ទីក្រុងអូឡាំព្យាផ្តល់កម្ចី ៩៥% រយៈពេល ២៥ឆ្នាំ
ដើម្បីជួយសម្រួលដល់អតិថិជនដែល ចង់បានលំនៅដ្ឋានក្នុងក្តីស្រមៃ របស់ខ្លួននៅក្នុងគម្រោងទីក្រុង អូឡាំព្យា ក្រុមហ៊ុនអភិវឌ្ឍន៍បានសម្រេចផ្តល់ជូនកម្ចីរហូតដល់ ៩៥% នៃតម្លៃយូនីត ដែលអាចបង់រំលស់រហូតដល់២៥ឆ្នាំ។
អភិវឌ្ឍដោយក្រុមហ៊ុន Oversea Cambodian Investment Corporation (OCIC) ដែលជាក្រុមហ៊ុនអភិវឌ្ឍន៍អចលនទ្រព្យឈានមុខគេនៅកម្ពុជា បានស្ថាបនាគម្រោងជាច្រើន។ ទីក្រុងអូឡាំព្យា ក៏ដូចជាគម្រោងភាគច្រើនរបស់ អូ.ស៊ី.អាយ.ស៊ី គឺត្រូវបានផ្តល់ ហិរញ្ញប្បទានដោយធនាគារកាណាឌីយ៉ា ដែលជាក្រុមហ៊ុនបុត្រសម្ព័ន្ធផ្នែកហិរញ្ញវត្ថុរបស់ OCIC ផងដែរ។
គម្រោងទីក្រុងអូឡាំព្យាដ៏មហិមានេះមានចំនួន ១៣អគារ ដែលសាងសង់លើផ្ទៃដីសរុប ចំនួន ៦ហិចតា ស្ថិតនៅភាគខាងជើងពហុ-កីឡដ្ឋានជាតិអូឡាំពិក។ ទីក្រុងដែលបាន ទទួលជ័យលាភី អចលនទ្រព្យនេះរួមមាន អគារកម្ពស់ ២៥ជាន់ ចំនួន ៥អគារ កម្ពស់ ២០ជាន់ ចំនួន ៥អគារ កម្ពស់ ៦០ជាន់ ចំនួន ១អគារ រួមទាំងផ្សារទំនើបមួយផងដែរ។
ជាមួយនឹងគោលនយោបាយកម្ចីថ្មី អតិថិជន គ្រាន់តែបង់ប្រាក់តម្កល់តែ ៣០០០ដុល្លារ អាមេរិចតែប៉ុណ្នោះ ដើម្បីកក់ខុនដូរដែលខ្លួនពេញចិត្តនៅក្នុងចំណោមខុនដូរនៅក្នុងអគារ កម្ពស់២០ជាន់ ទាំងប្រាំអគារ ហើយទទួល កម្ចីពីធនាគារកាណាឌីយ៉ារហូតដល់ ៨៥% នៃតម្លៃផ្ទះ។ អតិថិជនអាចបង់រំលស់រហូតដល់ទៅ២៥ឆ្នាំ ជាមួយនឹងអត្រាការប្រាក់ ៦,៥%។
អត្រាកម្ចីពិសេសបានផ្តល់ជូនទៅបន្ទប់ការិយាល័យ និងផ្ទះការិយាល័យដែលអាចទទួលបានកម្ចីរហូតដល់៩៥%នៃតម្លៃយូនីត ដែលអាចបង់រំលស់រហូតដល់ទៅ២៥ឆ្នាំ។
ខណៈដែលតម្លៃក្នុងមួយយូនីត ចាប់ពី ១០០.០០០ដុល្លាអាមេរិច ក្រុមហ៊ុនអភិវឌ្ឍន៍ ធានាជួលត្រឡប់ពីអតិថិជនវិញ ក្នុងរយៈពេល បីឆ្នាំជាមួយនឹងអត្រាចំណេញលើសពី ២១%។
ដោយការសាងសង់កំពុងបន្តទៅមុខយ៉ាងលឿន អគារខុនដូរពីរនៅក្នុងទីក្រុង អូឡាំព្យា នឹងបើកដំណើរការជូនអតិថិជន និងអាជីវកម្មនានាក្នុងឆ្នាំ ២០១៧ នេះ បន្ត ដោយការបើកដំណើរការអចលនទ្រព្យនានាជាបន្តបន្ទាប់។ ក្រុមហ៊ុន OCIC បានបញ្ជាក់កាលពីចុងពាក់កណ្តាលខែធ្នូ ឆ្នាំ២០១៦ ថាខុនដូរទី១ (C1) និងខុនដូរទី២ (C2) នឹងបើកឲ្យចូលស្នាក់នៅ និងប្រើប្រាស់នៅក្នុងឆ្នាំ ២០១៧។
