Bentley បង្កើត Infrastructure AI ពិសេសដែលយល់ច្បាស់រឿងសំណង់

1 ខែវិច្ឆិកា 2025
ព័ត៌មានអន្តរជាតិ
4 មើល

ការប្រើ AI ដោយត្រឹមត្រូវ និងសមស្របនឹងជួយឱ្យការងាររបស់យើងមានប្រសិទ្ធភាពជាងមុន ប៉ុន្តែមិនមែន AI មួយអាចប្រើបានក្នុងគ្រប់យ៉ាងនោះទេ។ ក្នុងវិស័យនីមួយៗ ត្រូវការ AI ផ្ទាល់ ដើម្បីបំពេញការងារបានល្អ និងមានប្រសិទ្ធភាព។

ក្រុមហ៊ុន Bentley Systems ដែលជាក្រុមហ៊ុនបង្កើតកម្មវិធីវិស្វកម្មសំណង់ឆ្លាតវៃលំដាប់ពិភពលោក ថ្មីៗនេះបានបង្កើត AI ពិសេសថ្មីមួយសម្រាប់វិស័យសំណង់ដែលហៅថា AI Infrastructure ឬ Bentley Copilot ដើម្បីឆ្លើយតបទៅកង្វះវិស្វករ និងកំណើនតម្រូវការហេដ្ឋារចនាសម្ព័ន្ធពិភពលោក។

AI ថ្មីនេះត្រូវបានបញ្ចូលទៅក្នុងស្ទើរគ្រប់កម្មវិធីដែលមានស្រាប់របស់ Bentley Systems ។ AI ថ្មីនេះ នឹងជួយសម្រួលការងាររបស់វិស្វករបានមួយចំណែកធំ ពោលគឺវិស្វករនឹងមានពេលផ្ដោតលលើការងារស្នូលជាងមុន ហើយប្រើឱ្យ AI ធ្វើការងារបន្ទាប់សន្សំជំនួស។

បើយោងតាមលោក Ian Rosam នាយកផ្នែកគ្រប់គ្រងផលិតផលសម្រាប់កម្មវិធីវិស្វកម្មស៊ីវិលរបស់ Bentley ភាពពិសេសរបស់ Infrastructure AI នេះ គឺចំណេះដឹងរឿងសំណង់ វិស្វកម្ម និងស្ថាបត្យកម្មយ៉ាងច្បាស់ ដូច្នេះនៅពេលដែលយើងសួរសំណួរ ឬបញ្ជាអ្វីមួយវានឹងធ្វើការបានយ៉ាងត្រឹមត្រូវ។

លោក Ian Rosam បន្ដថា ដូចដែលបានដឹងស្រាប់ AI ធ្វើការបានល្អ ឬមិនល្អ អាស្រ័យលើទិន្នន័យដែលយើងបង្រៀនវា។ AI របស់ Bentley គឺមានប្រសិទ្ធភាពខ្ពស់ដោយសារតែយើងបង្រៀនវាដោយប្រើទិន្នន័យសំណង់ដ៏សន្ធឹកសន្ធាប់ដែលយើងមានក្នុងដៃ។ ទិន្នន័យជាច្រើនឆ្នាំដែលយើងបានសន្សំមកនេះគឺធ្វើឱ្យ AI របស់យើងមានចំណេះដឹងផ្នែកសំណង់យ៉ាងជ្រៅជ្រះ ខុសពី AI ទូទៅធម្មតា។

ការប្រើ AI បូកផ្សំនឹងភាពឆ្លាតវៃនៃកម្មវិធីរបស់ Bentley ដែលមានស្រាប់ ព្រមជាមួយនឹង Cloud និង Geospatial Modeling ដែលត្រូវបានបញ្ចូលបន្ថែម ធ្វើឱ្យការងាររៀបចំផែនការ គ្រប់គ្រង និងអនុវត្តសំណង់ ធ្វើទៅបានលឿនជាងមុនដល់ទៅ 10 ដង។

ឧទាហរណ៍ ដើម្បីគូរប្លង់គម្រោងអគារមួយ ពីមុនអ្នកត្រូវមានចំណេះដឹងលើការគូរប្លង់ និងវិស្វកម្ម និងចេះប្រើកម្មវិធីផ្សេងៗជាច្រើន។ ប៉ុន្តែ ឥឡូវ អ្នកគ្រាន់តែបញ្ចូលនូវទិន្នន័យអំពីអ្វីដែលអ្នកចង់បាន ហើយបញ្ជាទៅ AI នៅក្នុងកម្មវិធីរបស់ Bentley បន្ទាប់មកវាចេញជាប្លង់ឱ្យអ្នក។ ពោលគឺដូចជាអ្នកមានលេខាជា AI ដូច្នោះ។ (អានបន្ថែម)

ជាក់ស្ដែងដូចជា កម្មវិធី OpenSite+ និង OpenUtilities Substation+ ឥឡូវនេះត្រូវបានបំពាក់ដោយបញ្ញា (AI) ដើម្បីជួយដល់លំហូរការងារវិស្វកម្ម។

ឧទាហរណ៍ នៅក្នុងកម្មវិធីដូចជា OpenSite+ វិស្វករវអាចប្រើប្រាស់ពាក្យបញ្ជាជាភាសាធម្មជាតិ – វាយឬនិយាយ – ដើម្បីអនុវត្តការគណនាស្មុគស្មាញដែល AI យល់តាមបរិបទ។ ពួកគេមិនចាំបាច់វាយបញ្ចូលកូដ ឬរូបមន្តស្មុគស្មាញនោះទេ។

OpenSite+ ជាកម្មវិធីដំបូងបង្អស់ដែលអាចឱ្យវិស្វករធ្វើការលឿនជាងមុនគួរឱ្យកត់សម្គាល់ ដោយផ្តល់លទ្ធផលគម្រោងលឿនជាងមុនដល់ ១០ ដង ដោយមិនបាត់បង់ភាពត្រឹមត្រូវឡើយ។

ផលិតផលថ្មីមួយទៀតដែលមានមុខងារ AI គឺ OpenUtilities Substation+។ វាប្រើប្រាស់ការធ្វើគំរូ 3D ឆ្លាតវៃ ជំនួយការរចនាដែលបំពាក់ដោយ AI និងលំហូរការងារ ដើម្បីធានាថាហេដ្ឋារចនាសម្ព័ន្ធចាស់របស់ពួកគេអាចឆ្លើយតបនឹងតម្រូវការសព្វថ្ងៃបាន។

Bentley ក៏កំពុងនាំយកសមត្ថភាព AI ទាំងនេះទៅកាន់កម្មវិធីវិស្វកម្មហេដ្ឋារចនាសម្ព័ន្ធដែលមានស្រាប់ផងដែរ ដោយចាប់ផ្តើមជាមួយ OpenRoads Designer និង OpenRail Designer សម្រាប់ការធ្វើគំរូគម្រោងផ្លូវថ្នល់ និងផ្លូវដែក។