កម្ពុជា-អាមេរិក ចុះ MOU រួមគ្នាជំរុញគម្រោងអភិវឌ្ឍប្រព័ន្ធដឹកជញ្ជូនបៃតងនៅកម្ពុជា

• Proeksa Meas
• 25 ខែ​កក្កដា 2026
• ព័ត៌មានសំណង់
• 48 មើល

ក្រុមហ៊ុនកម្ពុជា និងក្រុមហ៊ុនអាមេរិក បានសម្រេចចុះហត្ថលេខាលើអនុស្សរណៈនៃការយោគយល់គ្នា (MOU) ដើម្បីរួមគ្នាជំរុញគម្រោងអភិវឌ្ឍប្រព័ន្ធដឹកជញ្ជូនបៃតងនៅកម្ពុជា សំដោឈានទៅលើកកម្ពស់ការធ្វើដំណើរប្រកបដោយចីរភាពនៅកម្ពុជា។ ពិធីចុះហត្ថលេខាលើ (MOU) រវាង ក្រុមហ៊ុនរបស់កូនខ្មែរ GENRICH Investment និង ក្រុមហ៊ុនអាមេរិក GRAPHION Energy Solution បានធ្វើឡើងកាលថ្ងៃទី១២ ខែកក្កដា ឆ្នាំ២០២៦ ក្រោមអធិបតីភាពសម្តេច ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ។

MoU រវាងក្រុមហ៊ុនទាំងពីរ ធ្វើឡើងក្នុងគោលបំណងជំរុញការអភិវឌ្ឍវិស័យយានជំនិះអគ្គិសនី និងលើកកម្ពស់ការធ្វើដំណើរប្រកបដោយចីរភាពនៅកម្ពុជា និងការប្តេជ្ញាចិត្តរួមគ្នារបស់ក្រុមហ៊ុនទាំងពីរក្នុងការគាំទ្រការអភិវឌ្ឍថាមពលស្អាត និងប្រព័ន្ធដឹកជញ្ជូនបៃតងនៅកម្ពុជា។

នាឱកាសនោះ លោក Ki Young Nam ស្ថាបនិកនៃ Graphion Energy Solutions បានបញ្ជាក់ថា កិច្ចសហការនេះ មានចក្ខុវិស័យ និងទិសដៅផ្តោតលើការពន្លឿនការប្រើប្រាស់យានយន្តអគ្គិសនី ការអភិវឌ្ឍបណ្តាញស្ថានីយសាកថ្ម និងការកសាងប្រព័ន្ធអេកូឡូស៊ីដែលគាំទ្រដល់ការផ្លាស់ប្តូរទៅកាន់ថាមពលស្អាត។

ជាមួយគ្នានេះ លោក Lim Lork Johnson អគ្គនាយកក្រុមហ៊ុន GenRich Investment បានស្វាគមន៍ ដោយលើកឡើងពីសារៈសំខាន់នៃកិច្ចសហការរវាងវិស័យរដ្ឋ និងឯកជន ក្នុងការទាក់ទាញការវិនិយោគ ការនាំចូលបច្ចេកវិទ្យាទំនើប និងបង្កើតឱកាសថ្មីៗសម្រាប់ការអភិវឌ្ឍវិស័យយានយន្តអគ្គិសនីនៅកម្ពុជា។

តាមរយៈ MOU ខាងលើនេះ ក្រុមហ៊ុនទាំងពីរ អះអាងថា នឹងពង្រឹងកិច្ចសហប្រតិបត្តិការ និងជំរុញការអនុវត្តគម្រោងដែលនឹងរួមចំណែកដល់ការអភិវឌ្ឍប្រព័ន្ធដឹកជញ្ជូនបៃតងរបស់ប្រទេស។ ក្នុងពិធីនេះផងដែរ ក៏បានបង្ហាញអំពីម៉ូតូអគ្គិសនី និងបច្ចេកវិទ្យាពាក់ព័ន្ធ ដែលបង្ហាញពីសមត្ថភាព និងនវានុវត្តន៍ក្នុងវិស័យយានយន្តអគ្គិសនី ព្រមទាំងការតភ្ជាប់ជាមួយដំណោះស្រាយថាមពលស្អាតដែលអាចគាំទ្រដល់ការអភិវឌ្ឍប្រកបដោយនិរន្តរភាពផងដែរ៕

• EV
• transportation
• Technology and Engineering
• green energy
• NEV