ក្រុមហ៊ុនសិង្ហបុរី Grab បង្ហាញបំណងកិច្ចសហប្រតិបត្តិការលើគោលនយោបាយយានយន្តអគ្គិសនីនៅកម្ពុជា

• Proeksa Meas
• 9 ខែ​កញ្ញា 2026
• ព័ត៌មានសំណង់
• 41 មើល

ក្រុមហ៊ុន Grab Holdings Inc. របស់ប្រទេសសិង្ហបុរី កាលថ្ងៃទី ៣១ ខែសីហា ឆ្នាំ២០២៦ បានមកជួបពិភាក្សាជាមួយក្រុមប្រឹក្សាអភិវឌ្ឍន៍កម្ពុជា ដើម្បីមកសិក្សាពីកិច្ចសហប្រតិបត្តិការលើគោលនយោបាយយានយន្តអគ្គិសនីនៅកម្ពុជា សំដៅចូលរួមចំណែកអភិវឌ្ឍសេដ្ឋកិច្ចនៅកម្ពុជា។

នាឱកាសនោះ លោកស្រី Chin Yin Ong ប្រធានផ្នែកលើកកម្ពស់សមត្ថភាពអង្គភាព នៃក្រុមហ៊ុន Grab Holdings Inc. សិង្ហបុរី បានឱ្យដឹងថា គោលបំណងជំនួបនេះ ដើម្បីពិភាក្សាផ្លាស់ប្តូរយោបល់ពាក់ព័ន្ធនឹង បច្ចុប្បន្នភាពអាជីវកម្មរបស់ក្រុមហ៊ុន និងស្វែងយល់បន្ថែមអំពីកិច្ចសហប្រតិបត្តិការជាមួយរាជរដ្ឋាភិបាល លើគោលនយោបាយយានយន្តអគ្គិសនី (EV) ការរៀបចំហេដ្ឋារចនាសម្ព័ន្ធស្ថានីយបញ្ចូលថាមពលយានយន្តអគ្គិសនី និងការចូលរួមចំណែករបស់ក្រុមហ៊ុន Grab ចំពោះបទប្បញ្ញត្តិស្តីពីការកំណត់តម្លៃសេវាកម្មដឹកជញ្ជូនតាមកម្មវិធីទូរស័ព្ទដៃនាពេលខាងមុខ។

ជាការឆ្លើយតប ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានស្វាគមន៍ប្រតិភូក្រុមហ៊ុន ខណៈឯកឧត្តមបានគាំទ្ររាល់គំនិតផ្តួចផ្តើម និងផែនការសកម្មភាពដែលប្តេជ្ញាចិត្តរបស់ក្រុមហ៊ុនក្នុងការចូលរួមចំណែកអភិវឌ្ឍន៍សេដ្ឋកិច្ចឌីជីថលនៅកម្ពុជា។

សូមជម្រាបថា តាមរយៈជំនួបនោះ ភាគីក្រុមហ៊ុនក៏បានស្នើសុំអនុសាសន៍ និងការណែនាំដើម្បីបានជាមូលដ្ឋានក្នុងការបង្កើនប្រសិទ្ធភាពនៃការអនុវត្តផែនការសកម្មភាពអាជីវកម្មរបស់ Grab នៅកម្ពុជាឱ្យកាន់តែប្រសើរឡើង ក្នុងនោះ ១. ការសិក្សាពីការបង្កើតនិងគាំទ្រមជ្ឈមណ្ឌលសហគ្រាសធុនមីក្រូ តូច និងមធ្យម (MSME Hub) ដើម្បីជួយជ្រោមជ្រែងដល់អាជីវកម្មក្នុងស្រុក ២. ការលើកកម្ពស់សមត្ថភាព និងការអភិវឌ្ឍជំនាញ, និង ៣. ការរួមចំណែកទាក់ទាញទេសចរមកកាន់កម្ពុជា តាមរយៈការរិះរកនូវយុទ្ធសាស្រ្តទីផ្សារថ្មីៗជាដើម៕ (អានបន្ថែម)

• EV
• transportation
• CDC
• Grab
• MSME