កម្ពុជា និងអាល្លឺម៉ង រួមគ្នាលើកកម្ពស់ភាពប្រកួតប្រជែងសហគ្រាសដំណាក់កាលទី២ ៨លានអ៉ឺរ៉ូ

• Proeksa Meas
• 20 ខែ​តុលា 2026
• ព័ត៌មានសំណង់
• 39 មើល

ក្រុមប្រឹក្សាអភិវឌ្ឍន៍កម្ពុជា និងទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) តំណាងឱ្យរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ បានសម្រេចចុះកិច្ចព្រមព្រៀងអនុវត្តគម្រោង “ការលើកកម្ពស់ភាពប្រកួតប្រជែងនៃសហគ្រាសនៅកម្ពុជា (Implementation Agreement on Improved Competitiveness of National Enterprises Phase II – ICONE II) ដំណាក់កាលទី ២ ក្នុងទំហំទឹកប្រាក់ ៨លានអ៉ឺរ៉ូ។

កិច្ចព្រមព្រៀងនេះ ធ្វើឡើងកាលថ្ងៃទី៨ ខែតុលា ឆ្នាំ២០២៦ ក្រោមវត្តមានឯកឧត្តម ឈៀង យ៉ាណារ៉ា ទេសរដ្ឋមន្ត្រីទទួលបន្ទុកបេសកកម្មពិសេស អនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា ជាមួយលោក Hans-Juergen Cassens ប្រធានគម្រោង ICONE II នៃទីភ្នាក់ងារសហប្រតិបត្តិការអន្តរជាតិអាល្លឺម៉ង់ (GIZ) តំណាងឱ្យរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់។

ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា គម្រោងក្នុងដំណាក់កាលទី២​នេះ គម្រោងមានទំហំទឹកប្រាក់សរុបប្រមាណ ៨ លានអ៊ឺរ៉ូ សម្រាប់អនុវត្តរយៈពេល ៤ឆ្នាំ ពីឆ្នាំ២០២៦-២០៣០។

កម្ពុជា-អាល្លឺម៉ង់ ចាត់ទុកថា ការចុះកិច្ចព្រមព្រៀងលើការអនុវត្តគម្រោងនេះ គឺបានបញ្ជាក់ពីការប្តេជ្ញាចិត្តរួមគ្នា និងកិច្ចសហប្រតិបត្តិការរវាងកម្ពុជា និងអាល្លឺម៉ង់ ក្នុងការរួមចំណែកអភិវឌ្ឍន៍វិស័យឯកជន តាមរយៈការជំរុញការវិនិយោគ ការលើកកម្ពស់ផលិតភាព ការអភិវឌ្ឍសហគ្រាសធុនមធ្យមនិងធំ ការបណ្តុះបណ្តាលសហគ្រិនភាព ការបង្កើតកាលានុវត្តភាពសម្រាប់ពង្រឹងភាពជាដៃគូរវាងវិនិយោគិនក្នុងស្រុក និងវិនិយោគិនបរទេស ជាពិសេសវិនិយោគិនអឺរ៉ុប ការបង្កើនសមត្ថភាពនាំចេញ និងការលើកកម្ពស់ភាពប្រកួតប្រជែងរបស់កម្ពុជាលើទីផ្សារអន្តរជាតិ៕ (អានបន្ថែម)

• CDC
• GIZ
• Germany's aid