កម្ពុជា-ចិន ចុះកិច្ចព្រមព្រៀងអនុវត្តគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៧ ប៉ែកខាងជើង

Proeksa Meas
27 ខែឧសភា 2026
ព័ត៌មានសំណង់
569 មើល

ការធ្វើឱ្យប្រសើរឡើងនូវផ្លូវតភ្ជាប់ខេត្តក្រចេះទៅកាន់ព្រំដែនឡាវនឹងផ្លាស់ប្តូរព័ស្តុភារកម្មក្នុងតំបន់ និងពង្រឹងបណ្តាញពាណិជ្ជកម្មឆ្លងដែន

ក្រសួងសាធារណការ និងដឹកជញ្ជូនកម្ពុជា និងទីប្រឹក្សាសេដ្ឋកិច្ច និងពាណិជ្ជកម្មចិន បានសម្រេចចុះហត្ថលេខាលើកិច្ចព្រមព្រៀងអនុវត្តគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៧ ប៉ែកខាងជើង ដោយចាប់ផ្តើមពីខេត្ដក្រចេះទៅ ត្រពាំងក្រៀល ខេត្ដស្ទឹងត្រែង។

កិច្ចព្រមព្រៀងនេះ បានធ្វើឡើងកាលពីថ្ងៃទី១៩ ខែឧសភា ឆ្នាំ២០២៦ ក្រោមវត្តមានឯកឧត្ដម ប៉ាល់ ចន្ទតារា រដ្ឋលេខាធិការ ក្រសួងសាធារណការ និងដឹកជញ្ជូន និងជានាយកគម្រោង តំណាងដ៏ខ្ពង់ខ្ពស់ ឯកឧត្ដម ប៉េង ពោធិ៍នា រដ្ឋមន្ដ្រីក្រសួងសាធារណការ និងដឹកជញ្ជូន ជាមួយលោកស្រី ចុង ជៀ ទីប្រឹក្សាសេដ្ឋកិច្ច និងពាណិជ្ជកម្ម អមស្ថានទូតសាធារណរដ្ឋប្រជាមានិតចិន ប្រចាំកម្ពុជា។

សូមជម្រាបដែរថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៧ ប៉ែកខាងជើង (ខេត្ដក្រចេះទៅ ត្រពាំងក្រៀល ខេត្ដស្ទឹងត្រែង) នេះមានប្រវែងសរុប ៩៦,៦៣ គម ដែលនឹងត្រូវលើកកម្រិតឡើងវិញ។គម្រោងនេះ នឹងត្រូវក្រាលបេតុងកៅស៊ូ AC ដោយបំពាក់បរិក្ខារសុវត្ថិភាពចរាចរណ៍នានា។

កម្ពុជា-ចិន បានចាត់ទុកថា កំណាត់ផ្លូវជាតិលេខ៧នេះ គឺជាខ្សែផ្លូវដ៏មានសក្ដានុពល បម្រើដល់វិស័យឡូជីស្ទីក ដែលជួយដល់កំណើនសេដ្ឋកិច្ច និងការតភ្ជាប់នៅក្នុងតំបន់ភូមិភាគឦសាន ជាពិសេសតភ្ជាប់ទៅកាន់ព្រំដែនអន្ដរជាតិកម្ពុជា-ឡាវ (ត្រពាំងក្រៀល-ណងណុកខៀន)៕ (អានបន្ថែម)