វេទិកាថ្នាក់ជាតិស្តីពីហិរញ្ញប្បទានសម្រាប់ MSMEs ដើម្បីជំរុញកំណើនសេដ្ឋកិច្ច និងភាពធន់ប្រកបដោយចីរភាព

Proeksa Meas
6 ខែវិច្ឆិកា 2026
ព័ត៌មានអចលនទ្រព្យ
44 មើល

ការលើកកម្ពស់សក្តានុពល និងការសម្រួលដល់ការទទួលបានទុនបង្វិលរបស់សហគ្រាសមីក្រូ តូច និងមធ្យម (MSMEs) ត្រូវបានជំរុញកម្រិតថ្មីមួយទៀត តាមរយៈវេទិកាថ្នាក់ជាតិស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ ដែលត្រូវបានរៀបចំឡើងយ៉ាងអធិកអធមក្រោមប្រធានបទ «លទ្ធភាពទទួលបានហិរញ្ញប្បទានរបស់ MSMEs»។ ពិធីបើកវេទិកានេះ បានប្រព្រឹត្តទៅកាលពីថ្ងៃទី២៧ ខែតុលា ឆ្នាំ២០២៦ នាមជ្ឈមណ្ឌលសន្និបាត និងពិព័រណ៍កោះពេជ្រ ក្រោមអធិបតីភាពរបស់ឯកឧត្តឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

វេទិកាថ្នាក់ជាតិនេះ ត្រូវបានបង្កើតឡើងក្នុងគោលបំណងបំពេញចន្លោះប្រហោងផ្នែកហិរញ្ញវត្ថុ និងបង្កើតស្ពានតភ្ជាប់ដោយផ្ទាល់រវាងម្ចាស់សហគ្រាស មីក្រូ តូច និងមធ្យម ជាមួយស្ថាប័នហិរញ្ញវត្ថុ ធនាគារពាណិជ្ជ ធនាគារគោលនយោបាយ និងស្ថាប័នគាំទ្ររបស់រដ្ឋ។ តាមរយៈវេទិកានេះ ភាគីពាក់ព័ន្ធបានពិភាក្សាគ្នាលើដំណោះស្រាយជាក់ស្តែងក្នុងការដោះស្រាយបញ្ហាប្រឈមនៃការទទួលបានឥណទាន ការពង្រីកឱកាសអាជីវកម្ម និងការកសាងភាពធន់ក្នុងបរិបទសេដ្ឋកិច្ចសកលដែលមានការប្រែប្រួល។

សូមជម្រាបថា ការរៀបចំវេទិកាថ្នាក់ជាតិស្តីពីហិរញ្ញប្បទានសម្រាប់ MSMEs លើកទី១ ឆ្នាំ២០២៦ គឺជាជំហានយុទ្ធសាស្ត្រដ៏មានអត្ថន័យជ្រាលជ្រៅក្នុងការគាំទ្រដល់កាតាលីករសេដ្ឋកិច្ចមូលដ្ឋាន។ ការពង្រឹងលទ្ធភាពទទួលបានទុន និងការសម្របសម្រួលប្រព័ន្ធអេកូឡូស៊ីហិរញ្ញវត្ថុ នឹងជួយឱ្យសហគ្រាសមីក្រូ តូច និងមធ្យមនៅកម្ពុជាអាចពង្រីកប្រតិបត្តិការអាជីវកម្ម លើកកម្ពស់ផលិតភាព និងរួមចំណែកយ៉ាងសកម្មដល់ការអភិវឌ្ឍសេដ្ឋកិច្ចជាតិប្រកបដោយចីរភាព។ (អានបន្ថែម)