៩ខែ ឆ្នាំ២០២៥ កម្ពុជា រកចំណូលបានជិត ៥៥០លានដុល្លារ ពីការនាំចេញជ័រកៅស៊ូ និងឈើកៅស៊ូ

• 20 ខែ​តុលា 2025
• Uncategorized @km
• 3 មើល

រយៈពេល៩ខែ ឆ្នាំ២០២៥ ពោលចាប់ពីខែមករា ដល់ខែកញ្ញា កម្ពុជា រកចំណូលពានជិត ៥៥០លានដុល្លារ ពីការនាំចេញជ័រកៅស៊ូ និងឈើកៅស៊ូ កើនជាង ៣៨% បើធៀបនឹងឆ្នាំមុន។ នេះបើតាមរបាយការណ៍របស់អគ្គនាយកដ្ឋានកៅស៊ូ ដែលចេញផ្សាយដោយសាព័ត៌មានក្នុងស្រុក កាលពីថ្ងៃទី១៤ ខែតុលា ឆ្នាំ២០២៥។

របាយការណ៍ដដែល បានបញ្ជាក់ថា ចំណូលសរុបរយៈពេល៩ខែ ពីការនាំចេញជ័រកៅស៊ូ និងឈើកៅស៊ូ មានចំនួន ៥៤៩.៧៨១.៥៤៤ដុល្លារ ក្នុងនោះ ចំណូលពីការនាំចេញ ជ័រកៅស៊ូ ចំនួន ៣៩០.០២០. ៦៤៩ដុល្លារ, ចំណូលលក់ជ័រកៅស៊ូក្នុងស្រុក ចំនួន ១៥៦.៥០៤.៦៤៧ និងចំណូលពីការនាំចេញឈើកៅស៊ូ ចំនួន ៣.២៥៦.២៤៨ដុល្លារ។

ក្នុងរយៈពេល ៩ខែនេះដែរ កម្ពុជាបាននាំចេញជ័រកៅស៊ូ បានចំនួន ២២០.២៤០តោន ថយចុះចំនួន ២៨ .២៩៥តោន ស្មើនឹង១១.៤% ធៀបនឹងរយៈពេលដូចគ្នានៃឆ្នាំមុន។ រីឯការនាំចេញឈើកៅស៊ូវិញ សម្រេចបានចំនួន ១៤.៣២៦ម៉ែត្រគូប។ សម្រាប់តម្លៃលក់ជ័រកៅស៊ូមធ្យម រយៈពេល ៩ខែនេះ គឺថ្លៃ ១.៧៧១ដុល្លារ ក្នុងមួយតោន បានកើនឡើងចំនួន ១៨៥ដុល្លារ ក្នុងមួយតោន ស្មើនឹង១១.៧% ធៀបនឹងរយៈពេលដូចគ្នានៃឆ្នាំមុន។

សូមរម្លឹកថា ក្នុងឆ្នាំ២០២៤ កន្លងទៅ កម្ពុជារកចំណូលបាន ពីការលក់ផលិតផលកៅស៊ូជាង ៦៧១លានដុល្លារ កើនឡើងប្រមាណចំនួន ៦.២លានដុល្លារ ស្មើនឹង ១.២% ធៀបឆ្នាំ២០២២៕