ភាពជាដៃគូកម្ពុជា-ធនាគារពិភពលោក បោះជំហានថ្មីក្នុងការផ្លាស់ប្តូរមុខមាត់ទីក្រុងតាខ្មៅតាមរយៈគម្រោងគ្រប់គ្រងសំរាម សំណល់រឹង និងផ្លាស្ទិក

Proeksa Meas
21 ខែតុលា 2026
ព័ត៌មានសំណង់
36 មើល

ការអភិវឌ្ឍទីក្រុងកាន់តែមមាញឹក កាកសំណល់ និងសំរាមតែងតែជាបញ្ហាប្រឈមដ៏ធំមួយដែលទាមទារឱ្យមានដំណោះស្រាយស៊ីជម្រៅ។ ក្នុងន័យនេះ តាមរយៈកិច្ចប្រជុំកាលពីថ្ងៃទី១៤ ខែតុលា ឆ្នាំ២០២៦ កន្លងទៅនេះ នៅទីស្តីការក្រសួងមហាផ្ទៃ ក្រោមការដឹកនាំរបស់ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង រួមជាមួយវត្តមានរបស់ថ្នាក់ដឹកនាំ និងមន្ត្រីជំនាញមកពីក្រសួងមហាផ្ទៃ ក្រសួងបរិស្ថាន អគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍នៃក្រសួងសេដ្ឋកិច្ច និងហិរញ្ញវត្ថុ ព្រមទាំងកិច្ចសហការយ៉ាងជិតស្និទ្ធពីសំណាក់លោកស្រី Katelijn Van den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារបេសកកម្មធនាគារពិភពលោក បានបង្ហាញឱ្យឃើញពីការប្ដេជ្ញាចិត្តខ្ពស់ក្នុងការដោះស្រាយបញ្ហាបរិស្ថានទីក្រុង។

កិច្ចប្រជុំបូកសរុបលទ្ធផលនៃបេសកកម្មគាំទ្រការអនុវត្តគម្រោងលើកទី៧ នេះ បានផ្តោតជាសំខាន់ទៅលើការវាយតម្លៃបេសកកម្មបច្ចេកទេស ដែលបានចាប់ផ្តើមតាំងពីថ្ងៃទី០៦ រហូតដល់ថ្ងៃទី១៤ ខែតុលា ឆ្នាំ២០២៦។ ភាគីពាក់ព័ន្ធបានជជែកវែកញែកស៊ីជម្រៅ ជាពិសេសការរៀបចំផែនការលម្អិតសម្រាប់ការរៀបចំទីតាំងលំនៅឋានឡើងវិញ និងការទូទាត់សំណង ឬហៅថា DRP សម្រាប់ក្រុងតាខ្មៅ ខេត្តកណ្តាល។ ការងារនេះត្រូវបានកំណត់ជាមូលដ្ឋានគ្រឹះដ៏សំខាន់ ដើម្បីធានាថាការអភិវឌ្ឍមិនត្រឹមតែស្អាតខាងបរិស្ថានប៉ុណ្ណោះទេ ប៉ុន្តែថែមទាំងយុត្តិធម៌ និងធានាបាននូវជីវភាពរស់នៅរបស់ប្រជាពលរដ្ឋក្នុងមូលដ្ឋានផងដែរ។

បើតាមការវាយតម្លៃរបស់លោកស្រី Katelijn Van den Berg វឌ្ឍនភាពការងារដែលគម្រោងសម្រេចបានកន្លងមក ទាមទារឱ្យមានការជំរុញដៃគូពាក់ព័ន្ធទាំងអស់ឱ្យកាន់តែសកម្មបន្ថែមទៀត។ ផែនការសកម្មភាពគន្លឹះៗត្រូវបានដាក់ចេញឱ្យទាន់ពេលវេលាកំណត់ ព្រមទាំងធានាថាស្ដង់ដារនៃការគ្រប់គ្រងសំរាម សំណល់រឹង និងផ្លាស្ទិកកម្ពុជាអាចដើរទាន់ការវិវត្តនៃសកលលោក។

ជារួម គម្រោងធ្វើឱ្យប្រសើរឡើងនូវការគ្រប់គ្រងសំរាម សំណល់រឹង និងផ្លាស្ទិក ក្រោមជំនួយហិរញ្ញប្បទានពីធនាគារពិភពលោកនេះ គឺជាស្ពានចងភ្ជាប់រវាងការប្តេជ្ញាចិត្តរបស់រាជរដ្ឋាភិបាល និងសេចក្តីត្រូវការរបស់ប្រជាជនក្នុងការទទួលបានបរិស្ថានស្អាត និងសុខុមាលភាពល្អប្រសើរ។ ភាពជោគជ័យនៅក្រុងតាខ្មៅនឹងក្លាយជាគំរូដ៏មានឥទ្ធិពលមួយសម្រាប់តំបន់ផ្សេងទៀតក្នុងប្រទេសកម្ពុជា។ (អានបន្ថែម)

- Video Advertisement -