កម្ពុជា-ចិន ចុះកិច្ចព្រមព្រៀងផ្តល់​ថវិកា​ជិត​២លាន​ដុល្លារ​ ដល់​គម្រោងមេគង្គ-ឡានឆាងចំនួន​៧

• Proeksa Meas
• 16 ខែ​មិថុនា 2026
• ព័ត៌មានសំណង់
• 74 មើល

ការចាក់បញ្ចូលថវិកាជិតពីរលានដុល្លារនឹងជំរុញឌីជីថលូបនីយកម្មក្នុងតំបន់ ការថែទាំសុខភាព និងការអភិវឌ្ឍជនបទនៅទូទាំងព្រះរាជាណាចក្រ

កម្ពុជា-​ចិន បានសម្រេច​ចុះហត្ថលេខាលើកិច្ចព្រមព្រៀងស្ដីពី «មូលនិធិពិសេសសម្រាប់គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៦» ដែលផ្តល់​ទឹកប្រាក់ប្រមាណ ១.៩៨០.០០០ ដុល្លារអាម៉េរិកដល់​កម្ពុជា​ សមាប់ការអនុវត្តគម្រោង​ចំនួន​៧។

ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និង​សហប្រតិបត្តិការអន្តរជាតិកម្ពុជា និងលោក វ៉ាង វិនពីន (WANG Wenbin) ឯកអគ្គរដ្ឋទូត​ចិនប្រចាំកម្ពុជា បានចុះហត្ថលេខា លើកិច្ចព្រមព្រៀងនេះ កាលពីព្រឹកថ្ងៃទី​ ៤ ខែមិថុនា។

ចំពោះ​គម្រោងកិច្ចសហប្រតិបត្តិការមេគង្គ-ឡានឆាង ឆ្នាំ២០២៦ ចំនួន៧ ដែល​បាន​ផ្តល់​ទឹកប្រាក់ប្រមាណ ១.៩៨០.០០០ ដុល្លារអាម៉េរិក មក​ឱ្យកម្ពុជានេះ គឺ​ទី​១ ​គម្រោង​សហគ្រាសកសិករផលិត​ផ្សិត​ ដើម្បី​កាត់បន្ថយ​ភាពក្រីក្រ​នៅ​ខេត្ត​កណ្តាល។ ទី​២ ការរួម​បញ្ចូលគ្នា​នៃ​ការ​ធ្វើ​ពិពិធកម្ម​សេដ្ឋកិច្ចជនបទ និង​ចែក​ចាយ​ទឹក​ស្អាត ដើម្បីអនាគត ទាំងអស់គ្នា-​ដំណាក់កាលទី២។ ទី​៣ គឺ​ការពង្រីក​លទ្ធភាព​ឈាន​ចូល​ទីផ្សារ​តំបន់​តាម​រយៈ​នវានុវត្តន៍​សំបក​វេចខ្ចប់ នៅ​ក្នុង​បណ្តា​ប្រទេសមេគង្គ-ឡានឆាង។ ទី​៤​ គម្រោង​លុបបំបាត់​ជំងឺ​រលាក​ថ្លើម។ ទី​៥ ឌីជីថលូបនីយកម្មទេសចរណ៍​សហគមន៍មេគង្គ-ឡានឆាង៖ ការត្រៀម​ខ្លួន​​សម្រាប់​​ទទួល ភ្ញៀវ​ទេសចរ​ចិន។ ទី​៦ ការពង្រឹង​សមត្ថភាព​បច្ចេកវិទ្យា​បៃតង និង​បរិវត្តកម្មឌីជីថល សម្រាប់​វិស្វករ​ក្នុង​បណ្ដាប្រទេស អនុតំបន់​មេគង្គ។ និង ទី​៧ ពីប្រទេសចិនមកកាន់ប្រទេសកម្ពុជា៖ គម្រោង​ការ​លើកកម្ពស់​សមត្ថភាព​ទិន្នន័យ​ទឹក និង​កិច្ចសន្ទនា​ថ្នាក់​តំបន់ ក្រោម​ក្របខ័ណ្ឌ​កិច្ច​សហប្រតិបត្តិការឡានឆាង-មេគង្គ។

ក្រសួង​ការបរទេស និង​សហប្រតិបត្តិការអន្តរជាតិ បានបញ្ជាក់​តាម​សេចក្តីប្រកាស​ព័ត៌មាន​របស់ខ្លួន​ថា គម្រោងទាំងនេះ នឹង​រួមចំណែក​ដល់​ការ​ជំរុញ​ការអភិវឌ្ឍជាតិ​ជា​អាទិភាព​របស់​កម្ពុជាលើ​វិស័យ​ផ្សេងៗ​រួមមាន ការកាត់បន្ថយ​ភាពក្រីក្រ ការអភិវឌ្ឍ​ជនបទ សុខាភិបាល ទេសចរណ៍ និង​បរិវត្តកម្មឌីជីថលជាដើម៕ (អានបន្ថែម)

• China aid
• Cooperation and networking