បច្ចុប្បន្នកម្ពុជាខាតបង់ថវិកា​ជាង ៥០០លានដុល្លារក្នុងមួយឆ្នាំ លើគ្រោះថ្នាក់ចរាចរ

• 21 ខែ​មីនា 2023
• ព័ត៌មានក្នុងស្រុក
• 13 មើល

បច្ចុប្បន្នកម្ពុជាខាតបង់ថវិកាជាតិប្រមាណ ៥០០លានដុល្លារ ក្នុងមួយឆ្នាំ ទៅលើបញ្ហាគ្រោះថ្នាក់ចរាចរ នេះតាមប្រសាសន៍ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីសាធារណការ និងដឹកជញ្ជូន បានលើកឡើងនៅថ្ងៃទី២០ មីនា ២០២៣។

ឯកឧត្តមបានបញ្ជាក់ថា យោងតាមការសិក្សារបស់ UNDP បានឱ្យដឹងថា ការខូចខាតសរុបពីគ្រោះថ្នាក់ចរាចរណ៍នៅក្នុងប្រទេសកម្ពុជាបានធ្វើឱ្យប៉ះពាល់ដល់អាយុជីវិតមនុស្ស​​សត្វ ខូចខាតទ្រព្យសម្បត្តិ ព្រមទាំងខាតបង់ថវិកាជាតិប្រមាណ​៥០០លានដុល្លារអាមេរិក​ក្នុងមួយឆ្នាំ។

ឯកឧត្តមបន្ថែមថា «សូមគោរពច្បាប់ចរាចរណ៍ទាំងអស់គ្នា កុំឱ្យមានគ្រោះថ្នាក់ចរាចរណ៍ ដែលធ្វើឱ្យប្រជាពលរដ្ឋស្លាប់ប្រហែលជា ៥នាក់ជាមធ្យមក្នុងមួយថ្ងៃ របួសពី១០ ទៅ១៥នាក់ ខូចខាតថវិកាជាតិនិងផ្ទាល់ខ្លួនផងប្រហែល ៥០០លានដុល្លារអាមេរិក»។

ទន្ទឹមគ្នានេះ លោកទេសរដ្ឋមន្ត្រីបានស្នើដល់ពលរដ្ឋឱ្យចូលរួមគោរពច្បាប់ចរាចរណ៍ទាំងអស់គ្នា ជាពិសេសត្រួតត្រួតពិនិត្យបច្ចេកទេសយានយន្តជានិច្ចកុំធ្វេសប្រហែល ដើម្បីការពារអាយុជីវិតរបស់ខ្លួន និងអ្នកដទៃនៅតាមដងផ្លូវ៕

• Road and Infrastructure