កម្ពុជាចូលរួមកិច្ចសន្ទនាថ្នាក់តំបន់ «Asia-Pacific Dialogue on Heritage and Authenticity» នៅប្រទេសវៀតណាម

Proeksa Meas
13 ខែតុលា 2026
Uncategorized @km
15 មើល

ប្រតិភូមកពីអាជ្ញាធរជាតិព្រះវិហារ និងសំបូរព្រៃគុក ក្រោមការសម្របសម្រួលពីយូណេស្កូកម្ពុជា រួមចំណែកក្នុងសេចក្តីថ្លែងការណ៍ទីក្រុងហាណូយ ដើម្បីពង្រឹងការអភិរក្ស និងចីរភាពបេតិកភណ្ឌពិភពលោក

រាជធានីហាណូយ៖ ការការពារភាពយថភាព និងការគ្រប់គ្រងបេតិកភណ្ឌវប្បធម៌ពិភពលោកប្រកបដោយចីរភាព បានប្រែជាប្រធានបទយុទ្ធសាស្ត្រដ៏មានសារៈសំខាន់ ក្នុងការជួយថែរក្សាមរតកប្រវត្តិសាស្ត្រ និងលើកកម្ពស់តួនាទីសហគមន៍មូលដ្ឋាននៅក្នុងតំបន់អាស៊ីបាស៊ីហ្វិក។ ចាប់ពីថ្ងៃទី២៧ ខែកញ្ញា ដល់ថ្ងៃទី១ ខែតុលា ឆ្នាំ២០២៦ តំណាងអ្នកជំនាញបេតិកភណ្ឌពិភពលោកកម្ពុជាចំនួនពីររូប មកពីអាជ្ញាធរជាតិព្រះវិហារ និងអាជ្ញាធរជាតិសំបូរព្រៃគុក ក្រោមកិច្ចសហការ និងការសម្របសម្រួលពីគណៈកម្មការជាតិយូណេស្កូកម្ពុជា បានអញ្ជើញចូលរួមកិច្ចសន្ទនាថ្នាក់តំបន់ស្តីពី «Asia-Pacific Dialogue on Heritage and Authenticity» ដែលបានប្រព្រឹត្តទៅនៅទីក្រុងហាណូយ និងខេត្តនិញប៊ិញ នៃសាធារណរដ្ឋសង្គមនិយមវៀតណាម។

ព្រឹត្តិការណ៍ថ្នាក់តំបន់ដ៏មានសារៈសំខាន់នេះ បានផ្តល់ឱកាសយ៉ាងទូលំទូលាយដល់ក្រុមអ្នកជំនាញកម្ពុជា ក្នុងការចែករំលែកបទពិសោធន៍ជាក់ស្តែង ផ្លាស់ប្តូរចំណេះដឹង និងពិភាក្សាជាមួយអ្នកជំនាញអន្តរជាតិលើការងារអភិរក្ស និងការស្តារបេតិកភណ្ឌឡើងវិញ។ កិច្ចសន្ទនាក៏បានលើកឡើងយ៉ាងស៊ីជម្រៅអំពីតួនាទីមិនអាចខ្វះបានរបស់សហគមន៍មូលដ្ឋាន ក្នុងការចូលរួមថែរក្សាភាពយថភាព (Authenticity) និងតម្លៃជាសកលនៃសម្បត្តិបេតិកភណ្ឌ។ តាមរយៈកិច្ចពិភាក្សា និងការទាញយកបទពិសោធន៍ពីការគ្រប់គ្រងរមណីយដ្ឋានប្រវត្តិសាស្ត្រក្នុងស្រុក អ្នកជំនាញកម្ពុជាបានចូលរួមចំណែកយ៉ាងសកម្មក្នុងការរៀបចំសេចក្តីថ្លែងការណ៍ទីក្រុងហាណូយ (The Ha Noi Outcome Document) ដែលជាសមិទ្ធផលរួមថ្នាក់តំបន់។

ការចូលរួមរបស់ប្រតិភូកម្ពុជានាពេលនេះ ស្តែងឱ្យឃើញពីការប្តេជ្ញាចិត្តយ៉ាងសកម្មរបស់រាជរដ្ឋាភិបាលកម្ពុជា ក្នុងការសហការជាមួយស្ថាប័នអន្តរជាតិ ដើម្បីពង្រឹងការគ្រប់គ្រង និងការពារបេតិកភណ្ឌពិភពលោក។ ការរួមបញ្ចូលគ្នារវាងបច្ចេកទេសអភិរក្សខ្នាតអន្តរជាតិ និងការចូលរួមពីសហគមន៍ នឹងធានាថា មរតកវប្បធម៌ត្រូវបានការពារយ៉ាងគង់វង្សសម្រាប់មនុស្សជំនាន់បច្ចុប្បន្ន និងជំនាន់ក្រោយ។

ការចូលរួមរបស់អ្នកជំនាញបេតិកភណ្ឌកម្ពុជា ក្នុងកិច្ចសន្ទនាថ្នាក់តំបន់អាស៊ីបាស៊ីហ្វិកនៅប្រទេសវៀតណាម គឺជាសក្ខីភាពនៃការលើកកម្ពស់តួនាទីកម្ពុជាលើឆាកអន្តរជាតិ ក្នុងវិស័យអភិរក្សបេតិកភណ្ឌ។ ការចែករំលែកបទពិសោធន៍ និងការចូលរួមរៀបចំក្របខណ្ឌគោលនយោបាយតំបន់ មិនត្រឹមតែជួយពង្រឹងសមត្ថភាពគ្រប់គ្រងប្រាសាទព្រះវិហារ និងប្រាសាទសំបូរព្រៃគុកប៉ុណ្ណោះទេ ប៉ុន្តែថែមទាំងរួមចំណែកដល់ការការពារបេតិកភណ្ឌពិភពលោកប្រកបដោយចីរភាព។ (អានបន្ថែម)