ក្រសួងសាធារណការ ពិនិត្យការសិក្សាបច្ចេកទេសតំណភ្ជាប់បណ្តាញទឹកកខ្វក់តាមខ្នងផ្ទះ សម្រាប់ក្រុងតាខ្មៅ

Proeksa Meas
18 ខែតុលា 2026
ព័ត៌មានសំណង់
26 មើល

ឯកឧត្តម រស់ វណ្ណា ដឹកនាំជំនួបបច្ចេកទេសជាមួយក្រុមទីប្រឹក្សា Dohwa-Seoyoung ដើម្បីគ្រប់គ្រងថវិកាកម្ចី EDCF របស់កូរ៉េខាងត្បូង និងធានាការប្រមូលទឹកកខ្វក់គ្រប់ខ្នងផ្ទះស្របតាមស្តង់ដារបរិស្ថាន

រាជធានីភ្នំពេញ៖ ការរៀបចំប្រព័ន្ធប្រមូល និងប្រព្រឹត្តិកម្មទឹកកខ្វក់ឱ្យបានត្រឹមត្រូវចាប់ពីប្រភពដើមតាមខ្នងផ្ទះនីមួយៗ បានក្លាយជាជំហានបច្ចេកទេសយ៉ាងសំខាន់ ក្នុងការធានាថា ហេដ្ឋារចនាសម្ព័ន្ធអនាម័យក្រុងអាចប្រតិបត្តិការបានពេញលេញ ប្រកបដោយប្រសិទ្ធភាព និងសុវត្ថិភាពបរិស្ថាន។ តាមរយៈកិច្ចប្រជុំកាលពីថ្ងៃទី៣០ ខែកញ្ញា ឆ្នាំ២០២៦ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារអនុវត្តគម្រោង ចូលរួមកិច្ចប្រជុំពិនិត្យ និងពិភាក្សាការងារបច្ចេកទេសជាមួយតំណាងក្រុមទីប្រឹក្សាបច្ចេកទេស Dohwa-Seoyoung Joint Venture នៅទីស្តីការក្រសួង។ កិច្ចប្រជុំនេះមានការចូលរួមពី ឯកឧត្តមនាយករងគម្រោង ប្រធានគ្រប់គ្រងគម្រោង ថ្នាក់ដឹកនាំ និងមន្ត្រីជំនាញនៃអគ្គនាយកដ្ឋានប្រព័ន្ធចម្រោះទឹកកខ្វក់ ព្រមទាំងទីប្រឹក្សា និងសមាជិកគម្រោងពាក់ព័ន្ធជាច្រើនរូប។

កិច្ចប្រជុំបានផ្តោតការពិភាក្សា និងពិនិត្យយ៉ាងស៊ីជម្រៅលើការសិក្សាបច្ចេកទេសលម្អិតនៃការងារតំណភ្ជាប់បណ្តាញតាមខ្នងផ្ទះ (Household Connection) សម្រាប់ «គម្រោងអភិវឌ្ឍន៍ប្រព័ន្ធប្រព្រឹត្តិកម្មទឹកកខ្វក់ នៅក្នុងក្រុងតាខ្មៅ ខេត្តកណ្តាល»។ គម្រោងហេដ្ឋារចនាសម្ព័ន្ធអនាម័យដ៏ធំប្រចាំខេត្តកណ្តាលនេះ ទទួលបានហិរញ្ញប្បទានសម្បទានពី «មូលនិធិសម្រាប់កិច្ចសហប្រតិបត្តិការអភិវឌ្ឍន៍សេដ្ឋកិច្ច» (EDCF) របស់ធនាគារអាហរ័ណ-នីហរ័ណនៃសាធារណរដ្ឋកូរ៉េ (Export-Import Bank of Korea)។

ការរៀបចំផែនការអនុវត្តការងារតំណភ្ជាប់បណ្តាញទឹកកខ្វក់តាមខ្នងផ្ទះប្រកបដោយសុក្រឹតភាព នឹងជួយឱ្យការគ្រប់គ្រងថ្លៃចំណាយសាងសង់ស្ថិតក្នុងកញ្ចប់ថវិកាហិរញ្ញប្បទានដែលបានអនុម័ត ព្រមទាំងធានាបានថា ប្រព័ន្ធប្រព្រឹត្តិកម្មទឹកកខ្វក់ក្រុងតាខ្មៅនឹងដំណើរការបានយ៉ាងរលូន។ យន្តការនេះ នឹងប្រមូលទឹកកខ្វក់ទាំងអស់ចេញពីគ្រប់ខ្នងផ្ទះរបស់ប្រជាពលរដ្ឋ រួចបញ្ជូនទៅកាន់ស្ថានីយប្រព្រឹត្តិកម្មដើម្បីចម្រោះឱ្យបានត្រឹមត្រូវតាមស្តង់ដារបរិស្ថាន មុននឹងបញ្ចេញចោលទៅក្នុងប្រភពទឹកធម្មជាតិ។

សូមជម្រាបជូនថា កិច្ចប្រជុំពិនិត្យការសិក្សាបច្ចេកទេសតំណភ្ជាប់តាមខ្នងផ្ទះ សម្រាប់គម្រោងទឹកកខ្វក់ក្រុងតាខ្មៅ រវាងក្រសួងសាធារណការ និងក្រុមទីប្រឹក្សា Dohwa-Seoyoung ស្តែងឱ្យឃើញពីការគ្រប់គ្រងគម្រោងយ៉ាងម៉ត់ចត់។ ការតភ្ជាប់បណ្តាញអនាម័យដោយផ្ទាល់ពីខ្នងផ្ទះប្រជាពលរដ្ឋទៅកាន់ស្ថានីយចម្រោះ មិនត្រឹមតែការពារប្រភពទឹកធម្មជាតិ និងសុខភាពសាធារណៈប៉ុណ្ណោះទេ ប៉ុន្តែថែមទាំងជាគ្រឹះយ៉ាងរឹងមាំក្នុងការកសាងក្រុងតាខ្មៅ ឱ្យក្លាយជាទីក្រុងរវើក ប្រកបដោយចីរភាព និងបរិស្ថានស្អាត។ (អានបន្ថែម)

- Video Advertisement -