ក្រសួងសាធារណការ និងស្ថានទូតចិន ពិនិត្យកិច្ចព្រមព្រៀងគម្រោងអភិវឌ្ឍន៍ប្រព័ន្ធលូ និងប្រព្រឹត្តិកម្មទឹកកខ្វក់ នៅក្រុងព្រះសីហនុ

Proeksa Meas
17 ខែកញ្ញា 2026
ព័ត៌មានសំណង់
45 មើល

ឯកឧត្តម រស់ វណ្ណា រៀបចំជំនួបពិភាក្សាការងារជាមួយតំណាងស្ថានទូតចិន ដើម្បីពិនិត្យ និងប្រមូលធាតុចូលលើកិច្ចព្រមព្រៀង ព្រមទាំងបញ្ជីប៉ាន់តម្លៃ សំដៅពង្រឹងហេដ្ឋារចនាសម្ព័ន្ធបរិស្ថាន និងការអភិវឌ្ឍទីក្រុងឆ្នេរប្រកបដោយចីរភាព

ការកសាង និងពង្រីកប្រព័ន្ធហេដ្ឋារចនាសម្ព័ន្ធប្រព័ន្ធលូ ព្រមទាំងប្រព័ន្ធប្រព្រឹត្តិកម្មទឹកកខ្វក់ បានក្លាយជាកិច្ចការយុទ្ធសាស្ត្រដ៏មានសារៈសំខាន់សម្រាប់រាជរដ្ឋាភិបាលកម្ពុជា ក្នុងការរៀបចំក្រុងព្រះសីហនុឱ្យក្លាយជាតំបន់សេដ្ឋកិច្ចពិសេសគំរូពហុបំណង និងជាទីក្រុងឆ្នេរសមុទ្រប្រកបដោយចីរភាព និងបរិស្ថានល្អប្រសើរ។ នេះបើយោងតាមជំនួបកាលពីថ្ងៃទី១ ខែកញ្ញា ឆ្នាំ២០២៦ ដឹកនាំដោយឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់នៅក្រុងព្រះសីហនុ បានប្រជុំពិភាក្សាការងារជាមួយតំណាងស្ថានទូតចិនប្រចាំកម្ពុជា ដែលដឹកនាំដោយលោក Gao Shi Chao លេខាទី១ នៃស្ថានទូត។ កិច្ចប្រជុំនេះមានការចូលរួមពី ឯកឧត្តមអនុរដ្ឋលេខាធិការ ឯកឧត្តមអគ្គនាយកនៃអគ្គនាយកដ្ឋានប្រព័ន្ធចម្រោះទឹកកខ្វក់ ប្រធានគ្រប់គ្រងគម្រោង សមាជិកគម្រោង តំណាងមន្ទីរសាធារណការ និងដឹកជញ្ជូនខេត្តព្រះសីហនុ ព្រមទាំងមន្ត្រីជំនាញបច្ចេកទេសពាក់ព័ន្ធជាច្រើនរូប។

ជំនួបពិភាក្សានេះ ត្រូវបានរៀបចំឡើងក្នុងគោលបំណងដើម្បីពិនិត្យ ពិភាក្សា និងស្វែងរកធាតុចូលបន្ថែមលើសេចក្តីព្រាងកិច្ចព្រមព្រៀង ព្រមទាំងបញ្ជីប៉ាន់តម្លៃសម្រាប់ការអនុវត្តគម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់នៅក្នុងក្រុងព្រះសីហនុ ខេត្តព្រះសីហនុ។ កិច្ចខិតខំប្រឹងប្រែងរួមគ្នារវាងភាគីទាំងពីរ មានគោលដៅធានាឱ្យបាននូវតម្លាភាព សុក្រឹតភាពបច្ចេកទេស និងប្រសិទ្ធភាពថវិកា មុននឹងឈានទៅដល់ការចាប់ផ្តើមអនុវត្តសកម្មភាពសាងសង់ជាក់ស្តែងនៅតាមទីតាំងគោលដៅ។

កិច្ចសហប្រតិបត្តិការរវាងក្រសួងសាធារណការ និងដឹកជញ្ជូន ជាមួយស្ថានទូតចិន ស្តែងឱ្យឃើញពីការយកចិត្តទុកដាក់ខ្ពស់លើការដោះស្រាយបញ្ហាទឹកកខ្វក់ និងការការពារបរិស្ថានសមុទ្រនៅក្រុងព្រះសីហនុ។ ការសម្រេចបាននូវកិច្ចព្រមព្រៀងច្បាស់លាស់លើរចនាសម្ព័ន្ធបច្ចេកទេស និងការប៉ាន់តម្លៃ នឹងជួយរុញច្រានឱ្យការសាងសង់ប្រព័ន្ធចម្រោះទឹកកខ្វក់ថ្មីនេះដំណើរការទៅដោយរលូន ឆ្លើយតបទៅនឹងការរីកចម្រើនយ៉ាងឆាប់រហ័សនៃផ្នែកអចលនទ្រព្យ ឧស្សាហកម្ម និងទេសចរណ៍នៅក្នុងខេត្តតំបន់ឆ្នេរមួយនេះ។

សូមជម្រាបថា កិច្ចប្រជុំពិភាក្សាការងាររវាងក្រសួងសាធារណការ និងដឹកជញ្ជូន ជាមួយតំណាងស្ថានទូតចិន គឺជាជំហានយុទ្ធសាស្ត្រដ៏មានសារៈសំខាន់ក្នុងការរៀបចំគ្រឹះឱ្យបានរឹងមាំសម្រាប់ «គម្រោងអភិវឌ្ឍន៍ហេដ្ឋារចនាសម្ព័ន្ធប្រព័ន្ធលូ និងប្រព័ន្ធប្រព្រឹត្តកម្មទឹកកខ្វក់ នៅក្រុងព្រះសីហនុ»។ ការពិនិត្យស៊ីជម្រៅលើកិច្ចព្រមព្រៀង និងបញ្ជីប៉ាន់តម្លៃ មិនត្រឹមតែជួយពង្រឹងកិច្ចសហប្រតិបត្តិការទ្វេភាគីប៉ុណ្ណោះទេ ប៉ុន្តែថែមទាំងធានាថា ក្រុងព្រះសីហនុនឹងទទួលបាននូវប្រព័ន្ធគ្រប់គ្រងទឹកកខ្វក់ប្រកបដោយស្តង់ដារ និងចីរភាព ចូលរួមចំណែកការពារប្រព័ន្ធអេកូឡូស៊ីសមុទ្រ និងលើកកម្ពស់គុណភាពជីវិតរបស់ប្រជាពលរដ្ឋក្នុងតំបន់ឱ្យកាន់តែប្រសើរឡើង។ (អានបន្ថែម)