ហិកតា ជូនរដ្ឋបាលរាជធានីភ្នំពេញ ហើយបច្ចុប្បន្នអាជ្ញាធរបានកំពុងពិនិត្យរៀបចំសួនសាធារណៈ។ នេះបើតាមដំណើរចុះពិនិត្យរបស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញកាលពីថ្ងៃទី១៣ ខែកក្កដា ឆ្នាំ២០២៦។

ឯកឧត្តម ឃួង ស្រេង បានឱ្យដឹងថា ទីតាំងដីដែលជាអំណោយរបស់ជនជាតិជប៉ុន មានភូមិសាស្រ្តនៅភូមិព្រៃល្វា សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ។ ក្នុងដំណើរចុះពិនិត្យនេះដែរ ឯកឧត្តម ឃួង ស្រេង បានអះអាងថា ដីនេះ នឹងរៀបចំសួនសាធារណៈនេះ ហើយនឹងលេញចេញជារូបរាងឆាប់ៗ។ ជាមួយគ្នានេះ ឯកឧត្តមក៏បានណែនាំឱ្យអាជ្ញាធរកែលម្អ ទាំងការដាំដើមឈើបន្ថែម និងកែលម្អហេដ្ឋារចនាសម្ព័ន្ធមួយចំនួនផងដែរ។ ឯកឧត្តម អះអាងថា ការដាំដើឈើបន្ថែមលើដីនេះ ដើម្បីរៀបចំជាសួនសាធារណៈ អាចឱ្យប្រជាពលរដ្ឋដើរលំហែកម្សាន្ត និងហាត់ប្រាណបាន ដើម្បីលើកកម្ពស់សុខុមាលភាពប្រជាពលរដ្ឋ។

សូមរំឭកដែរថា ដីទំហំ៣ហិកតានេះ គឺទទួលបានពីលោកស្រី មិឈិកូ កាន់ហ្សាគិ (MICHIKO KANSAKI) ភរិយារបស់លោក កូជិ កាន់ហ្សាគិ (KOJI KANZAKI) ជនជាតិជប៉ុន ហើយមូលហេតុដែលប្រគល់ដីជូនអាជ្ញាធរ គឺដោយសារការស្រឡាញ់កម្ពុជា និងចង់ឱ្យមានសួនច្បារ ដែលអ្នកនៅទីក្រុងអាចមកលេងបាន។

រដ្ឋបាលរាជធានីភ្នំពេញ ធ្លាប់បានបញ្ជាក់ដែរថា ដីសួនច្បារមួយកន្លែងខាងលើនេះ រដ្ឋបាលរាជធានីភ្នំពេញ នឹងស្ថាបនាឡើងអោយក្លាយជាកន្លែងកម្សាន្តសាធារណៈ មានសួនច្បារ មានដើមឈើ កន្លែងហាត់ប្រាណ មានជាផ្លូវសម្រាប់ធាក់កង់ ជាមួយកសាងជាហេដ្ឋារចនាសម្ព័ន្ធ ជាច្រើនទៀត ដូចជារៀបចំជាបន្ទប់ទឹកសាធារណៈ ការកាយប្រឡាយបង្ហូរទឹកជាដើម។ ចំពោះសួនច្បារមួយកន្លែងនេះដែរ រដ្ឋបាលរាជធានីភ្នំពេញ បានឱ្យជំនាញចុះសិក្សារួចរាល់ហើយ ក្រោយពីស្ថាបនារួចរាល់ រដ្ឋបាលរាជធានីភ្នំពេញនឹងអញ្ជើញ ក្រុមគ្រួសារសពលោក KOJI Kanzaki គឺលោកស្រី MICHIKO, Kanzaki ព្រមទាំងកូនបង្កើតមកពិនិត្យជាថ្មី៕