អូស្ត្រាលីផ្តល់ហិរញ្ញប្បទាន ១,៥លានដុល្លារអូស្រ្តាលី ជួយសកម្មភាពដោះមីននៅតាមព្រំដែន

Proeksa Meas
19 ខែមិថុនា 2026
ព័ត៌មានអចលនទ្រព្យ
354 មើល

អូស្ត្រាលី ផ្តល់ហិរញ្ញប្បទាន ១,៥លានដុល្លារអូស្រ្តាលី ដើម្បីគាំទ្រការស្តារឡើងវិញ និងសកម្មភាពមីននៅតាមសហគមន៍ដែលរងផលប៉ះពាល់តាមព្រំដែនរបស់កម្ពុជា តាមរយៈគម្រោងបោសសម្អាតមីនដើម្បីលទ្ធផល។ ពិធីចុះហត្ថលេខាលើហិរញ្ញប្បទាននេះ បានធ្វើឡើងកាលថ្ងៃទី០៨ ខែមិថុនា ឆ្នាំ២០២៦ ក្រោមវត្តមានឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន ឯកឧត្តម Derek Yip ឯកអគ្គរដ្ឋទូតអូស្ត្រាលីប្រចាំកម្ពុជា និងលោក Enrico Gaveglia តំណាងអង្គការ UNDP ប្រចាំកម្ពុជា។

វិភាគទានចំនួន ១,៥លានដុល្លារអូស្រ្តាលី គឺធ្វើឡើងតាមរយៈ ”គម្រោងបោសសម្អាតដើម្បីលទ្ធផលដំណាក់កាលទី៥ (CfR-V)” ដែលជាគម្រោងមានម្ចាស់ជំនួយជាច្រើន រួមមាន រដ្ឋាភិបាលកម្ពុជា អ៊ីតាលី លុចសំបួ និងនូវែលសេឡង់ ហើយអនុវត្តរួមគ្នាដោយអាជ្ញាធរមីន និងអង្គការ UNDP។

ជំនួយនេះនឹងគាំទ្រលើកិច្ចការបោសសម្អាតមីន ការអប់រំអំពីហានិភ័យយុទ្ធភណ្ឌគ្រឿងផ្ទុះ និងការគាំទ្រជីវភាពរស់នៅរបស់ប្រជាជនផ្លាស់ទីលំនៅ ព្រមទាំងរួមចំណែកដល់ការស្តារសេដ្ឋកិច្ចសង្គម ក្នុងខេត្តចំនួនបួន រួមមាន ខេត្តបន្ទាយមានជ័យ បាត់ដំបង ឧត្តរមានជ័យ និងព្រះវិហារ ដែលជាខេត្តរងផលប៉ះពាល់ខ្លាំងដោយសារជម្លោះតាមព្រំដែនកម្ពុជា-ថៃ។

បើតាមឯកឧត្តមទេសរដ្ឋមន្រ្តី លី ធុជ បានឱ្យដឹងថា អូស្ត្រាលីជាដៃគូសកម្មភាពមីនដែលគួរឱ្យទុកចិត្តមួយរបស់កម្ពុជាតាំងពីដើមទសវត្សរ៍ឆ្នាំ ១៩៩០ និងបានគាំទ្រគម្រោង CfR តាំងពីដំណាក់កាលទី១ ឆ្នាំ២០០៦ ដោយមានវិភាគទានសរុប ៤៥.៣១ លានដុល្លារអូស្រ្តាលី៕ (អានបន្ថែម)