ចាប់ពីឆ្នាំ២០១៨ ចិនបានជួយបោសសម្អាតមីននៅកម្ពុជាបានប្រមាណ ១៩០ គីឡូម៉ែត្រការ៉េ

Proeksa Meas
17 ខែកក្កដា 2026
ព័ត៌មានអចលនទ្រព្យ
39 មើល

ចាប់តាំងពីឆ្នាំ ២០១៨ មក ភាគីចិនបានជួយកម្ពុជាក្នុងការបោសសម្អាតមីន និងតំបន់ដែលរងការបំពុលដោយយុទ្ធភណ្ឌមិនទាន់ផ្ទុះប្រមាណ ១៩០ គីឡូម៉ែត្រការ៉េ។ នេះបើយោងតាមការបញ្ជាក់ពី ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា បានបង្ហោះសារនៅលើហ្វេសប៊ុក កាលថ្ងៃទី៨ កក្កដា ឆ្នាំ២០២៦។

ការបញ្ជាក់ពីសំណាក់ ឯកឧត្តម វ៉ាង វិនពីន ធ្វើឡើងបន្ទាប់ពីឯកឧត្តមបានចូលរួមពិធីបិទបញ្ចប់គម្រោងសហប្រតិបត្តិការបោសសម្អាតមីនឡានឆាង-មេគង្គ ជាមួយឯកឧត្តមបណ្ឌិត លី ធុជ ទេសរដ្ឋមន្ត្រី និងជាអនុប្រធានទី១ អាជ្ញាធរមីន។

ឯកឧត្តម វ៉ាង វិនពីន បានបញ្ជាក់ឱ្យដឹងថា ចាប់តាំងពីឆ្នាំ ២០១៨ មក ភាគីចិនបានជួយកម្ពុជាក្នុងការបោសសម្អាតមីន និងតំបន់ដែលរងការបំពុលដោយយុទ្ធភណ្ឌមិនទាន់ផ្ទុះប្រមាណ ១៩០ គីឡូម៉ែត្រការ៉េ ដោយបានរកឃើញនិងបំផ្លាញមីន និងយុទ្ធភណ្ឌមិនទាន់ផ្ទុះចំនួន ១០៤០០០ គ្រាប់ ដែលផ្តល់អត្ថប្រយោជន៍ដល់មនុស្សជាង ១,៤ លាននាក់។ ឯកឧត្តមបានប្រកាសជំហរថា ប្រទេសចិននឹងបន្តគាំទ្រយ៉ាងមុតមាំចំពោះប្រតិបត្តិការបោសសម្អាតមីននៅកម្ពុជា និងជួយកម្ពុជាសម្រេចបាននូវគោលដៅគ្មានមីនឱ្យបានឆាប់រហ័ស។

សូមរំឭកដែរថា “រយៈពេល៣៣ឆ្នាំកន្លងមកនេះ គិតចាប់ពីឆ្នាំ១៩៩២ ដល់ឆ្នាំ២០២៥ ផ្ទៃដីកម្ពុជាទំហំ ៣.៥៤១គីឡូម៉ែត្រការ៉េ ត្រូវបានបោសសម្អាតសម្រាប់យកទៅប្រើប្រាស់ និងបង្កបង្កើនផល ក្នុងនោះវិស័យកសិកម្មមាន ៧៨% ហេដ្ឋារចនាសម្ព័ន្ធមាន ៥% និងផ្សេងៗមាន ១៧% ដែលរួមមានការសាងសង់លំនៅឋាន ភូមិករ សាលារៀន មណ្ឌលសុខភាពជាដើម…”។ នេះបើយោងតាមសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសប្រារព្ធខួបលើកទី២៧ នៃទិវាជាតិយល់ដឹងអំពីមីន កាលថ្ងៃទី២៣ ខែកុម្ភៈ ឆ្នាំ២០២៦៕ (អានបន្ថែម)