ការសិក្សាគម្រោងផ្លូវរថភ្លើងទាំង៣ ប្រភេទនឹងបញ្ចប់នៅខែមីនានេះ ខណៈរដ្ឋកំពុងស្វែងរកទុន

• 16 ខែ​កុម្ភៈ 2021
• Uncategorized @km
• 8 មើល

រដ្ឋាភិបាលកំពុងរង់ចាំលទ្ធផលការសិក្សាលទ្ធភាពគម្រោងផ្លូវរថភ្លើងក្រោមដីនៅរាជធានីភ្នំពេញ ដែលនឹងបញ្ចប់នៅខែ មីនា ខាងមុខនេះ ដើម្បីយកទៅប្រៀបធៀបនឹងការសិក្សាដែលបានបញ្ចប់រួចហើយ ២ ទៀត ពោលគឺ រថភ្លើងលើអាកាស AGT និងរថភ្លើង Mono Rail មុននឹងសម្រេចថាសង់ប្រភេទរថភ្លើងមួយណា។

ក្នុងអំឡុងពេលនេះដែរ រដ្ឋាភិបាលក៏កំពុងស្វែងរកប្រភពហរិញ្ញប្បទានដើម្បីយកមកអនុវត្តន៍គម្រោង នេះបើយោងតាមប្រសាសន៍របស់ឯកឧត្តម ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ក្នុងសន្និបាតបូកសរុបលទ្ធផលការងារឆ្នាំ២០២០ កាលពីព្រឹកថ្ងៃទី ១៦ កុម្ភៈ នេះ។

ឯកឧត្តម បានមានប្រសាសន៍ថា៖ «ដំបូងយើងឱ្យខាងជប៉ុនសិក្សារថភ្លើងលើអាកាសដែលបើកបរដោយស្វ័យប្រវត្តិឬ AGT តែអាចនឹងចំណាយថវិកាអស់ដល់ជាង ២ ពាន់លាន ដូច្នេះយើងរកទុនមិនបាន ទើបយើងឱ្យក្រុមហ៊ុនឯកជន [ចិន] ២ ទៀត សិក្សាគម្រោង Monorail និង រថភ្លើងក្រោមដី»។

«ពេលនេះ Monorail បានសិក្សាចប់រួចរាល់ហើយ ដោយនៅខែក្រោយរថភ្លើងក្រោមដីក៏នឹងចប់ហើយដែរ។ បន្ទាប់មក យើងនឹងយកជម្រើសទាំង ៣ នេះទៅរាយការណ៍ជូនសម្ដេចតេជោហ៊ុន សែន ដើម្បីយើងរកថវិកាប្រភពទុនមកកសាង» ឯកឧត្តម បានបន្ត។

ទាក់ទិននឹងប្រភពទុន ឯកឧត្តមរដ្ឋមន្រ្តី សង្ឃឹមថាក្រុមហ៊ុនឯកជននឹងចូលរួមក្នុងការសាងសង់គម្រោងនេះក្នុងលក្ខខណ្ឌ សាងសង់-ប្រតិបត្តិការ-ផ្ទេរ ឬ BOT។ បើក្រុមហ៊ុនឯកជនជួយវិនិយោគពិតមែន គម្រោងនេះអាចនឹងជួយកាត់បន្ថយការស្ទះចរាចរណ៍ និងលើកមុខមាត់ទីក្រុងភ្នំពេញបានមួយកម្រិតធំ។

• Technology and Engineering
• គម្រោងអភិវឌ្ឍន៍
• ផ្លូវ និងហេដ្ឋារចនាសម្ព័ន្ធ
• ការវិនិយោគ និងមូលធន
• បច្ចេកវិទ្យា និងវិស្វកម្ម
• Investment and Funding
• Road and Infrastructure
• Projects Development
• គម្រោងអភិវឌ្ឍន៍
• ការវិនិយោគ និងមូលធន