ក្រសួងសាធារណការ និងធនាគារពិភពលោក ចុះពិនិត្យវឌ្ឍនភាពគម្រោង WaSSIP នៅខេត្តសៀមរាប

Proeksa Meas
16 ខែកញ្ញា 2026
ព័ត៌មានសំណង់
77 មើល

ក្រុមការងារចម្រុះវាយតម្លៃខ្ពស់លើវឌ្ឍនភាពការងារដែលសម្រេចបាន ១០០% លើកញ្ចប់កិច្ចសន្យាចំនួន ៤ និងពន្លឿនការងារកញ្ចប់ចុងក្រោយ ដើម្បីលើកកម្ពស់អនាម័យ និងការផ្គត់ផ្គង់ទឹកស្អាតក្នុងតំបន់សៀមរាប

ខេត្តសៀមរាប៖ ការលើកកម្ពស់គុណភាពជីវិតប្រជាពលរដ្ឋ និងអនាម័យបរិស្ថានទីក្រុង តាមរយៈការរៀបចំប្រព័ន្ធចម្រោះទឹកកខ្វក់ និងការផ្គត់ផ្គង់ទឹកស្អាត បានក្លាយជាអាទិភាពយុទ្ធសាស្ត្រយ៉ាងសំខាន់សម្រាប់រាជរដ្ឋាភិបាលកម្ពុជា ក្នុងការអភិវឌ្ឍខេត្តសៀមរាបឱ្យក្លាយជាទីក្រុងទេសចរណ៍វៃឆ្លាត និងជាកន្លែងបដិសណ្ឋារកិច្ចកម្រិតខ្ពស់។ នេះបើយោងតាមការចុះពិនិត្យវឌ្ឍនភាព កាលពីថ្ងៃទី២ ខែកញ្ញា ឆ្នាំ២០២៦ ឯកឧត្តម ចៅ សុភៈភិបាល អគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ នៃក្រសួងសាធារណការ និងដឹកជញ្ជូន និងជានាយកគម្រោង បានដឹកនាំក្រុមការងារគ្រប់គ្រងគម្រោង ចុះបេសកកម្មគាំទ្រការអនុវត្តគម្រោងលើកទី១៥ នៃ «គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ (WaSSIP)» នៅខេត្តសៀមរាប។ បេសកកម្មនេះធ្វើឡើងរួមគ្នាជាមួយក្រុមការងារធនាគារពិភពលោក ដែលដឹកនាំដោយលោក កូវ ភិរម្យ ប្រធានក្រុមការងារ ព្រមទាំងមានការអញ្ជើញចូលរួមពីប្រធានចាត់ចែងគម្រោង ក្រុមប្រឹក្សាជាតិគ្រប់គ្រងគម្រោង WaSSIP ក្រុមហ៊ុនទីប្រឹក្សា ក្រុមហ៊ុនម៉ៅការសាងសង់ និងតំណាងមន្ទីរសាធារណការ និងដឹកជញ្ជូនខេត្តសៀមរាប។

បេសកកម្មនេះមានគោលបំណងចម្បងក្នុងការចុះត្រួតពិនិត្យ និងវាយតម្លៃផ្ទាល់លើវឌ្ឍនភាពការងារ ព្រមទាំងរួមគ្នាដោះស្រាយបញ្ហាប្រឈមបច្ចេកទេសផ្សេងៗ តាមកញ្ចប់កិច្ចសន្យានីមួយៗនៃគម្រោង។ ផ្អែកលើការវាយតម្លៃជាក់ស្តែង កញ្ចប់កិច្ចសន្យាចំនួនបួនបានអនុវត្តសម្រេចបាន ១០០% រួចរាល់ហើយ រួមមាន កញ្ចប់ MPWT-CW-4, កញ្ចប់ MPWT-CW-1A, កញ្ចប់ MPWT-CW-3 និងកញ្ចប់ MPWT-CW-6A។ ដោយឡែក កញ្ចប់កិច្ចសន្យា MPWT-CW-9 កំពុងដំណើរការយ៉ាងសកម្ម និងសម្រេចបានវឌ្ឍនភាពប្រមាណ ៧៧,១៩% ហើយ។

នៅក្នុងឱកាសនោះ ក្រុមការងារចម្រុះរបស់ក្រសួងសាធារណការ និងដឹកជញ្ជូន និងធនាគារពិភពលោក បានពិភាក្សាយ៉ាងស៊ីជម្រៅលើវិធានការកែលម្អបច្ចេកទេស និងការរៀបចំផែនការអនុវត្តបន្ត ដើម្បីធានាថាការសាងសង់ហេដ្ឋារចនាសម្ព័ន្ធប្រព័ន្ធចម្រោះទឹកកខ្វក់ និងបណ្តាញទឹកស្អាតទាំងអស់ ប្រព្រឹត្តទៅដោយស្របតាមបទដ្ឋានបច្ចេកទេស និងសម្រេចបាននូវគោលដៅជាក់លាក់ក្នុងការបំរើសេវាជូនសហគមន៍។

សូមជម្រាបថា បេសកកម្មគាំទ្រការអនុវត្តគម្រោងលើកទី១៥ នៃគម្រោង WaSSIP នៅខេត្តសៀមរាប ស្តែងឱ្យឃើញពីកិច្ចសហប្រតិបត្តិការយ៉ាងជិតស្និទ្ធ និងមានផលវិជ្ជមានរវាងរាជរដ្ឋាភិបាលកម្ពុជា និងធនាគារពិភពលោក។ ការសម្រេចបានលទ្ធផលស្ទើរតែទាំងស្រុងលើកញ្ចប់កិច្ចសន្យានានា នឹងក្លាយជាគ្រឹះយ៉ាងរឹងមាំក្នុងការបង្កើនប្រសិទ្ធភាពនៃការគ្រប់គ្រងទឹកកខ្វក់ លើកកម្ពស់អនាម័យសាធារណៈ និងធានាការផ្គត់ផ្គង់ទឹកស្អាតប្រកបដោយចីរភាពជូនប្រជាពលរដ្ឋ និងភ្ញៀវទេសចរក្នុងខេត្តសៀមរាប។ (អានបន្ថែម)