ខុនដូរទី ៣ (C3) និងខុនដូរទី ៤ (C4) និងសម្ពោធនៅចុងឆ្នាំ ២០១៧។ អគារខុនដូរទាំងបួននេះ ស្ថិតនៅក្នុងចំណោមអគារកម្ពស់ ២០ជាន់ ទាំង៥ ដែលត្រូវបានសាងសង់នៅ ក្នុងដំណាក់កាលដំបូងគេ។ ក្រុមហ៊ុននឹងបើកដំណើរការអគារផ្សេងៗ និងចលនទ្រព្យបន្ត បន្ទាប់គ្នាចាប់ពីចុងឆ្នាំនេះតទៅ។
បន្ទាប់ពីការសាងសង់បញ្ចប់ជាស្ថាពរ គម្រោងទីក្រុងអូឡាំព្យា នឹងរួមមានផ្សារទំនើប Olympic Plaza អចលនទ្រព្យ ពាណិជ្ជកម្ម នានា ផ្ទះអាជីវកម្ម (Shop House) ខុនដូរ មជ្ឈមណ្ឌលពាណិជ្ជកម្ម ស្កាយបារ និងសួន ទឹកកម្សាន្ត។
លក្ខណៈពិសេសរបស់ទីក្រុងអូឡាំព្យា គឺជាការរួមបញ្ចូលគ្នាយ៉ាងល្អវិចិត្ររវាងអាជីវកម្ម និងបែបបទជីវិតនៅកន្លែងតែមួយ។ អគារផ្ទះល្វែងអាជីវកម្មដែលមានកម្ពស់ ៤ជាន់ត្រូវបានរចនាឡើងសម្រាប់បម្រើឲ្យទាំងគោលបំណងអាជីវកម្ម និងការរស់នៅ ដែលអនុញ្ញាតឲ្យអតិថិជនអាចប្រកបរបរអាជីកម្មផ្សេងៗនៅជាន់ទី១ និងជាន់ទី២ ហើយអាចរស់នៅនៅជាន់ទី៣ និងទី៤។ នៅពីលើផ្ទះល្វែងអាជីវកម្មគឺជាអគារខុនដូរដែលត្រូវបានស្ថាបនាចាប់ពីជាន់ទី៦ ទៅរហូតដល់ជាន់ទី២០ និងខ្ពស់ជាងនេះ។
ក្រុមហ៊ុនអភិវឌ្ឍន៍ថ្មីៗនេះបានស្នើគម្រោង សាងសង់ស្ពានអាកាសសម្រាប់អ្នកថ្មើរជើង នៅតាមបណ្តោយគម្រោងនេះទៅរដ្ឋាភិបាលដើម្បីជួយសម្រួលដល់ការធ្វើដំណើរឆ្លងកាត់របស់អ្នកថ្មើរជើងក៏ដូចជាជួយឲ្យមានប្រជាជនធ្វើដំណើរឆ្លងកាត់គម្រោងនេះកាន់តែច្រើនផងដែរ។
ដោយសារតែការរចនាដ៏ល្អឆើតឆាយ និងការសាងសង់ប្រកបដោយគុណភាព និងសាងសង់ដោយក្រុមហ៊ុនអភិវឌ្ឍន៍ដែលមានកេរិ៍្តឈ្មោះល្បីរន្ទឺ ទីក្រុងអូឡាំព្យាបានទទួលពានរង្វាន់ជាច្រើនពីកម្មវិធីពានរង្វាន់អចលនទ្រព្យកម្ពុជាឆ្នាំ ២០១៦ (Cambodia Property Awards) កាលពីដើមឆ្នាំនេះ ដែលមានគម្រោងអចលនទ្រព្យជាច្រើនបានចូលរួម ប្រកួតប្រជែង។
