រដ្ឋកំពុងរៀបចំឱ្យមានស្តង់ដារគោលការណ៍គ្រឹះ ហេដ្ឋារចនាសម្ព័ន្ធសម្រាប់ទីក្រុងនៅកម្ពុជា

Proeksa Meas
27 ខែឧសភា 2026
ព័ត៌មានសំណង់
310 មើល

ឧបនាយករដ្ឋមន្ត្រី សាយ សំអាល់ បានលើកឡើងពីផែនការវិមជ្ឈការដ៏ទូលំទូលាយមួយនៅឯវេទិកាទីក្រុងពិភពលោក ដោយផ្តល់អាទិភាពដល់បណ្តាញឌីជីថល លំនៅដ្ឋានប្រកបដោយបរិយាប័ន្ន និងអភិបាលកិច្ចមូលដ្ឋាន។

រាជរដ្ឋាភិបាល កំពុងរៀបចំឱ្យមានស្តង់ដារ នូវគោលការណ៍គ្រឹះ ហេដ្ឋារចនាសម្ព័ន្ធ និងសេវាកម្មសម្រាប់ទីក្រុងនានា នៅទូទាំងប្រទេសប្រទេសកម្ពុជា ដើម្បីឱ្យទីក្រុងមានភាពធន់ និងចីរភាព។ នេះបើយោងតាមប្រសាសន៍របស់ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងវេទិកាពិភពលោកលើកទី១៣ ស្តីពី «ទីក្រុង» កាលថ្ងៃទី១៨ ខែឧសភា ឆ្នាំ២០២៦។

នាឱកាសនោះ ឯកឧត្តម សាយ សំអាល់ បានឱ្យដឹងថា រាជរដ្ឋាភិបាលកំពុងរៀបចំឱ្យមានស្តង់ដារ នូវគោលការណ៍គ្រឹះ ហេដ្ឋារចនាសម្ព័ន្ធ និងសេវាកម្មសម្រាប់ទីក្រុងនានា នៅទូទាំងប្រទេស សំដៅធ្វើឱ្យទីក្រុងរបស់យើងកាន់តែមានភាពធន់ និងចីរភាព ដោយផ្តល់អំណាច និងការទទួលខុសត្រូវឱ្យកាន់តែច្រើនដល់រដ្ឋបាលមូលដ្ឋាន។

ឯកឧត្តមបានលើកឡើងថា ស្តង់ដារគោលការណ៍គ្រឹះហេដ្ឋារចនាសម្ព័ន្ធ និងសេវាកម្មសម្រាប់ទីក្រុងនានានៅទូទាំងប្រទេសកម្ពុជា គឺផ្តោតលើការធ្វើផែនការៀបចំដែនដីឱ្យបានត្រឹមត្រូវ ការពង្រឹងភាពជាដៃគូ ការវិនិយោគលើហេដ្ឋារចនាសម្ព័ន្ធឌីជីថល ការកែលម្អ ការគ្រប់គ្រងកាកសំណល់ អនាម័យ លំហូរចរាចរណ៍ ដឹកជញ្ជូនសាធារណៈ សណ្តាប់ធ្នាប់សាធារណៈ សន្តិសុខ ការអប់រំ ការថែទាំសុខភាពជាសកល សកម្មភាពវប្បធម៌ ក៏ដូចជា ការលើកកម្ពស់គ្រោងការណ៍ឥណទានផ្ទះសម្បែងដែលមានតម្លៃសមរម្យ និងបរិយាបន្នជាដើម។

លើសពីនេះ ឯកឧត្តមថា រដ្ឋាភិបាលក៏កំពុងផ្តោតលើគោលនយោបាយសម្បទានដោយផ្តល់ដីកសិកម្ម និងកម្មវិធីផ្ទះសម្បែងដែលមានតម្លៃសមរម្យ សម្រាប់អ្នកដែលស្ថិតនៅកម្រិតទាបនៃសង្គមរបស់យើង។ ជាក់ស្តែងក្នុងរយៈពេល ១០ឆ្នាំ ចុងក្រោយនេះ រដ្ឋបាភិបាលបានផ្តល់ជីវិតថ្មី ដល់គ្រួសារប្រមាណកន្លះលានគ្រួសារ នៅទូទាំងប្រទេសកម្ពុជា។ ជាមួយគ្នានេះ រដ្ឋាភិបាលក៏កំពុងបង្កើនឱកាសថ្មីៗសម្រាប់ប្រជាជន ដើម្បីឱ្យពួកគេអាចចាកចេញពីការតាំងទីលំនៅមិនរៀបរយផងដែរ៕