រដ្ឋជំរុញការអភិវឌ្ឍហេដ្ឋារ​ចនាសម្ព័ន្ធសំខាន់ៗ២ សម្រាប់វិស័យយានយន្ត និងអេឡិចត្រូនិច

• 24 ខែ​មករា 2023
• ព័ត៌មានក្នុងស្រុក
• 11 មើល

រាជរដ្ឋាភិបាលកម្ពុជា ត្រូវធ្វើការអភិវឌ្ឍហេដ្ឋារចនសម្ព័ន្ធធំៗសំខាន់ ០២ ដើម្បីជំរុញការវិនិយោគវិស័យយានយន្ត និងអេឡិចត្រូនិច។ នេះបើតាមផែនទីបង្ហាញផ្លូវការអភិវឌ្ឍវិស័យយានយន្ត និងអេឡិចត្រូនិច ដែលបានអនុម័តកាលពីថ្ងៃទី០៩ ខែធ្នូ ឆ្នាំ២០២៣។

ក្នុងការជំរុញវិស័យយានយន្ត និងអេឡិចត្រូនិច ផែនទីបង្ហាញផ្លូវនេះ បានកំណត់នូវវិធានការគន្លឹះជាអាទិភាពចំនួន ២០ តាមផ្នែកចំនួន ៥រួមមាន ១.យុទ្ធសាស្ត្រ និងការសម្របសម្រួលស្ថាប័ន ២.ធនធានមនុស្ស និងនវានុវត្តន៍ ៣.ហេដ្ឋារចនាសម្ព័ន្ធ ៤.កិច្ចសម្រួលពាណិជ្ជកម្ម និង៥.បរិយាកាសធុរកិច្ច និងវិនិយោគ។

ក្នុងនោះ រដ្ឋត្រូវអភិវឌ្ឍហេដ្ឋារចនាសម្ព័ន្ធសំខាន់ៗចំនួន ០២ រួមមាន៖

• តម្រូវការក្នុងការធ្វើឱ្យប្រសើរឡើងហេដ្ឋារចនាសម្ព័ន្ធអគ្គិសនី៖​ រដ្ឋនឹងធ្វើការវិនិយោគលើហេដ្ឋារចនាសម្ព័នន្ធអគ្គិសនីថ្មី ដែលមានភាពកាន់តែប្រសើរឡើង ក៏ដូចជាការធ្វើពិពិធកម្មទៅរកប្រភពថាមពលថ្មីៗ (ឧទាហារណ៍ ថាមពលពន្លឺព្រះអាទិត្យ និងថាមពលកកើតឡើងវិញ)
• តម្រូវការក្នុងការធ្វើឱ្យប្រសើរឡើងហេដ្ឋារចនាសម្ព័ន្ធដឹកជញ្ជូន និងភស្តុភាកម្ម៖ កម្ពុជា នឹងបន្តវិនិយោគលើហេដ្ឋារចនាសម្ព័ន្ធដឹកជញ្ជូននិងភស្តុភារកម្មពហុមធ្យោបាយ ហើយជំរុញការធ្វើសុខដុមនីយកម្មបទប្បញ្ញត្តិនានាពាក់ព័ន្ធនឹងការដឹកជញ្ជូនឆ្លងកាត់ព្រំដែន ដើម្បីធ្វើឱ្យការដឹកជញ្ជូនទំនិញកាន់តែមានប្រសិទ្ធភាព និងចំណាយតិច។

ដើម្បីបំពេញតម្រូវការទាំងនេះ រដ្ឋនឹងចាត់វិធានការអាទិភាព រួមមាន៖

• អនុវត្តផែនការវិនិយោគហេដ្ឋារចនាសម្ព័ន្ធអគ្គិសនី
• ពិនិត្យឡើងវិញនូវអត្រាថ្លៃអគ្គិសនី និងស្ថិរភាពនៃការផ្គត់ផ្គង់
• អនុវត្តផែនការការអភិវឌ្ឍន៍វិស័យហេដ្ឋារចនាសម្ព័ន្ធដឹកជញ្ជូន
• ធ្វើសុខដុមនីយកម្ម (សម្រួល) បទប្បញ្ញត្តិស្តីពីការដឹកជញ្ជូនផ្លូវគោកឆ្លងកាត់ព្រំដែនជាមួយប្រទេសជិតខាង (ឧទាហរណ៍៖ ប្រទេសថៃ វៀតណាម និងឡាវ)។

ក្នុងការដាក់ចេញនូវផែនទីបង្ហាញផ្លូវនេះ កម្ពុជារំពឹងថានឹងបង្កើនទំហំនាំចេញក្នុងវិស័យយានយន្តប្រមាណ ៥០០លានដុល្លារអាម៉េរិក និងក្នុងវិស័យអេឡិចត្រូនិកប្រមាណ ១,៦ពាន់លានដុល្លារអាមេរិក នៅត្រឹមឆ្នាំ២០២៧។

បន្ថែមពីនេះ វាអាចបង្កើតការងារថ្មីក្នុងវិស័យយានយន្តប្រមាណ ១០ ០០០កន្លែង និងក្នុងវិស័យអេឡិចត្រូនិកប្រមា​ណ ១៦ ០០០កន្លែង នៅត្រឹមឆ្នាំ២០២៧ ផងដែរ។

• Road and Infrastructure