ក្រៅពីឈ្នះពានរង្វាន់ “ការអភិវឌ្ឍន៍ចម្រុះដ៏ល្អជាងគេ” ទីក្រុងអូឡាំព្យា បានឈ្នះតំណែង “គម្រោងដែលត្រូវផ្តល់អនុសាសន៍ខ្ពស់” សម្រាប់ការរចនា ស្ថាបត្យកម្មបែបលំនៅស្ថាន ដ៏ល្អបំផុតលំដាប់អគារកម្ពស់ទាប និងការកត់សម្គាល់ពិសេសសម្រាប់ទំនួលខុសត្រូវសង្គម និងការអភិវឌ្ឍន៍អគារខុនដូរដ៏ល្អបំផុត។ ក្រុមហ៊ុនអភិវឌ្ឍន៍ OCIC ក៏បានឈ្នះតំណែង អានុសាសន៍ខ្ពស់សម្រាប់អ្នកអភិវឌ្ឍន៍ដ៏ល្អបំផុតដែរ ពីកម្មវិធីពានរង្វាន់អចលនទ្រព្យលំដាប់ខ្ពស់មួយនេះ។
បន្ទាប់ពីទទួលបានការអនុញ្ញាតសាងសង់ពីរដ្ឋាភិបាលកាលពីឆ្នាំ ២០១១ ក្រុមហ៊ុន OCIC បានចាប់ផ្តើមសាងសង់គម្រោងនេះនៅក្នុងឆ្នាំ២០១២ នឹងរំពឹងថានឹងបញ្ចប់ទាំងស្រុងនៅឆ្នាំ ២០១៨ លោក ងួន ហាន់រិទិ្ធ ប្រធានការដ្ឋាននៃទីក្រុងអូឡាំព្យាបានប្រាប់ទស្សនាវដ្តីសំណង់ និងអចលនទ្រព្យកាលពីឆ្នាំ២០១៣។
លោកហាន់រិទិ្ធ បានពន្យល់ថាការសាងសង់គម្រោងនេះត្រូវបានបែងចែកជាបីដំណាក់កាលមុននឹងបើកដំណើរការសាងសង់សណ្ឋាគារ ៥០០បន្ទប់។
នៅក្នុងដំណាក់កាលទី១ ដែលត្រូវបាន សាងសង់ចាប់ពីឆ្នាំ ២០១២ ទៅឆ្នាំ ២០១៤ បានផ្តោតលើការងារគ្រឹះ និងការសាងសង់ផ្ទះ អាជីវកម្ម និងអគារខុនដូរកម្ពស់ ២០ជាន់។ នៅដំណាក់កាលទី២ ចាប់ពីឆ្នាំ ២០១៤ ទៅឆ្នាំ ២០១៦ ផ្តោតលើការសាងសង់អគារ កម្ពស់មធ្យមនានា និងដំណាក់កាលទីបី ចាប់ពីឆ្នាំ ២០១៦ រហូតដល់ឆ្នាំ ២០១៨ នឹង ផ្តោតលើការសាងសង់អគារកម្ពស់ ៦០ ជាន់ និងផ្សារទំនើប។
“ប្រជាជនភាគច្រើនតែងតែឃើញទីក្រុង ទំនើបៗ នៅបរទេសដូចជាប្រទេសថៃហើយ សាធារណៈជនភាគច្រើនស្គាល់តែការអភិវឌ្ឍន៍ប្រណីតៗមួយចំនួនប៉ុណ្ណោះនៅភ្នំពេញ ប៉ុន្តែទីក្រុងអូឡាំព្យា នឹងបង្ហាញជូនសាធារណៈជន នូវទីក្រុងដ៏ប្រណីតបំផុតផុសនៅកណ្តាលទីក្រុងភ្នំពេញដែលនៅក្បែរពួកគេ”។ លោក ហាន់រិទិ្ធ បានថ្លែងយ៉ាងដូច្នេះ។
ក្រុមហ៊ុនអភិវឌ្ឍន៍ OCIC មានការរំពឹង ខ្ពស់សម្រាប់គម្រោងនេះ ដោយជឿជាក់ថាវា នឹងក្លាយជាទីក្រុងដ៏ប្រណីតបំផុតនៅកម្ពុជាដែលអាចប្រៀបធៀបជាមួយនឹងទីក្រុងនានានៅប្រទេសជិតខាងបាន៕
- Video Advertisement -
English 
ខ្មែរ 
